“Ermənistan hökuməti ilə Rusiya arasında ciddi gərginliklər müşahidə edilir. İrəvan sanki anti-Rusiya mövqeyi sərgiləməklə paralel qərbyönlü siyasətini kəskinləşdirib, davam etdirmək niyyətindədir”.

Bu sözləri Globalinfo.az-a politoloq Anar Əliyev Ermənistanın dövlət orqanlarında ardıcıl istefaları şərh edərkən deyib.

O bildirib ki, sözügedən istefalarla Ermənistanla Rusiya arasında yeni gərginliyin formalaşması haqda görüntü yaradılmaqdadır:

“MDB dövlət başçıları şurasının son iclasında Paşinyanın ortaya qoyduğu mövqe də diqqət çəkir. Belə ki, Rusiya prezidenti MDB dövlət başçılarının ümumi rəyi olan kollektiv təhlükəsizlik məsələləri ilə bağlı sənədi təklif edəndə buna yalnız Ermənistan veto qoydu. Hesab edirəm, bu da şou idi.

İki ölkə arasında ritorik səviyyədəki gərginliyi kənara qoysaq, reallıqdakı münasibətlər – iqtisadi, siyasi, hərbi əlaqələrin hazırkı səviyyəsi tam fərqlidir”.

Ekspert deyib ki, Rusiya və Ermənistan arasında ticarət dövriyyəsinin 2024-cü ildə 16 milyard dollar həcminə çatması gözlənilir:

“Bu, heç bir halda rus istehlakçılarının Ermənistan məhsullarına tələbatı, ya da Rusiya istehsalı məhsulların Ermənistanda rəğbət görməsi ilə bağlı deyil. Kremlin sanksiyalardan yayınması, satışı qadağan edilən məhsulları Ermənistan üzərindən əldə etməsinin real göstəricisidir.

Rusiya hakimiyyətinin “qara biznesi” olan almaz və qızılın Ermənistan üzərindən qeyri-leqal satışı ticarət dövriyyəsinin həcmində qeyd edilən rəqəmlərə təsir edir. Sadaladığım və sadalamadığım faktar təsdiq edir ki, Paşinyan və iqtidarı Rusiya üçün Ermənistanda arzuolunan hakimiyyətdir.

Son dövrlər Ermənistanda artan istefa halları da bu məsələlərlə bağlıdır. Daha çox Rusiyayönlü şəxslərin siyasi hakimiyyətdən uzaqlaşması əslində şoudur. Yəni Qərbə mesaj verilir ki, Rusiyanın Ermənistandakı təsiri zəifləyir. Əslində isə vəziyyət tam tərsidir. Hesab edirəm, bütün bunlar növbəti razılaşdırılmış ssenarilərdir, Ermənistanın oynamağa çalışdığı rolun tələb etdiyi hallardır”.

Turan Rzayev
Globalinfo.az