Azərbaycan maarifpərvəri Mirzə Hüseyn Əfəndi Qayıbzadə 1830-cu ildə Qazax qəzasının Salahlı kəndində anadan olub. Ərəb və fars dillərini mükəmməl bilib. Qori seminariyasının Azərbaycan şöbəsinin açılması üçün yaxın dostu Mirzə Fətəli Axindovla birgə fəaliyyət göstərib. M.H.Qayıbov seminariyanın Azərbaycan şöbəsində şəriət, şərq və Azərbaycan dillərindən dərs deyib. Maddi köməyə ehtiyacı olan 43 Qori tələbəsini öz xərcinə oxudub. Mirzə Hüseyn Əfəndi Qayıbzadənin 4 cilddən ibarət “Azərbaycanda məhşur olan şüəranın əşarına məcmuə”si klassik irsin öyrənilməsi üçün əhəmiyyətlidir. Bu məcmuədə 18-19-cu əsrlərdə yaşamış 100-dən çox Azərbaycan şairinin əsərlərindən nümunələr verilib. (1830-1917)
Dünyanın ən böyük və ən məşhur muzeylərindən biri olan “Metropoliten Muzey of Art” 1872-ci ilin 20 fevralında Amerika Birləşmiş Ştatlarının Nyu-York şəhərində açılıb.
İstanbulda ilk elektrikli tramvay 1914-cü ilin 20 fevral günündən işə düşüb. Bu tarixdən etibarən şəhərdə 1869-ci ildən olan atlı tramvay yerini elektrik tramvaya təhvil verib.
1928-ci ilin 20 fevral tarixində Əliağa Kürçaylı (1928-1980) anadan alub. O, Azərbaycan şairi, dramaturqu və tərcüməçisidir. "Azərbaycan gəncliyi", "Ədəbi Azərbaycan", "Yazıçı" kimi nəşrlərdə çalışıb.
1938-ci il 20 fevral tarixində Arif Babayev anadan olub. O, Azərbaycanın xalq artisti və xanəndəsidir. "Leyli və Məcnun", "Əsli və Kərəm", "Aşıq Qərib", "Gəlin qayası" və s. operalarda ifa edib. Xanəndə Azərbaycan muğamı sənətini təmsil edərək müxtəlif ölkələrdə qastrol səfərlərində olub.
1962-ci ildə Con Qlenn ABŞ tarixində ilk orbital kosmik uçuşunu həyata keçirib. O, 4 saat 55 dəqiqə ərzində Yer ətrafında üç dəfə dövrə vurub.
1970-ci ilin bu günü dövrün Türkiyə dövlət başçısı Cövdət Sunay və Baş nazir Süleyman Dəmirəl tərəfindən mərasimlə İstanbul Boğaziçi körpüsünün təməli atılıb. Asiya və Avropa qitələrini birləşdirən körpü üç ilə tamamlanıb. Boğaziçi körpüsü Qara dənizlə Mərmərə dənizini bir-birinə bağlayan və İstanbul boğazı üzərində yer alan üç asma körpüdən biridir.
20 fevral görkəmli Azərbaycan bəstəkarı Fikrət Əmirovun xatirə günüdür. F.Əmirov uzun illər Azərbaycan Bəstəkarlar İttifaqının katibi olub. Onun “Sevil” operası dramaturji yığcamlığı, xalq ruhuna yaxın olması və gözəl melodiyaları ilə səciyyələnir. Fikrət Əmirov simfonik muğam janrının yaradıcısı, bir çox romans və mahnının müəllifidir. Onun “Min bir gecə” baleti dünyanın bir çox ölkəsində tanınır. Bəstəkar 1984-cü ilin bu günü dünyasını dəyişib. (1922-1984)
1988-ci ildə Dağlıq Qarabağ Muxtar Vilayəti Xalq Deputatları Sovetinin sessiyası vilayətin Ermənistana birləşdirilməsi tələbilə SSRİ Ali Soveti qarşısında vəsatət qaldırdı. Bu qanunsuz tələb Qarabağın Azərbaycandan qoparılması istiqamətində sovet rəhbərliyinin yürütdüyü riyakar siyasətin növbəti mərhələsi oldu.
2007-ci ildə BMT Baş Məclisinin qərarı ilə hər il fevralın 20-si bütün dünyada Sosial Ədalət Günü kimi qeyd olunur. Sosial Ədalət millətlərin dinc yanaşı yaşaması və inkişaf etməsi üçün ən ümdə pronsiplərdən sayılır.
20 fevral Aviasiya Qəzası Qurbanları və Ailələrinin Beynəlxalq Anım Günüdür. ICAO-nun bu addımı aviasiya qəzalarında həlak olanların xatirəsinə ehtiram, onların ailə üzvlərinin psixi, fiziki və mənəvi sağlamlığını diqqət mərkəzində saxlamaq məqsədi daşıyır. Azərbaycanın da üzvü olduğu beynəlxalq təşkilat son bir neçə il ərzində bu ailələrə yardımın adekvat şəkildə həll olunmasını təmin etmək üçün çoxsaylı təşəbbüslər irəli sürüb. Təşkilat hər il üzv ölkələrə təyyarə qəzası qurbanları və ailələrinin ehtiyaclarını ödəmək üçün yardımla bağlı müvafiq qanunvericilik aktları və planlar hazırlamağa kömək edəcək beynəlxalq tədbirlər təşkil edir.
