1 avqust İsveçrənin Müstəqillik günüdür. Mərkəzi Avropada yerləşən bu ölkə 1291-ci ildən suveren dövlət kimi mövcuddur.
1473 — Uğurlu Məhəmmədin rəhbərlik etdiyi Ağqoyunlu ordusu Osmanlı ordusunu Malatya döyüşündə məğlub etdi.
1571 — Türklərin Kipri fəth etməsi başa çatdı. Ada təxminən 300 il boyu Osmanlı imperatorluğunun tərkibində qaldı.
Məşhur fransız təbiətşünası Jan Batist Lamark 1744-cü ilin bu günü anadan olub. Paris Elmlər Akademiyasının üzvü olan Lamarkın 1778-ci ildə Fransa florasına dair 3 cildlik əsəri çapdan çıxıb, 1793-cü ildə onun təklifi ilə Kral Botanika bağı Təbiət Tarixi Muzeyinə çevrilib. İlk dəfə Lamark heyvanlar ailəmini onurğalılar və onurğasızlar qruplarına bölüb. Jan Batist Lamark həmçinin geologiya, hidrologiya və meterologiyaya dair kitabların müəllifidir. (1744-1829)
1876 — Kolorado ABŞ-ın 38-ci ştatı kimi qəbul edildi.
1 avqust 1902-ci ildə Amerika Birləşmiş Ştatları Panama kanalının haqqlarını Fransadan satın alaraq inşaata başladı.
1 avqust tanınmış Azərbaycan yazıçısı Seyid Hüseynin xatirə günüdür. O, Bakıda Rus-Müsəlman Məktəbini bitirdikdən sonra “Təzə həyat” və “Kaspi” qəzetlərinin mətbəələrində mürəttiblik edib, “Bəhlul”, “Kəlniyyət” jurnallarını buraxıb, “İqbal” qəzetinin baş redaktoru olub, bir sıra kitabları çıxıb. Seyid Hüseyn 1938-ci il repressiya qurbanı olub və güllələnib. (1887-1938)
1941 — İlk Jeep avtomobili istehsal olundu.
1944 — Varşavada nasist işğalına qarşı 2 ay davam edən üsyan başladı.
1960 — Benin(Qərbi Afrikada dövlət) Fransadan müstəqilliyini elan etdi.
1 avqust tanınmış Azərbaycan bəstəkarı Qəmbər Hüseynlinin xatirə günüdür. Mahnı və romansları lirizmi, milli musiqi və poeziya ilə üzvi əlaqəsi, yeni intonasiyaları ilə fərqlənən Qəmbər Hüseynlinin “Cücələrim” mahnısı dünya sərhədlərini aşaraq məşhurlaşıb və bu gün də sevilərək oxunur. (1916-1961)
1975 — Helsinkidə Avropa təhlükəsizlik və əməkdaşlıq müqaviləsi imzalandı. Hazırda ATƏT – yəni Avropada Təhlükəsizlik və Əməkdaşlıq Təşkilatı adlanan bu qurumun Minsk qrupu Ermənistan-Azərbaycan – Dağlıq Qarabağ münaqişəsinin nizamlanması istiqamətində vasitəçi rolu öz üzərinə götürüb. Azərbaycan ATƏT-ə 1992-ci il iyunun 10-da daxil olub.
Azərbyacan prezidenti Heydər Əliyevin imzaladığı 9 avqust 2001-ci il tarixli 552 nömrəli fərmanla hər il 1 avqust ölkədə Azərbaycan Əlifbası və Azərbaycan Dili günü olaraq qeyd edilir. Məhz həmin vaxtdan respublikanın bütün idarə və təşkilatlarında, o cümlədən mətbuatda latın qrafikalı Azərbaycan əlifbası işlənir.
