Oktyabrın 1-dən dövlət ümumtəhsil məktəblərində yaradılmış məktəbəhazırlıq qruplarında 5 yaşı həmin il tamam olmuş uşaqlar üçün yeni tədris ili başlayıb. Məktəbəhazırlıq qruplarında təhsil dövlət hesabına həyata keçirilir.
Məktəbəhazırlıq qruplarının yaradılmasında əsas məqsəd uşaqların məktəb təliminə psixoloji və sosial baxımdan hazırlanması, onların təhsil mühitinə uyğunlaşması, ünsiyyət və birgə fəaliyyət bacarıqlarının inkişaf etdirilməsidir.
Belə qruplarda gün ərzində 3, həftədə 4 gün olmaqla 12 məşğələ keçirilir. Bir məşğələnin müddəti 30 dəqiqə, məşğələlərarası fasilə isə 10 dəqiqə müəyyənləşdirilib. Uşaqlar “Ətraf aləmlə tanışlıq”, “Savad təliminə hazırlıq və nitq inkişafı”, “Bədii təfəkkürün inkişafı”, “Məntiqi və riyazi təfəkkürün inkişafı”, “Təsviri fəaliyyət”, “Musiqi” və “Fiziki mədəniyyət” istiqamətləri üzrə məşğələlərdə iştirak edirlər.
Bu münasibətlə "AYMEDİACOMPANY.AZ" olaraq Bakı şəhəri, Xətai rayonu, NZS qəsəbəsində yerləşən Zakir Tofiq oğlu Yusifov adına 194 nömrəli tam orta məktəbdə məktəbəhazırlıq qruplarının ilk dərs günü ilə bağlı keçirilən tədbirdə iştirak etdik.
194 nömrəli tam orta məktəb 1941-ci ildə fəaliyyətə başlayıb. Məktəb 2012-ci ildə sökülərək yenidən tikilib və 2014-cü tədris ilində istifadəyə verilib. Hazırda məktəbdə 63 sinifdə 1643 şagird təhsil alır. Məktəbdə məktəbəhazırlıq üzrə 6 qrup fəaliyyət göstərir və 118 müəllim çalışır. Son 5 il ərzində məktəbin 36 şagirdi qəbul imtahanlarında 500-700 bal aralığında nəticə göstərərək ali təhsil müəssisələrinə qəbul olub.
Oktyabrın 2-də keçirilən tədbir Azərbaycan Respublikasının Dövlət Himninin səsləndirilməsi ilə açıq elan edilib. Açılışda məktəbin direktoru Elnarə Zeynalova çıxış edərək təhsilin əhəmiyyətindən, dövlət tərəfindən təhsil sahəsinə göstərilən diqqət və qayğıdan danışıb. O, məktəbəhazırlıq qruplarına qəbul olunan uşaqlara uğurlar arzulayıb, valideynlərə və şagirdlərə tədris prosesi ilə bağlı tövsiyələrini çatdırıb.
Tədbirin ən yaddaqalan məqamlarından biri isə balaca məktəbəhazırlıq qrupu şagirdlərinin ilk dəfə müəllimləri ilə birlikdə sinif otaqlarına daxil olması olub. Uşaqlar arasında həyəcan keçirən, valideynindən ayrılmaqda çətinlik çəkən və hətta ağlayan balacalar da olub.
Bu məqamda 0 Ç sinfinin müəlliməsi Jalə Allahverdiyevanın uşaqlara münasibəti xüsusi diqqət çəkib. İlk dərs gününün həyəcanını yaşayan balacalara böyük səbr və nəvazişlə yanaşan müəllimə onların özlərini rahat hiss etmələri üçün xüsusi diqqət göstərib. Ağlayan uşaqları sakitləşdirərək onlarla mehriban ünsiyyət qurması, diqqətlərini müxtəlif fəaliyyətlərə yönəltməsi və sinif mühitinə uyğunlaşmalarına kömək etməsi müəllimənin uşaqlarla işləmək bacarığını nümayiş etdirib.
Jalə Allahverdiyevanın hər bir uşağa fərdi yanaşması, onların emosional vəziyyətinə həssas münasibət göstərməsi və ilk gündən sinifdə mehriban mühit yaratmağa çalışması valideynlərin də diqqətindən yayınmayıb. Məktəbəhazırlıq mərhələsində müəllimin yalnız bilik verməsi deyil, uşağın məktəbə və müəllimə sevgi ilə yanaşmasını təmin etməsi də mühüm amillərdən biridir.
Tədbirdə "AYMEDİACOMPANY.AZ" saytının Mədəniyyət şöbəsinin müdiri Fərid Əmiraslanovun oğlu Əmiraslanlı İmran Fərid oğlu da məktəbəhazırlıq qrupunun ilk şagirdləri sırasında olub.
"AYMEDİACOMPANY.AZ" kollektivi olaraq bütün məktəbəhazırlıq qrupunun şagirdlərinə, onların valideynlərinə və müəllimlərinə yeni tədris ilində zehin açıqlığı, uğur və müvəffəqiyyət arzulayırıq. Balaca şagirdlərə ilk addımlarını atdıqları bu müqəddəs təhsil yolunda daim uğurlar diləyirik.
Fərid Əmiraslanov
"AYMEDİACOMPANY.AZ" mədəniyyət işləri üzrə direktor müavini
