1821-ci il 11 noyabr tarixində rus yazıçı, dünya ədəbiyyatının ən böyük yazıçılarından biri Fyodor Dostoyevski anadan olub (1821-1881). F.Dostoyevskinin ilk romanı “Bədbəxt insanlar” 1846-cı ildə nəşr olunub. Bu əsərinin ardından yazdığı kitablarla gözlədiyi müvəffəqiyyətə çata bilməyən Dostoyevskinin ümidi qırılır və o, siyasətlə maraqlanmağa başlayır. 1849-cu ildə dövlət əleyhindəki bir sui-qəsdə qarışdığı iddiası ilə həbs olunub. Səkkiz ay həbsxanada qalan Dostoyevski, güllələnmək düzülmək üzrəykən digər səkkiz məhbus yoldaşı ilə bağışlanılaraq cəzasını çəkməsi üçün Sibirdəki OMSK həbsxanasına göndərilib. Burada keçirdiyi dörd ildən sonra xidmətə verilib və zabitliyə qədər yüksəlib. 1859-cu ildən Peterburqda yaşayan yazıçı burada “Alçaldılmış və təhqir olunmuşlar” həmçinin, “Ölü evdən qeydlər” əsərlərini yazır. O, təkcə bu əsərləri ilə yox, eyni zamanda, “Cinayət və cəza”, “Qumarbaz”, “İdiot”, “Karamazov qardaşları” əsərləri ilə dünyaya səs salıb. F.Dostoyevskinin adı tarixdə 100 ən çox öyrənilmiş şəxsiyyətlər siyahısına daxil edilib.
1889-cu il 11 noyabr tarixində Vaşinqton ABŞ-ın 42-ci ştatı oldu.
11 noyabr 1914-cü ildə Osmanlı imperiyası Antanta dövlətlərinə rəsmi olaraq hərb elan etdi.
11 noyabr 1918-ci ildə Almaniya ilə Antanta dövlətləri arasında Birinci Dünya müharibəsini başa çatdıran müqavilə imzalandı. 1914-cü il iyulun 28-də başlayan, dörd il davam edən müharibənin nəticəsində Antanta tərəfindən 5. 953 372 nəfər həlak olub, 4. 000 676 nəfər itkin düşüb. İttifaq dövlətlərinin verdiyi itki 4. 043 397 nəfər, itkin düşənlərin sayı isə 3. 470 138 nəfər olub.
1921-ci il 11 noyabr tarixində xalq şairi, “Şöhrət” ordenli Balaş Azəroğlu anadan olub (1921-2011). Şairin ilk mətbu şeri "Dnepr" 1937-ci ildə Bakıda çapdan çıxıb. Şairin ilk şeir kitabları 1943-cü və 1945-ci illərdə Ərdəbildə və Təbrizdə nəşr olunub. Çoxcildlik “Azərbaycan ədəbiyyatı”nın müəlliflərindən biri olan B.Azəroğlu, farscadan dilimizə çevirdiyi, Nizaminin “Yeddi gözəl” poemasını, Füzulinin qəzəllərini çap etdirib. B.Azəroğlu “Mübarizə yollarında” (1950), “Gənclik dostlarım” (1950), “Mənim nəğmələrim” (1952), “Səhər şəfəqləri” (1953) və digər əsərlərin müəllifidir.
1934-cü il 11 noyabr tarixində Azərbaycanın xalq artisti, “Şöhrət” ordenli İslam Rzayev anadan olub (1934-2008). Qarabağ xanəndəlik məktəbinin layiqli davamçılarından olan İ.Rzayev peşəkar musiqi təhsilini Bakıda Azərbaycan Dövlət Musiqi Məktəbində (indiki Bakı Musiqi Kolleci) Seyid Şuşinskinin sinfində alıb. Müğənninin böyük məharətlə oxuduğu “Çahargah”, “Bayatı-Kürd”, “Mahur-Hindi”, “Rast” muğam dəstgahları AzTV-nin musiqi fonduna daxil edilib. İ.Rzayev “Gəl inad etmə”, “Dağlar başı”, “Almadərən” kimi bir sıra mahnılar da bəstələyib. O öz yaradıcılığında bəstəkar əsərlərinə də müraciət edib. Cahangir Cahangirovun “Nəsimi”, “Aşıq Alı” və s. kantatalarında solo partiyanı ifa edib. İyirmi ilə yaxın Muğam Teatrının bədii rəhbəri vəzifəsində çalışmış Xalq Artisti 120-dək gənc ifaçı yetişdirib.
1938-ci il 11 noyabr tarixində İsmət İnönü Türkiyə prezidenti seçildi.
1942-ci il 11 noyabr tarixində Müttəfiqlər tərəfindən Şimali Afrikada hərbi cəbhənin açılmasına cavab olaraq Faşist Almaniyası Fransanın cənub hissəsini işğal etdi.
1944-cü il 11 noyabr tarixində Türkiyənin məşhur kino və teatr aktyoru Kamal Sunal anadan olub (1944-2000). Əsasən komediya janrında filmləri ilə tanınan aktyor xalq arasında Şaban adı ilə məşhurlaşıb. Yaradıcılıq fəaliyyəti dövründə 82 filmdə çəkilən K.Sunal əsasən saf, təmiz qəlbli xarakterləri canlandırıb.
11 noyabr 1947-ci ildə Türkiyə Beynəlxalq Valyuta Fonduna (BVF) üzv oldu.
1948-ci il 11 noyabr tarixində Mingəçevir şəhər statusu alıb. Kür çayının sahillərində yerləşən Mingəçevir əhalisinin sayına görə Azərbaycanın dördüncü böyük şəhəridir.
1951-ci il 11 noyabr tarixində Azərbaycan aktyoru, Xalq Artisti İsmayıl Hidayətzadə vəfat edib (1901-1951). Aktyorluqla yanaşı, rejissorluğa da maraq göstərən İ.Hidayətzadənin quruluş verdiyi “Koroğlu” və “Arşın mal alan” tamaşaları 1938-ci ildə Moskvada keçirilən Azərbaycan mədəniyyəti günlərində böyük uğur qazanıb. Teatr tənqidçilərinin bəyəndiyi "Siyavuş"dan sonra o, Opera və Balet Teatrında "Koroğlu" və "Karmen" operalarını səhnələşdirib, Rus Dram Teatrında "1905-ci ildə" və "Vaqif" tamaşalarını qoyub. İ.Hidayətzadə Moskvadan qayıdandan sonra Opera və Balet Teatrının rəhbəri təyin edilib. Cəfər Cabbarlı məhz İ.Hidayətzadə üçün rollar yazar, İsmayıl isə bir qayda olaraq, öz rollarının prototipini axtararmış. O, ilk milli baletimizin -"Qız qalası"nın librettosunu yazıb. Opera studiyası onun səyi ilə yaradılıb. Bütün ömrü boyu teatrda çalışan sənətkar "Qız qalası" (1923), "Altıncı duyğu" (1935) və "Almaz" (1936) filmlərində də çəkilib. 2001-ci ildə aktyorun 100 illik yubileyi təntənə ilə qeyd edilib.
1965-ci il 11 noyabr tarixində Afrikanın sonuncu ingilis müstəmləkəsi olan Rodeziya birtərəfli qaydada müstəqilliyini elan etdi.
1971-ci il 11 noyabr tarixində Amerika Birləşmiş Ştatları Okinava adasını Yaponiyaya qaytardı.
11 noyabr 1973-cü ildə İsrail ilə Misir arasında Yom Kippur hərbini başa çatdıran atəşkəs imzalandı.
1976-cı il 11 noyabr tarixində Türkiyə SSRİ-dən elektrik enerjisi almaq üçün 10 illik müqavilə imzaladı.
1993-cü il 11 noyabr tarixində BMT Təhlükəsizlik Şurası erməni qoşunlarının işğal olunmuş Azərbaycan rayonlarından çıxarılmasını tələb edən 884 saylı qətnaməni qəbul etdi.
11 noyabr 2004-cü ildə Fələstin Azadlıq Təşkilatı lideri və Fələstin dövlətinin ilk dövlət başçısı Yasər Ərəfat müalicə olunduğu Fransada dünyasını dəyişdi. Ərəfatın cənazəsi Qahirədə keçirilən mərasimdən sonra Ramallahda dəfn olundu. Ərəfatın ölümündən sonra Mahmud Abbas əvvəl Fələstin Azadlıq Təşkilatı lideri sonra da Fələstin dövləti başçısı oldu.
11 noyabr 2005-ci ildə İslamiyyətin ilk dövrlərini şərh edən “Çağırış” və Liviya müqavimətinin simvol adı Ömər Muhtarın həyatını uyğunlaşdırdığı filmilə dünya miqyasında şöhrət qazanan Mustafa Akkad 75 yaşında Ammanda vəfat etdi.
11 noyabr - Dünya Enerjiyə Qənaət Günüdür. Bu tarix 2008-ci ilin aprel ayında Qazaxıstanda keçirilən SPARE əlaqələndiricilərinin beynəlxalq müşavirəsində “Resurslar və enerjinin istifadəsi üzrə məktəb layihəsi” (SPARE) beynəlxalq ekoloji şəbəkəsinin təşəbbüsü ilə təsis olunub. 2008-ci ilin noyabrında ilk dəfə Dünya Enerjiyə Qənaət Günü qeyd edilib. İyirmi ölkənin qatıldığı layihə beynəlxalq status qazanıb.
11 noyabr - Dünya Şopinq Günüdür. Bu günün qeyd olunması 2009-cu ildə Çinin “Alibaba Group” internet şirkətinin “Dünya Şopinq Günü” devizi altında təşkil etdiyi 50 faizlik endirim aksiyasının keçirilməsi ilə başlanıb. Tezliklə bu aksiyaya Çinin bir çox iri online satış şirkətləri qatılıb və bu günün qeyd olunması ənənə halını alıb. 2013-cü ilin bu günü “Alibaba Group” internet şirkətinə 5.8 milyard ABŞ dolları qazandırmaqla tarixin ən çox gəlir gətirən ucuz qiymətlərlə online satış sutkası adını alıb.
11 noyabr 2016-cı ildə PKK-lı terrorçuların bombalı hücumu nəticəsində ağır yaralanan Mardin şəhərinin Derik qəsəbəsinin icra başçısı Fateh Safitürk şəhid oldu.
