1667-ci il 30 noyabr tarixində məşhur irland yazıçısı Conatan Svift anadan olub (1667-1745). Yaradıcılığında yaşadığı dövrün çətinliklərini, insanların istismara məruz qalmasını tənqid edən C.Sviftin 1726-cı ildə yazdığı “Qulliverin səyahəti” kitabı ona dünya şöhrəti qazandırıb.
1786-cı il 30 noyabr tarixində Toskana Hersoqluğu ölüm hökmünü ləğv edən ilk müasir dövlət kimi tarixə düşüb. Bu tarix 2002-ci ildən etibarən ölüm hökmünün ləğv edildiyi şəhərlər günü kimi beynəlxalq səviyyədə qeyd olunur. Hazırda bu siyahıya 90 ölkədən 2 mindən artıq şəhər daxil edilib.
1835-ci il 30 noyabr tarixində dünyanın ən məşhur yazıçılarından biri, amerikalı Mark Tven anadan olub (1835-1910). Əsl adı Samuel Lanqhorn Klemens olan yazıçı oxuculara daha çox “Haklberri Finin sərgüzəştləri” və “Tom Soyerin macəraları” romanları ilə tanışdır. Mark Tven bir çox məşhur aforizmlərin müəllifi kimi də tanınır.
1840-cı il 30 noyabr tarixində Napoleon Bonapartın cəsədinin qalıqları Müqəddəs Yelena adasından Parisə gətirildi.
30 noyabr 1853-cü ildə Krım müharibəsi (1853–1856) gedişində Rusiya və Osmanlı donanmaları arasında Sinop döyüşü olub. Bu, dəniz müharibələri tarixində yelkənli gəmilərin iştirak etdiyi sonuncu döyüş idi. Sinop buxtası yaxınlığındakı döyüşdə Rusiya donanması qələbə çalıb. Bununla belə, Rusiya Krım müharibəsini uduzdu.
1872-ci il 30 noyabr tarixində Qlazqo şəhərində Şotlandiya və İngiltərə komandaları arasında dünyada ilk beynəlxalq futbol matçı keçirilib. Dörd minədək azarkeşin izlədiyi oyun 0:0 hesabı ilə başa çatıb.
1874-cü il 30 noyabr tarixində Böyük Britaniyanın məşhur dövlət xadimi, ölkənin sabiq Baş naziri, Nobel mükafatı laureatı Uinston Çörçil anadan olub (1874-1965). Marlboro hersoqları nəslindən olan U.Çörçil müxtəlif illərdə bir sıra nazirliklərə rəhbərlik edib. Hərbi nazir vəzifəsində olarkən geniş miqyasda tank istehsalı ilə bağlı proqramı həyata keçirdiyi üçün “Tankların atası” ləqəbini qazanır. İkinci Dünya müharibəsi illərində Böyük Britaniyanın Baş naziri kimi faşizmə qarşı mübarizədə qətiyyətli mövqe tutur. U.Çörçil BMT-nin ideya müəllifi hesab olunur.
1900-cü ilin 30 noyabr tarixindә yazıçı Oskar Vayld Parisdә vәfat edib. İntihar edәn yazıçı qaldığı holeldәki otağının divarına ‘‘birimiz gelmәliyik’’ sözlәrini yazıb.
1925-ci ilin 30 noyabr tarixindә Türkiyәdәki mәqbәrәlәr bağlandı. Qanunla icazәsiz dini geyim geyinmәk dә qadağan olundu. Eyni gün Türkiyә Böyük Millәt Mәclisinin sәdrinin arxasındakı divara ‘‘Suverenlik xalqındır’’ sözlәri yazıldı. Mustafa Kamal Atatürk Kastamonuda etdiyi çıxışında deyib: ‘‘Türkiyә Cümhuriyyәti şeyxlәr vә dәrvişlәr ölkәsi ola bilmәz. Әn doğru tәriqәt mәdәniyyәtdir’’.
30 noyabr 1939-cu ildə SSRİ ilə Finlandiya arasında müharibə başlanıb. Müharibəyə səbəb SSRİ-nin Karel zolağını (indiki Leninqrad vilayətinin bir hissəsi) Finlandiyadan (1918-ci ilədək Rusiya imperiyasının tərkibində olub) geri almaq niyyəti idi. SSRİ müharibəni bir-iki həftəyə bitirməyi planlaşdırsa da, istəyinə 4 ay sonra və böyük itkilər hesabına nail oldu. 1940-cı il martın 12-də imzalanan sülh sazişi ilə Finlandiya bu bölgəni SSRİ-nin ərazisi kimi tanıdı.
1974-cü ilin 30 noyabr tarixindә Efiopiyada 3.2 milyon il әvvәl yaşamış insana aid skelet aşkar edilib. ‘‘Lusi’’ adlandırılan skeletin 105 santimetr uzunluğunda olduğu bildirilib.
1982-ci il 30 noyabr tarixində tarixdə ən çox satılan musiqi albomu olan Maykl Ceksonun "Thriller" solo albomu satışa çıxarıldı.
1990-cı il 30 noyabr tarixində şahmat üzrə hazırkı dünya çempionu norveçli Maqnus Karlsen anadan olub. On üç yaşında qrossmeyster olan M.Karlsen bu baxımdan şahmat tarixində üçüncüdür. 2013-cü ildən dünya çempionu titulunu özündə saxlayan M.Karlsen 2014-cü ilin mayında şahmat tarixində ən yüksək əmsalı (2882) toplayıb.
1998-ci il 30 noyabr tarixində ABŞ-ın iki nəhəng şirkəti - “Exxon” və “Mobil” arasında birləşmək haqqında müqavilə imzalanıb. Birləşdikdən sonra ümumi kapitalı 73,7 milyard dollara çatan “ExxonMobil” dünyanın ən böyük şirkətinə çevrilib.
