1 avqust Azərbaycan Əlifbası və Azərbaycan Dili Günüdür. Əlamətdar gün Prezident Heydər Əliyevin fərmanı ilə 2001-ci ildə təsis edilib.

Azərbaycan müstəqilliyini bərpa edəndən sonra, 1991-ci ilin dekabrında latın qrafikalı əlifbaya keçid barədə qərar qəbul edilsə, onun faktiki icrası illərlə uzanmışdı.

18 iyun 2001-ci ildə Prezident Heydər Əliyev "Dövlət dilinin işlənməsinin təkmilləşdirilməsi haqqında" fərman imzaladı. Fərmana əsasən, 2001-ci il avqustun 1-dən etibarən ölkədə Azərbaycan dilində olan bütün çap məhsulları, eləcə də respublikanın bütün idarə-müəssisələrində rəsmi yazışmalar bütünlüklə latın qrafikalı əlifbaya keçdi

On ilə yaxın davam edən latın qrafikalı Azərbaycan əlifbasına keçid həmin tarixdə başa çatdı. Bununla Azərbaycan əlifbasının 62 illik “kiril dövrü” tarixə qovuşdu.

Bu, Azərbaycanın ictimai-siyasi həyatında, yazı mədəniyyətimizin tarixində mühüm hadisə idi.

Prezident Heydər Əliyevin 2001-ci il 9 avqust tarixli fərmanı ilə 1 avqust “Azərbaycan Əlifbası və Azərbaycan Dili Günü” elan edildi.

Ana dilimizin və əlifbamızın bayramı bu dildə danışan, düşünən, yaşayan hər birimiz üçün hər gün, hər an bizimlə olan bayramdır.