1193-cü il 4 mart tarixi Əyyubilər dövlətinin qurucusu, səlibçilərin hücumlarına qarşı duran qəhrəman Səlahaddin Əyyubinin xatirə günüdür.
1493-cü il 4 mart tarixində Xristofor Kolumb yeni qitənin kəşfi ilə nəticələnən səyahətini başa vuraraq Portuqaliyaya qayıtdı.
1678-ci il 4 mart tarixində İtalyan bəstəkarı, skripkaçı, dirijor və pedaqoq Antonio Vivaldi anadan olub (1678-1741). O, 90 operanın, müxtəlif musiqi alətləri üçün yazılmış 500-dən çox konsertin müəllifidir.
1791-ci il 4 mart tarixində Vermont ABŞ-ın 14-cü ştatı oldu.
Müasir Azərbaycan tarının yaradıcısı kimi adını incəsənət tarixinə yazdıran, Sadıqcan adı ilə tanınan Sadıq Əsəd oğlu 1846-cı ilə Qarabağın mərkəzi Şuşada anadan olub. Uşaq yaşlarından tütək, ney, kamança çalmağı öyrənən Sadıqcan bir qədər sonra məhşur tarzən Mizrə Əli Əsgər Qarabağidən tar dərsi alıb. Getdikcə bu alətdə ifaçılığını təkmilləşdirib və bugünkü Azərbaycan tarının yaradıcısı olub (1846-1902).
1877-ci il 4 mart tarixində Amerikalı ixtiraçı Emil Berliner mikrofonu kəşf edib. Bundan bir il əvvəl Aleksandr Bell tərəfindən də mikrofon yaradılmış və Filadelfiyada sərgidə nümayiş olunmuşdu. Lakin həmin mikrofonun maye ötürücülü olması səsin ötürülməsində problemlər yaradırdı. Sərgidə bu mikrofonu görən E.Berliner onu təkmilləşdirərək səs ötürücüsünü gücləndirib və bir il sonra ictimaiyyətə təqdim edib.
1877-ci ilin 4 mart tarixində Rusiyanın paytaxtı Moskada Böyük Teatr səhnəsində tanınmış rus bəstəkarı Pyotr Çaykovskinin “Sonalar gölü” baletinin premyerası oldu. Amma o zaman uğurlu hesab edilməyən əsər repertuardan qaldırıldı. Bundan sonra P.Çaykovski öz musiqisini zəif hesab edərək 12 il heç bir balet yazmadı.
1882-ci il 4 mart tarixində İngiltərədə ilk elektrik qatarı fəaliyyətə başladı.
1894-cü il 4 mart tarixində Şanxayda dəhşətli yanğın mindən çox binanın kül olmasına səbəb oldu.
1903-cü il 4 mart tarixində Beşiktaş gimnastika klubu yaradıldı.
1919-cu il 4 mart tarixində görkəmli aktyor, rejissor Hüseyn Ərəblinski (1881-1919) qətlə yetirilib. Azərbaycanın professional teatr sənətinin banilərindən biridir. “Müsəlman artistləri” cəmiyyətində, “Nicat” teatr cəmiyyətində çalışıb. 1916-cı ildə “Neft və milyonlar səltənətində” filmində Lütfəli bəy rolunu oynayıb.
1919-cu il 4 mart tarixində məşhur milyonçu və mesenat Ağa Musa Nağıyev vəfat edib (1842-1919). Çox kasıb bir ailədə doğulan Ağa Musa Nağıyev sonradan Bakının ən varlı şəxslərdən biri olub (deyilənə görə, 400 milyondan çox pulu varmış). Bu gün də memarlıq baxımından Bakının bəzəyi olan binalar tikdirib. Hazırda AMEA-nın Rəyasət Heyətinin yerləşdiyi bina (İsmailiyyə), Rabitə və Yüksək Texnologiyalar Nazirliyinin və Səhiyyə Nazirliyinin binaları, Azneft kimi tanınan bina, Ali Məhkəmənin əvvəlki binası, Opera və Balet Teatrının yaxınlığındakı ev, keçmiş “Astoriya” və “Yeni Avropa” mehmanxanaları, Zabitlər Evi onların ən məşhurlarıdır. O, həmçinin məktəb və xəstəxanalar da tikdirib, Şollar su kəmərinin çəkilişinə çoxlu pul qoyub. 1918-ci il hadisələri zamanı ermənilərin İsmailiyyə binasını yandırmasına dözə bilməyən Ağa Musa Nağıyev xəstəliyə tutulub və bir il sonra vəfat edib. Qəbrinin yeri üç dəfə dəyişdirilib. Sonuncu dəfə nəşinin qalıqları Biləcəri qəbiristanlığında dəfn olunub (1998).
Tarixə “Son Osmanlı xəlifəsi” olaraq düşən Sultan Əbdülməcid və Osmanlı xanədanı üzvləri 1924-cü ilin 4 mart günü ölkə xaricinə çıxarıldı.
“Happy Birthday to You” mahnısı 1924-cü ilin bu günü ilk dəfə Kleyton F.Summi tərəfindən yayıldı. Artıq “Happy Birthday to You" müxtəlif dillərdə ad günləri mərasimlərində oxunan ümumi mahnıya çevrilib.
1955-ci il 4 mart tarixində Yaponiyanın “Sony” şirkəti ilk tranzistorlu cib radioqəbuledicisinin istehsalına başlayıb.
1966-cı il 4 mart tarixində "Canadian Pacific Air Lines" şirkətinə məxsus DC-8 sərnişin təyyarəsinin Tokio hava limanına enərkən partlaması nəticəsində 64 nəfər həlak oldu.
4 mart 1968-ci ildə Azərbaycanın Milli Qəhrəmanı Elşad Əhədov anadan olub. O, Orta məktəbi Masallıda oxumuş, Naxçıvanski adına Hərbi liseyə daxil olmuşdur. Sonra Ukraynanın Kamenets-Podolsk Ali komandirlər məktəbinin tələbəsi olub. 1989-cu ildə E.Əhədov Volqoqrad hərbi hissələrindən birinə rota komandiri təyin edilir. Vətənə dönən Elşad əvvəlcə Bakının Güzdək qəsəbəsində, sonra Lənkəran rayonunda rota komandiri kimi fəaliyyət göstərir. Erməni işğalçılarının hücumu zamanı Füzulidə, Aşağı Veysəllidə, Şişqayada və digər döyüş bölgələrində vuruşub. Son döyüşü Ağdaş yüksəkliyi uğrunda olur, 11 dekabr 1993-cü il Ağdaş yüksəkliyi uğrunda gedən döyüşdə o, mərdliklə həlak olur.
1971-ci il 4 mart tarixində Akademik Mirməmməd Cavadzadənin rəhbərliyi ilə ilk dəfə xəstəyə böyrək köçürülüb. Bu hadisə nəinki Azərbaycanda, eləcə də Cənubi Qafqazda və Yaxın Şərqdə ilk böyrəkköçürmə əməliyyatı kimi tarixə düşüb.
1981-ci ildə Erməni Terror Təşkilatı “ASALA”nın üzvləri növbəti cinayət əməlini törədərək Fransanın paytaxtı Parisin mərkəzində 3 Türkiyə diplomatını qətlə yetirdilər.
İspaniyadan inkvizisiya təzyiqindən qaçaraq Osmanlı imperatorluğuna sığınan yəhudilər 1992-ci ilin 4 martında Türkiyəyə gəlişlərinin 500-cü ildönümünü qeyd etdilər.
4 mart 1997-ci ildə Amerika Birləşmiş Ştatlarının prezidenti Bill Kinton “insan klonlama tədqiqatı”na qadağa qoydu.
2006-cı il 4 mart tarixində "Odnoklassniki" sosial şəbəkəsi fəaliyyətə başladı.
4 mart 2008-ci ildə Azərbaycan və Ermənistan Silahlı Qüvvələri arasında Ağdərə toqquşması baş verib. Toqquşma nəticəsində ümumi 20 nəfər hərbi qulluqçu ölüb, 2 nəfər hərbi qulluqçu isə yaralanıb.
2011-ci il 4 mart tarixi Azərbaycanın əməkdar artisti Elçin Həmidovun xatirə günüdür. Körpə yaşlarından əvvəlcə atasını, sonra isə anasını itirən Elçini və bacı-qardaşlarını əmisi himayəyə götürür. Amma gələcəyin istedadlı aktyorunu hələ qarşıda daha böyük çətinliklər gözləyir. Əmisinin evində də əziyyətli günlər keçirən, valideynlərinin itkisindən özünə gəlməyə macal tapmayan Elçinin əvvəlcə bacısı, sonra isə qardaşları vəfat edir. 1974-cü ildə Azərbaycan Dövlət Musiqili Komediya Teatrında xor artisti vəzifəsində çalışıb. 1977-ci ildə İncəsənət İnstitutunun "Dram-kino aktyoru" fakültəsinə daxil olub, 1981-ci ildə bitirib. Həmidov Məhəllə filmində “Məzi” rolu ilə daha çox gənclər tərəfindən tanınır.
2020-ci ildən bəri 4 mart Mühəndislik günü kimi qeyd olunur. Son vaxtlara qədər bütün dünya üçün "mühəndislik günü" nün fərqli olduğunu bilirdinizmi? Ancaq mühəndisliyi qeyd etmək üçün ümumiyyətlə 2020-ci ilə qədər qlobal bir gün olmayıb. 2020-ci ildən başlayaraq hər il 4 Mart Dünya Davamlı İnkişaf üçün Mühəndislik Günü olacaq. Bu tarixi qərarın ilk mərhələsi YUNESKO İcra heyətinin YUNESKO-nun Baş Konfransını tövsiyə etdiyi 17 aprel 2019-cu il tarixində baş tutdu. Dünya Mühəndis Təşkilatları Federasiyasının (WFEO) prezidenti olaraq Marlin Kanqa gün üçün qararlaşdırmaya rəhbərlik etdi. Daha əvvəl heç vaxt belə bir şey etməmişdi və başlanğıcda xəyallarının həyata keçiriləcəyini bilmirdi.
4 mart 2022-ci ildə Əməkdar rəssam, tanınmış heykəltəraş Albert Zaman oğlu Mustafayev (26.1.1931 – 2022) vəfat edib.
