336-cı il 25 dekabr tarixində Tarixdə ilk dəfə Romada "Yeni il" qeyd edildi.
800-cü il 25 dekabr tarixində Frank hökmdarı Böyük Karl taxta çıxdı.
Bütün Hindistan Müsəlman Birliyi və Pakistan müstəqillik mübarizəsinin öndəri, eyni zamanda Pakistanın qurucusu və ilk dövlət başçısı Məhəmməd Əli Cinnah 1876-cı ilin bu günü Karaçidə dünyaya gəlib. (1876 - 1948)
1918-ci il 25 dekabr tarixində peşəkar hərbçi, çar ordusunun generalı Səməd bəy Mehmandarov hərbi nazir, general-leytenant Əliağa Şıxlinski nazir müavini, Həbib bəy Səlimov isə Baş qərargah rəisi təyin ediliblər. Azərbaycan Xalq Cümhuriyyəti hökumətinin qərarı ilə 1918-ci il iyunun 26-da ilk hərbi hissə - əlahiddə korpus yaranıb. Bunun ardınca orduya çağırış haqqında fərman verilib. Qısa müddətdə 30 minlik ordu formalaşdırılıb. Milli Ordu Osmanlı imperiyasının Qafqaz İslam Ordusu ilə birlikdə 1918-ci il sentyabrın 15-də Bakını erməni-bolşevik işğalından azad edib və sentyabrın 17-də Azərbaycan milli hökuməti Gəncədən Bakıya köçüb.
1919-cu ilin sonunda beynəlxalq şəraitin yeni yaranmış respublikaların xeyrinə dəyişdiyini nəzərə alan Versaldakı Azərbaycan nümayəndələri cümhuriyyətin Millətlər Cəmiyyətinə qəbul edilməsi barədə memorandum hazırlayaraq cəmiyyətin katibliyinə təqdim etdilər. Dekabrın 25-ində Beynəlxalq Millətlər Cəmiyyətinin Katibliyində Azərbaycanın müraciətini öyrənmək üçün xüsusi komissiya yaradıldı.
1925-ci il 25 dekabr tarixində Beynəlxalq təqvim və saat qəbul edildi.
Tanınmış tənqidçi, şair və publisist Famil Mehdi 1934-cü ilin bu günü anadan olub. O, Azərbaycan (Bakı) Dövlət Universitetinin filologiya fakültəsini bitirib və həmin ali məkltəbdə filologiya və jurnalistika fakültələrində ömrünün sonunadək dərs deyib. Fəal pedoqoji, elmi və ictimai fəaliyyətlə məşğul olan Famil Mehdi onlarla bədii və elmi-publisistik kitabların müəllifidir. (1934-2003)
Türkiyə cümhuriyyətinin ikinci başçısı, Mustafa Kamal Atatürkün ən yaxın silahdaşı və dostu, Atatürkdən sonra 35 il boyu Cümhuriyyət Xalq Partiyasının (CHP) sədri olmuş İsmət İnönü 1973-cü ilin 25 dekabrında Ankarada 89 yaşında dünyasını dəyişib. (1884 - 1973)
1975-ci il 25 dekabr tarixində Bakı Məişət Kondisionerləri zavodu işə salındı.
25 dekabr məşhur Amerika aktyoru və rejissoru Çarli Çaplinin xatirə günüdür. Səkkiz yaşından səhnəyə çıxan Çarli 1907-1912-ci illərdə Pantomim Truppasında istedadlı komediya aktyoru kimi püxtələşib. 1914-cü ildən həm də rejissor kimi tanınan aktyor “Səfil”, “İş”, “Müzik-holl axşamı”, “Avantürist”, “İt günü” və “Balaca” filmləri ilə dünya kino-komediya janrını kamilləşdirməyə nail olub. Çarli Çaplin yaradıcılığında qritesk və parodiya üslubları, xalq teatrı və sirk sənətinin ifadə vasitələrindən istifadə edib. (1889-1977)
25 dekabr 1979-cu ildə Sovet İttifaqı hərbi kontingentinin Əfqanıstana yeridilməsinə başlanılıb. 1978-ci ildə qurulmuş Əfqanıstan Demokratik Respublikası (ƏDR) ilə SSRİ arasında əməkdaşlıq haqqında müqavilənin icrası və Əfqanıstan İnqilabi Şurasının sədri olan Hafizulla Əminin fəaliyyəti SSRİ-ni qane etmirdi. ƏDR rəhbərliyində Əminə müxalif qüvvələrin müraciəti və sözügedən müqavilə əsas götürülərək Əfqanıstana ordu yeridildi. Dekabrın 27-də “Alfa” qrupu Kabildəki Prezident sarayını ələ keçirdi, H.Əmin qətlə yetirildi. “KQB”nin adamı Bəbrək Karmal ölkənin rəhbəri elan edildi.
1989-cu il 25 dekabr tarixində Rumıniyada xalq üsyanı ilə iqtidardan salınan ölkə prezidenti Nikolay Çavuşeski və həyat yoldaşı Yelena Çavuşeski güllələnərək edam edildi.
25 dekabr 1991-ci ildə SSRİ-nin Prezidenti Mixail Qorbaçov vəzifəsindən istefa verib. Moskva vaxtı ilə saat 19:00-da Mərkəzi Televiziyanın birbaşa efirində çıxış edən Qorbaçov Müstəqil Dövlətlər Birliyinin elan edilməsindən sonra bu vəzifədə qalmasının qeyri-mümkün olduğunu deyib. Saat 19:38-də Kreml üzərində SSRİ-nin bayrağı endirilib və Rusiyanın üçrəngli bayrağı qaldırılıb.
25 dekabr 1991-ci ildə Prezident Ayaz Mütəllibov “Latın qrafikalı Azərbaycan əlifbasının bərpası haqqında” fərman verib. Yeni əlifbaya keçid bir neçə ilə başa çatmalı idi. Lakin bu proses çox uzandı. 2001-ci il iyunun 18-da Prezident Heydər Əliyev latın qrafikalı əlifbaya keçidin başa çatdırılması barədə fərman imzaladı və həmin il avqustun 1-dən proses tam həyata keçirildi.
25 dekabr 1991-ci ildə Azərbaycan Parlamenti – Ali Sovetin Milli Şurası 31 dekabrın “Dünya azərbaycanlılarının həmrəyliyi günü” elan olunması barədə qərar qəbul edib.
1992-ci il 25 dekabr tarixində Azərbaycan Respublikasının ali məktəblərinə qəbulun test imtahanları vasitəsilə aparılması haqqında qərar qəbul edildi.
25 dekabr 2016-cı ildə Suriyadakı Rusiya hərbi bazasına getmək üçün Soçidən uçan hərbi təyyarə Qaradənizə düşdü. Hadisədə 92 adam həyatını itirdi.
