Bu sayda müsahibim Azərbaycan muğam ifaçılığı sənətində özünəməxsus səs tembri ilə seçilən, daim gənclərin bəhrələndiyi Respublikanın əməkdar müəllimi, dəyərli pedaqoq, Xanəndə Qəzənfər Abbasovdur. Sevindirici haldır ki, 2003-cü ildə Azərbaycan muğamı YUNESKO tərəfindən, bəşəriyyətin şifahi ənənəli mənəvi şedevrləri siyahısına daxil edilmişdir.
Muğam sənətinin ölkəmizdə inkişafında, təbliğatında, tədrisində böyük əməyi, əziyyəti olan, Azərbaycan incəsənət və mədəniyyətinə pedaqoji fəaliyyəti ilə yüzlərlə muğamımızı təbliğ edən sənətkar tələbələr yetişdirən, nadir təbii səsi, güclü nəfəsi, yüksək, peşəkar ifaçılıq məharəti ilə sayılıb-seçilən pedaqoq Qəzənfər Abbasovdur.

Qəzənfər Abbasov 1962-ci il mart ayının 4-ü Ağcabədi rayonunun Hacılar kəndində dünyaya göz açmışdır. O, gənclik illərində bir çox respublika miqyaslı müsabiqə, festivalların iştirakçısı olmuş, 1987-ci ildə Cabbar Qaryağdıoğlu adına muğam müsabiqəsinin diplomuna, 1992-ci ildə isə bu müsabiqənin qalibi adına layiq bilinmişdir.
1991-ci ildə Asəf Zeynallı adına Musiqi Texnikomunda məşhur pedaqoq xanəndə Nəriman Əliyevin sinfində təhsilini başa vuran Qəzənfər Abbasov 1993-1997-ci illərdə Azərbaycan Dövlət Konservatoriyasında (indiki Bakı Musiqi Akademiyasında) professor Arif Babayevin sinfində təhsil almışdır. Pedaqoq kimi Dövlət Muğam Teatrının nəzdindəki muğam studiyasında, eləcə də 2001-ci ildən bu günə kimi Milli Konservatoriyada baş müəllimlik fəaliyyəti ilə mədəniyyətimizə xidmət etmişdir. Qəzənfər müəllim 1999-2011-ci illər ərzində Bülbül adına Orta İxtisas Musiqi Məktəbində işləmiş, 2000-ci ildən indiyə qədər Asəf Zeynallı adına Musiqi Kollecində və 2011-ci ildən Mədəniyyət və İncəsənət Universitetində baş müəllim kimi çalışır. Respublikanın əməkdar artisti Sevinc Sarıyeva, Mütəllim Dəmirov, eləcə də 2011-ci il Muğam müsabiqəsinin qalibi Səbinə Ərəbli, Nigar Şabanova olmaqla bir çox tanınmış xanəndələr məhz Qəzənfər Abbasov pedaqoji fəaliyyətinin yetirmələridir. Təhsildəki uğurlarına görə o, 2011-ci ildə "Azərbaycan Respublikasının qabaqcıl təhsil işçisi" döş nişanı ilə təltif edilmişdir. Qəzənfər müəllim dəfələrlə Türkiyə və İran olmaqla bir çox ölkələrdə qastrol səfərlərində olmuşdur. O, İraqda IX ümumdünya Babil festivalında iştirak etmiş və 1999-cu ildə Səmərqənddə "Şərq təranələri" beynəlxalq festivalında xüsusi mükafata layiq görülmüşdür. Qəzənfər Abbasovun ifa etdiyi 10-dan artıq muğam dəsgahı tarzən Valeh Rəhimov və kamança ifaçısı Arif Əsədullayevin müşayiəti ilə "Güney Azərbaycan" telekanalı vasitəsilə bütün dünyaya yayımlanmışdır.Onun ifasındakı "Arazbarı", "Ovşarı", "Heyratı" ritmik muğamları hərkəs tərəfindən sevilir. Qəzənfər müəllimin bu ifaları Seyid Şuşinskinin ifaları ilə demək olar ki,eynidir. 1997-ci ildə xanəndə Nəriman Əliyev bildirmişdir ki, Azərbaycan muğam sənətinin tədrisi və ifaçılığında Seyid üslubu və ənənəsinin davam etməsi üçün müəllim kimi məhz Qəzənfər Abbasov lazımdır.

Dövlət televiziyası tərəfindən Seyid Şuşinski haqqında çəkilən sənədli filmdə S.Şuşinskinin orta yaşlarındakı obrazını yaratmaq Qəzənfər Abbasova tapşırılmış, o da bunun öhdəsindən məharətlə gəlmişdir. Qəzənfər Abbasovun ifasında bütün muğamlar bir ustad kimi gözəl ifa edilib, ancaq “Şüştər" və “Bayatı-şiraz” muğamlarına mən deyərdimki, ustad xüsusi öz möhürünü vurub. Qəzənfər Abbasovun ifa etdiyi “Şüştər” muğamını dinləyən xanəndə-pedaqoq Nəriman Əliyev tələbəsi Qəzənfərə: "Bundan sonra heç nə oxumasan da, "Şüştər"in şöhrəti sənə bəsdir!"- demişdir.

Qəzənfər Abbasov: "Mən efir teleməkanında elə muğam dəsgahı var ki, onu ən azı 7 dəfə ifa etmişəm. Bütün muğamları dəsgah olaraq ifa etmişəm. Bir tək efirdə oxumadığım “Heydəri” zərb muğamı olub. "Günaztv"-də 11 muğam dəsgahım izahlı
şəkildə ifa olunaraq çəkilib, hansı ki, bütün türk dünyası o materiallardan hal-hazırda istifadə edir. Yaradıcılıq o qədər canıma hopub ki, pedaqoq, xanəndə olmağıma baxmayaraq, həmçinin öz şer və qəzəllərim, mənə aid olan təsniflərim və mahnılarım var. Bu arada onu da qeyd etmək istəyirəm ki, 1994-cü il aprel ayının 2-si ilk dəfə Azərbaycanda “Nəva” muğam dəsgahını mən ifa etmişəm. Azərbaycan “Nəva” muğamını da 2002-ci ildən hazırlamışam. Tezliklə, onu da elə Valeh Rəhimovla ifa etməyə hazırlaşıram.

Pedaqoq-xanəndə - sənətinin, ustadlığının ən məhsuldar yaşlarını yaşayan Qəzənfər Abbasova möhkəm can sağlığı, böyük sənət uğurları və nəaliyyətləri arzulayırıq. Sənətkarla müsahibədə qəlbimdən bir arzu da keçdi - ən yüksək fəxri adlar məhz belə sənətkarlara verilməlidir. Nə deyək, ustada uğur qismət olsun, tarix də belə pedaqoqları yaşatsın və sənətini gələcək nəsillərə ötürə bilsin.