Hüseyn Cavidin Ev Muzeyində Şamaxı Hazırlıq Mərkəzinin şagirdlərinin iştirakı ilə 2 Fevral Gənclər Günü münasibətilə “Gənclər arasında Hüseyn Cavid irsinin təbliği” mövzusunda tədbir keçirilib.

Tədbiri giriş nitqi ilə muzeyin əməkdaşı Nuranə Nərimanova açaraq bildirib ki, müasir Azərbaycanda gənclər hər zaman qayğı və diqqət mərkəzindədir. Ümummilli Lider Heydər Əliyevin gənclər haqqında səsləndirdiyi “Hər bir Azərbaycan gənci hər şeydən çox, hər şeydən artıq müstəqil Azərbaycanın bu günü, gələcəyi haqqında düşünməlidir”, - sözlərini xatırladan N.Nərimanova Prezident İlham Əliyev də daim gənclərə xüsusi qayğı ilə yanaşdığını bildirib. Dövlət başçısının gənclər haqqında dediyi “Biz haqlı olaraq gənclərimizlə fəxr edə bilərik. Bizim gənclərimiz torpaq uğrunda, Vətən uğrunda vuruşurlar. Bizim şəhidlərimizin böyük əksəriyyəti gənclərimiz olubdur. Allah bütün şəhidlərimizə rəhmət eləsin! Bizim gənclərimiz hərbi qələbələrimizi şərtləndiriblər”, - sözlərini şagirdlərə xatırladıb.

“Hazırda olduğunuz məkan vaxtilə əsarətdə olan vətənin repressiya qurbanlarının xatirəsini əks etdirir. Tariximizin yaddaşında qara hərflərlə öz əksini tapmış 1920-1940-cı illərdə xalqımızın sadəcə ziyalıları deyil, sadə vətəndaşları da repressiyanın qurbanına çevrildi. Ona görə də Vətənimizin müstəqilliyinin qorunması siz gənclərin üzərinə böyük məsuliyyət hissi qoyur”, - deyə muzeyin əməkdaşı vurğulayıb.