4 aprel 1814-cü ildə Napoleon taxtdan ilk dəfə geri çəkilib.
1913-cü ilin 4 aprelində Osmanlı dövlətində “Qadınlar dünyası” adlı jurnalın ilk sayı çıxıb. Jurnalın məqsədi qadın hüquqları, azadlıqları, onların maarifləndirilməsi, iş və sosial həyatda fəaliyyətinin təmin edilməsindən ibarət idi.
Xalq artisti Muxtar Maniyev 1935-ci ilin 4 aprelində anadan olub.
4 aprel 1949-cu ildə Vaşinqtonda Şimali Atlantika müqaviləsi imzalanıb. NATO adlanan bu blok uzun müddət Varşava müqaviləsinin üzvü olan ölkələrə qarşı dayanan başlıca hərbi qüvvə olub. Amma “Soyuq müharibə” başa çatdıqdan sonra da NATO fəaliyyətini dayandırmayıb, əksinə Şərqə doğru genişlənib.
1953-cü ilin bu günü Türkiyə Dəniz Qüvvələrinə bağlı Dumlupınar sualtı gəmisi NATO təlimindən qayıdarkən Çanaqqala boğazında İsveç gəmisi “Naboland”la toqquşaraq batdı. 81 türkiyəli dənizçisinin şəhid olduğu 4 aprel tarixi Dəniz Şəhidlərini Anma Günü elan edildi.
Azərbaycanın Milli Qəhrəmanı Rəfael Həbibov 1964-cü ilin bu günündə dünyaya göz açıb.
Amerika Birləşmiş Ştatlarında vətəndaş hüquqları və irqi bərabərlik uğrunda hərəkatın lideri, Nobel Sülh Mükafatını qazanmış Martin Lüter Kinq 1968-ci ilin bu günü Tennesi ştatının Memfis şəhərində qətlə yetirilib.
4 aprel 1979-cu ildə Pakistanın baş naziri Zülfüqar Əli Butto asılaraq edam edildi.
1992-ci ilin 4 aprelində Azərbaycan Respublikası ilə Rusiya Federasiyası arasında diplomatik münasibətlərin qurulmasına dair protokol imzalanıb.
Bu gün Türkiyənin böyük siyasi xadimi Alparslan Türkeşin xatirə günüdür. 4 aprel 1997-ci ildə vəfat edən Alparslan Türkeş özünün bütün şüurlu həyatını böyük türk millətinə və türk dünyasının maraqlarına həsr edib. Məhz bu xidmətlərinə görə ona Başbuğ ləqəbi verilib.
1997-ci ildən başlayaraq hər 4 aprel tarixi bütün dünyada mina təhlükəsizliyi barədə maarifləndirmə və minalardan təmizləmə fəaliyyətinə yardım günü olaraq qeyd edilir. Hər il dünya üzrə minalardan təmizləmə fəaliyyəti nəticəsində 100 kvadrat kilometrdən çox ərazi minalardan təmizlənir, 7 milyondan çox insana təhlükədən necə müdafiə olunmaq öyrədilir.
Xalq şairi Qabil 4 aprel 2007-ci ildə dünyasını dəyişib.
4 aprel Azərbaycan üçün dörd günlük şərəfli müharibənin ildönümüdür. 2016-cı il aprelin 1-dən 2-nə keçən gecədən başlayaraq Azərbaycan və Ermənistan silahlı qüvvələri arasında baş vermiş hərbi münaqişədir. Dördgünlük müharibə zamanı Azərbaycan Silahlı Qüvvələrinin birləşmələri Goranboy rayonuna və Naftalan şəhərinə təhlükə yarada biləcək Talış kəndi ətrafındakı yüksəklikləri, eləcə də Seysulan məntəqəsini azad edib, Füzuli rayonu istiqamətində yerləşən "Lələ təpə" yüksəkliyində nəzarəti ələ keçiriblər.Döyüşlər nəticəsində Azərbaycan SilahlıQüvvələri Ağdərə-Madagiz istiqamətində yolların nəzarətdə saxlanılmasını təmin edib.
Azərbaycanın Milli Qəhrəmanı Samid İmanov 4 aprel 2016-cı ildə Talış kəndi uğrunda gedən döyüşlərdə qəhrəmancasına şəhid olub.
