Azərbaycanın dilbər guşəsi, şərqin qapısı adlandırılan Bərdənin elə tarixi qədər də zəngin mədəniyyəti və bu mədəniyyəti özündə ehtiva edən abidələri var ki, mənəvi zənginliyi ilə insanı valeh edir. Bu gözəl diyarın indiyədək qorunan tarixi abidələrinin biri də Bərdə Cümə məscididir. Məscid 1905-ci ildə inşa edilib. Tarixi mənbələrdə göstərilir ki, 1873-cü ildə Yelizavetbol quberniyasının tərkibində Cavanşir qəzası yaradılıb. 1929-cu ilədək fəaliyyət göstərib. Mərkəzi Tərtər olub. Bərdə şəhəri də bu qəzanın tərkibində olub. Mənbələrdə göstərilir ki, Qəzanın Bərdə nümayəndəsi Səməd ağa imiş. Əhali məscid tikilməsi üçün ona müraciət etmişlər və məscidin tikilməsində imkanlı şəxslər 1859-1920-ci illərdə yaşamış Məşədi Mehdi, o cümlədən Namaz və Zaman qardaşları köməklik göstərmişlər.Məsciddə yanğın baş verdiyindən 1920-1930-cu illərdə təmir işləri aparılmışdır. O vaxtdan isə məscid öz tarixi duruşunu qoruyub saxlamaqdadır. Hər daşında bir tarix yatan bu möhtəşəm dini kompleks inşa ediləndən bu yana araşdırmaçılar, tarixçilər və sadə vətəndaşlar tərəfindən müntəzəm ziyarət olunur. Məscid hal-hazırda da ibadət edən inanclı insanların xidmətindədir