1700-cü ilin 26 yanvarında Şimali Amerikanın Sakit Okean sahillərində təxminən 9 bal gücündə zəlzələ baş verdi. "Kaskadya" adı verilən bu zəlzələ min kilometrlik bir xətt cızdı. Yaponiya sahillərinə qədər uzanan, nəhəng sunami fırtınasına gətirib çıxaran zəlzələdə həyatını itirənlərin sayı tam təsbit edilə bilmədi.
26 yanvar 1788-ci ildə Avstraliya Böyük Britaniya imperiyasının nəzarətinə keçib. İngilis admiral Artur Filippin başçılığı ilə ilk kolonistlər dəstəsi “yaşıl materikə” gəlib. Britaniyanın daxili işlər naziri Lord Sidneyin adı ilə yeni şəhərin əsası qoyulub. Avstraliya bu gün də formal olaraq Britaniya Krallığına tabedir və Britaniya Birliyinin üzvüdür. 26 yanvar isə ölkədə milli bayram – “Avstraliya günü” kimi qeyd edilir.
1837-ci il 26 yanvar tarixində Miçiqan ABŞ-ın 26-cı ştatı elan edildi.
1860-cı il 26 yanvar tarixində Amerika vətəndaş müharibəsi: Virciniya yenidən ştatlar birliyinə qoşuldu.
Görkəmli Azərbaycan alimi, filosof və ədəbiyyatşünas Firudin bəy Köçərli 1863-cü ilin bu günü Qarabağın mərkəzi Şuşada dünyaya gəlib. Qori Seminariyasını bitirən Firudin bəy bir müddət İrəvan Gimnaziyası, sonra isə Qori Seminariyasında dərs deyib. Ədəbi fəaliyyətə də bu illərdə başlayıb. Azərbaycan ədəbiyyatı tarixinə dair ilk əsərlər sayılan “Azərbaycan ədəbiyyatı” və “Mirzə Fətəli Axundov” kitabçalarını nəşr etdirib, “Azərbaycan türk ədəbiyyatı” (1908) adlı fundamental əsər yazıb. 1918-ci ildə Qori Seminariyasının Azərbaycan şöbəsini Qazax şəhərinə köçürərək onu müstəqil milli seminariyaya çevirən Firudin bəy Köçərli 1920-ci ildə məşhur Gəncə üsyanının təşkilatçılarından biri kimi həbs olunaraq güllələnib. (1863-1920)
1933-cu il 26 yanvar tarixində xalq artisti, professor Musa Mirzəyevin doğum günüdür (1933-2016). Ötən əsrin 60-cı illərində yazılmış və bu gün də dillər əzbəri olan “Yeni il gəldi” mahnısının müəllifi Musa Mirzəyev Azərbaycan bəstəkarlıq məktəbinin seçilən nümayəndələrindən biri olaraq yaratdığı rəngarəng əsərləri ilə milli musiqi mədəniyyəti xəzinəsini daha da zənginləşdirib. O, “I simfoniya”, “Simfoniyetta”, simli orkestr üçün “II simfoniya”, violin və simfonik orkestr üçün simfoniya-konsert, poemalar - o cümlədən “Sədini oxuyarkən”, “Bayram poeması”, truba ilə orkestr üçün “Poema-noktürn”, “Yeddi simfonik lövhə” kimi simfonik əsərlərin, habelə kvartet, trio, sonata-kapriççio, “Gənclik üçün albom”, “Lənkəran əfsanəsi” fantaziyası, “Romantik poema” və s. xor əsərlərinin müəllifidir.
26 yanvar 1934-cü ildə Ümumittifaq Kommunist Partiyasının XVII qurultayında (“qaliblərin qurultayı”) Stalin tərəfindən antisovet qüvvələrə qarşı total repressiyanın konsepsiyası bəyan edilib. Bu, SSRİ-də kütləvi repressiyaların başlanmasına zəmin idi. Həmin konsepsiyanın ilk qurbanları elə ona səs verənlər oldular. 1937-ci ilədək XVII qurultayın 1966 iştirakçısından 1108-i güllələnmişdi.
1947-ci ildə müstəqilliyini elan etmiş Hindistan 3 il sonra – 1950-ci ilin 26 yanvar tarixində yeni konstitusiya ilə respublika dövlət quruluşunu qəbul etdi.
Əsgərlikdən sonra siyasətə atılan, Türkiyə Qurtuluş Savaşının Şərq Cəbhəsi komandiri, təqaüdçü general, 1946-cı ildə Türkiyə Böyük Millət Məclisinin sədri seçilən Kazım Qarabəkir bu vəzifəyə gələndən 2 il sonra - 1948-ci ilin 26 yanvarında 66 yaşında həyatdan köçüb.
1952-ci il 26 yanvar Beynəlxalq Gömrük Günü kimi qeyd olunur. Yanvarın 26-27-də Brüsseldə 17 Avropa ölkəsinin gömrük xidməti nümayəndəsinin iştirak etdiyi Gömrük Əməkdaşlığı Birliyinin təsis konfransı keçirilib. Konfransın ikinci günü gömrük əməkdaşlığı haqda Konvensiya qəbul edilib və elə həmin gündən də həmin Konvensiya qüvvəyə minib. Beynəlxalq Gömrük Günü 1983-cü ildən qeyd edilir.
1980-ci il 26 yanvarda İsrail və Misir arasında diplomatik əlaqələr yaradıldı.
1990-cı il yanvarın 26-da Sovet ordu hissələri Azərbaycana qarşı cəza aksiyasını davam etdirərək Neftçala və Lənkaran şəhərlərinə soxuldular. Sovet əsgərlərilə toqquşmada 8 yerli vətəndaş həlak oldu.
