Biz 44 günlük ikinci Vətən Müharibəsini qalibiyyətlə bitirdik. Erməni vandalları və daşnakları bir daha əmin oldular ki, odlar yurdu Azərbaycanın Babəkləri, Cavanşirləri, Nəbiləri, Koroğluları, Mehdi və Həziləri bu gün də möhtəşəm xalqın qan yaddaşında yaşayırlar.
Qəhrəmanlıq salnaməmizin, Böyük Qələbəmizin il dönümünə sayılı günlər qalıb.
Bu münasibətlə əziz dostumuz Hacı İntiqam Atayev bir aya yaxındır ki, gecəsini gündüzünə qatıb, sevincini paylaşmaq üçün incəsənət və mətbuat işçilərini bu sevincin işığına topladı.
Qısa arayış:
- Diqqətinizə çatdırım ki, Hacı İntiqam Atayev 30 ildən artıqdır ki, ədiblərimizin, şair - yazıçılarımızın, görkəmli musiqiçilərimizin, ictimai xadimlərimizin, igid qəhrəmanlarımızın, şəhidlərimizin mövlud və anım günləri ilə yanaşı milli bayramlarımızı da beləcə heç kimdən bir yardım ummadan yüksək səviyyədə qeyd edir.
03 noyabr 2021 ci il tarixdə qeyd olunan
" Qələbən mübarək, Azərbaycan əsgəri ! " adlı ədəbi - bədii gecə də çox təmtəraqla qeyd olundu.
Ağsaqqal sözünə daim ehtiyacımız var. Odur ki, ilk olaraq açılış üçün söz Qafqaz Müsəlmanları Ruhani İdarəsinin Qazisi, Tədqiqatçı alim, yazıçı - jurnalist, şair əziz qələm dostumuz Hacı Soltan Əlizadəyə verildi. Onun geniş, maraqlı və dolğun çıxışı məclis iştirakçıları tərəfindən çox maraqla dinlənməklə, hamıda ruh yüksəkliyi yaratdı. Hacımız 44 günlük müharibədən sonra 2 dəfə işğaldan azad olunmuş yurd yerlərimizə səfər etdiyini, gördüyü ürək sızladan mənzərələrdən, daşı - daş üstə qalmayan, alçaq dığalar tərəfindən vəhşicəsinə dağıdılmış viran kənd - şəhərlərimizdən və işğaldan sonra Ali Baş Komandan, Perzidentimiz, Cənab İlham Əliyevin şəxsi rəhbərliyi, daimi nəzarəti ilə sürətlə aparılan yenidənqurma və bərpa işlərindən, Mədəniyyət Mərkəzi elan olunmuş Şuşamızın bu günündən, yeni istifadəyə verilmiş Beynəlxalq səviyyəli Füzuli hava limanının qisa müddət ərzində açılışından danışdı.
Musiqi fonunda lal uşaqların işarələrlə himnimizi " oxumaları " hamının gözünü yaşartdı.
Himnin oxunuşundan sonra Hacı İntiqamın öz vəsaiti hesabına hazırlatdığı və heç bir kömək olmadan bu yaşda vətən sevgisi ilə öz əlləri ilə hazırladığı " Şəhidlər ölməz, Vətən bölünməz ! " adlı nəhəng şəhid lövhəsinin açılışı oldu.
Növbəli şəkildə çıxışlar bir - birini əvəz edirdi. Həmişə olduğu kimi, biz yenə də Hacı İntiqamı bir an belə oturan görmədik. Ahıl yaşında Hacı : - Siz mənim evimə gəlmisiniz, hər biriniz ayrılıqda mənim qonaqlarımsınız deyərək, yorulmadan təkbaşına sonadək ( həmişə olduğu kimi ) məclis iştirakçılarına gulluq göstərdi.
Onu da deyim ki, çağrılmayan qonaqlar da çox idi. Gələni qapıdan qovmazlar, elimizin adəti var. Amma belə bir atalar sözü də var axı bizdə..)))
" Çağrılan yerdən ərinmə, çağrılmayan yerdə görünmə ! " hələ bəzilərinin hərəkət və davranışlarını görüb xeyli atalar sözlərimizi yadıma saldım. Çox götür - qoy elədim, yeri var, amma hamısını demək olmur. Yenə nisbətən bəzilərini seçib yazmaq qərarına gəldim ki, gör - eşit dünyasıdır, həm də deyirlər ki, sözü at ortaya, yiyəsi götürəcək. Kaş götürəydilər...)))
"Ağır otur, batman gəl", "Danışmaq gümüşdürsə, susmaq qızıldır" , "Hər yazan molla Pənah olmaz", " Qanana bircə kəlmə, qanmayana min qandır", nə isə...
Yəni tədbirin adından da məlumdur ki, bu qələbə ətirli bayram tədbiri idi. Amma yəqin ki, məlumatları olmayan bəzi yurddaşlarımız nədənsə bu tədbiri ehsan süfrəsi ilə səhv salmışdılar.
Həəəə.. indi sizə nədən danışım bilmirəm, süfrə mədəniyyətindənmi, söz mədəniyyətindənmi, səsyayan ( mikrafon ) aclarınnanmı..)))
Ay əzizlərim, belə məclislərdə gərəkdir ki, sözə ac olasan.
Yoxsa bu qələm əhlinin bu qədər ( bəzilərinin ) ac olmalarını heç təsəvvür etməzdim.
Manqal başında xəlvət yeyib gələnlər, süfrəyə gətirilən ümumi dövrəni göydə qapanlar, yanlarında oturan abır - həyalı insanları fikirləşməyənlər, süfrədən yemək oğurlayanlar, cızma - qaralarını şeir bilib, bir - birinin ardınca çaşa - çaşa oxuyanlar, nə yazım daha, nələr..
Vallah bu tədbir barədə yazı hazırlamaq istəmirdim. Fikirləşdim ki, bəs belədirsə, mən ora niyə getmişdim ???
Yazmağı qərara aldım. Kaş biləydiniz ki, içimdə nələr yaşadım..
Gördüklərimi unutmaq istədim, dedim kiminsə qəlbimə toxuna bilər. Amma bu eybəcərliklərimizlə hər dəfə qarşılaşdığım üçün, yazmağı qərara aldım.
Yəqin ki, bu yazı çoxlarının ürəyincə olacaq. Kənardan necə görsəndiklərini bilməyən dostlarımız da əgər vicdanları varsa, mütləq bu cür ictimai yerlərdə özlərini mədəni, nəfislərini tox tutacaqlar və onu da götür - qoy edəcəklər ki, çox danışanda, adamın çox səhvi çıxma ehtimalı var.
Qaldı ki, bizim Hacı İntiqam qardaşımıza, o əsil Azərbaycan kişisidir. Bilin ki, evinin bir tərəfini söküb aparsanız belə, dilinə gətirib soruşmaz da.
Amma bizi insan bilib evinə çağırırsa, biz də Allah qarşısında insanlıq borcumuzu insan kimi yerinə yetirək ki, hərəkət və davranışımız ipək kimi bir incə qəlbə toxunmasın.
Di sağ olun.
Qələbəmiz mübarək, əziz vətən övladlarımız.
Dünya durduqca daim qəlblərdə yaşayan şəhidlərimizə rəhmət, yaralı qazilərimiə şəfa, bütöv Azərbaycanımıza qələbə coşqulu can sağlığı arzulayıram.
Qarabağ Azərbaycandır !
Tədbirdə yaxşı - pis hamının çıxışını istəməsək belə dinlədik. Heç mənə söz də verilmədi. Sonda özüm səsucaldan olmadan fəlsəfi bir şeir oxudum.
Sağ olsunlar, dəyərli qələm dostlarım, evə gələndən sonra, zəng edib şerə görə təşəkkürlərini bildirdilər. Amma tədbir üçün hazırladığım şeiri orada deyə bilmədiyim üçün burada diqqətinizə çatdırıram.

Q A Y I D I Ş I M I Z

Nə qədər həsrətli köçdü dünyadan ,
Torpaq deyə - deyə, yurd deyə - deyə.
Torpaq səs göndərdi, uçan durnadan,
Toy - bayram olacaq, qayıdışımız.
XXX
Sanmayın o yerlər bağça - bağlıdır,
Düşmən taptağından qəlbi dağlıdır.
Tələsmə el oğlu, yollar bağlıdır,
Toy - bayram olacaq, qayıdışımız.
XXX
Yenə açılacaq lalə, qızıl gül,
Mehə naz edəcək, həm xarı bülbül.
Gül nazın yenə də çəkəcək bülbül,
Toy - bayram olacaq, qayıdışımız.
XXX
Gözləri güləcək, buz bulaqların,
Cığırı ağarar, dağ - yaylaqların.
Dost payı olacaq balın - qaymağıın,
Toy - bayram olacaq, qayıdışımız.
XXX
Təbiət dağlara qar ələyəcək,
Hamı subaylara toy diləyəcək.
Bizləri gözləyir xoşbəxt gələcək,
Toy - bayram olacaq, qayıdışımız.
XXX
Bir vaxt gəncliyimi qoyub getmişəm,
30 illik ömrə, çox zülm etmişəm.
İndi arzulara, kama yetmişəm,
Toy - bayram olacaq, qayıdışımız.
XXX
Yenə bulaq üstə kəsilər quzu,
Kəklikotu ilə, səpilər duzu.
Qaranquş həsrətlə gözləyər yazı,
Toy - bayram olacaq, qayıdışımız.
XXX
Yenə göz oxşayar, bağların barı,
Əlvan çiçəkləri öpəcək arı.
Abil qonaq gələr, gəzər dağları,
Toy - bayram olacaq, qayıdışımız !