1719-cu il 4 fevral tarixində I Pyotr Rusiyada ilk dəfə olaraq əhalinin siyahıya alınmasına fərman vermişdir.
Azərbaycanın görkəmli şərqşünas alimi və şair Mirzə Cəfər Toçubaşov 1869-cu ilin bu günü dünyasını dəyişib. Tiflisdə anadan olmuş Mirzə Cəfər ilk təhsilini orada alıb, ərəb, fars, türk, rus dil və ədəbiyyatlarını müstəqil şəkildə öyrənib. 35 yaşından (1819) Sankt-Peterburqdakı Baş Pedoqoji İnstitutda ərəb, fars və türk dillərindən dərs deyən Mirzə Cəfər Topçubaşov Rusiya Arxeologiya və Numizmatika Cəmiyyətinin Şərq şöbəsinin ilk rəhbəri olub. Azərbaycanlı şərqşünas alim London Kral Asiya Cəmiyyətinin həiqiq üzvü olub. (1784-1869)
Şimali Qafqaz - Dağıstan xalqının siyasi və dini lideri Şeyx Şamil Həcc ziyarəti yolunda getdiyi Mədinədə 1871-ci ilin bu günü dünyada köçüb. Şeyx Şamil ömrünün çoxunu Qafqazın müstəqilliyi üçün Rusiya ilə döyüşlərdə keçirib.
1921-ci il 4 fevral tarixində dünya şöhrətli azərbaycanlı alim Lütfi Zadənin doğum günü. Bakıda anadan olan L.Zadə 1930-cu ildə ailəsi ilə İrana köçüb. Tehran Universitetini bitirdikdən sonra 1944-cü ildə ABŞ-a gedib, təhsilini Massaçusets Texnologiya Universitetində davam etdirib, Kolumbiya Universitetində elektron mühəndisliyi üzrə professor elmi dərəcəsi alıb.1960-cı illərdən Berkli Universitetində (Kaliforniya) işləməyə başlayıb. Lütfi Zadəyə şöhrət gətirən qeyri-səlis məntiq nəzəriyyəsi 80-ci illərdən dünyanın aparıcı texnologiya şirkətlərində, Amerika Milli Aerokosmik Agentliyində (NACA) istifadə olunur.
1922-ci ilin 22 noyabrından başlayan Lozanna sülh müqaviləsi görüşləri Osmanlı dövlətinin borcları, kapitulyasiyalar, milli azlıqlar, İstanbul və Çanaqqala boğazlarının başçılığı məsələsi, Türkiyə - Yunanıstan sərhədi və Mosul problemləri üzündən 1923-cü ilin 4 fevralında dayandırıldı və İsmət İnönü başda olmaqla Türkiyə nümayəndə heyəti Ankaraya döndü. Lozanna Konfransının ikinci mərhələsi aprelin 23-də başladı.
1930-cu il 4 fevral tarixində görkəmli xanəndə, muğam ustası, Xalq Artisti Əlibaba Məmmədov anadan olub. Xanəndənin böyük məharətlə ifa etdiyi “Rast”, “Bayatı Şiraz”, “Rahab”, “Dəşti” və başqa muğam dəsgahlarının səsyazıları AzTV-nin fondunda saxlanılır. Əlibaba Məmmədov 100-dən çox mahnı və təsniflər yazıb.
İkinci Dünya Müharibəsindən sonra - 1945-ci ildə Yaltada SSRİ, ABŞ və Böyük Britaniya rəhbərlərinin iştirakı ilə tarixdə Krım Konfransı adı ilə məşhur olan Yalta məclisi açıldı. Fevralın 12-ədək davam edən həmin konfransda Stalin, Ruzvelt və Çörçil faşist Almaniyası üzərində qələbədən sonra dünyanın yeni geosiyasi mənzərəsini müzakirə etdilər. Konfransda həmçinin 1 marta qədər Almaniya və Yaponiyaya müharibə elan edən dövlətlərin Birləşmiş Millətlər Təşkilatına qurucu üzv ola bilmələri qərarlaşdırıldı.
4 fevral Şri-Lanka xalqının milli bayramı – istiqlaliyyət günüdür. Hind-Çin yarımadasında Şri-Lanka ilk dəfə 1948-ci ildə öz dövlətini yaradıb və müstəqilliyini elan edib.
1954-cü il 4 fevral tarixində Kür çayı üzərində tikilən Mingəçevir Su Elektrik Stansiyası (SES) istifadəyə verilib. İnşasına 1945-ci ildə başlanılan Mingəçevir SES Cənubi Qafqazda ən iri su elektrik stansiyasıdır. Stansiyanın işə salınması ilə respublikanın yeni sənaye mərkəzinin - energetiklər şəhəri Mingəçevirin təməli qoyulub.
1972-ci il 4 fevral tarixində İngiltərə və daha 9 dövlət Banqladeşin (Şərqi Pakistan) müstəqilliyini tanımışdır.
1974-cü il 4 fevral tarixində görkəmli Azərbaycan riyaziyyatçısı, Əməkdar Elm Xadimi, akademik Zahid Xəlilov vəfat edib (1911-1974). O, 35 yaşında Azərbaycanın ilk fizika-riyaziyyat elmləri doktoru adını alıb. Əsərləri dünyanın bir sıra ölkələrində nəşr olunub. SSRİ-də ilk “Funksional analiz” dərsliyini yazıb. Z.Xəlilov 1962-1967-ci illərdə Azərbaycan SSR Elmlər Akademiyasının prezidenti olub. 1967-ci ildən ömrünün sonuna qədər isə özünün yaratdığı Riyaziyyat və Mexanika İnstitutuna rəhbərlik edib.
1994-cü il 4 fevral tarixində Prezident Heydər Əliyev “Azərbaycanın dəniz neft və qaz yataqlarının işlənməsinin sürətləndirilməsi haqqında” Sərəncam imzalayıb. Sərəncamın praktik nəticəsi kimi həmin il sentyabrın 20-də xarici neft şirkətləri ilə ilk saziş - “Əsrin müqaviləsi” adlanan neft kontraktları imzalanıb.
2004-cü il Facebook sosial şəbəkəsi meydana gəlib. Facebookda 1 milyarddan çox insan qeydiyyatdan keçib. Bütün istifadəçilərin orta hesabla 50 faizi sayta hər gün daxil olur, 35 milyondan çox istifadəçi isə statusunu yeniləyir. Şəbəkə istifadəçiləri hər ay 2,5 milyard fotoşəkil və 14 milyon videoçarx yükləyir. Saytda 1,6 milyondan çox aktiv səhifə mövcuddur.
2005-ci il 4 fevral tarixində Yuliya Timoşenko Ukraynanın baş naziri seçilmişdir.
Rəcəb Tayyib Ərdoğan Cəlal Bayarın 1959-ci il səfərindən 59 il sonra – 2018-ci ilin 4 fevralında Vatikana Türkiyədən dövlət başçısı səviyyəsində gedən ilk prezident oldu.
