Bir neçə gün əvvəl türkiyəli aparıcı Okan Bayülgənin "Muhabbet Kralı” verilişində qonaq olarkən aparıcı ilə xalq artisti Alim Qasımov arasında anlaşılmazlıq yaşanmışdı. Türk dilində işlədilən ifadələr azərbaycanlı sənətkar tərəfindən başa düşülməmiş və bu videogörüntülər sosial şəbəkələrdə yayımlanmış, təbəssümə səbəb olmuşdu.

Dünən Okan Bayulgen öz proqramında açıqlama verərək “Bunlar bir yerdə öyrəndiyimiz mədəni fərqlərdir. Elə bir niyyətim ola bilməz. Əgər üzr istəmək lazımdırsa, diləyə bilərəm. Amma mən burada üzr istənəcək bir şey görmürəm. Sadəcə, bu mədəni fərqi açıqlamaq istədim.

Verilişdə mən gördüyüm bir detalı sual verdim. “Siz çox özəl sənətçisiniz və yanınızda dəyərli sənətçi qızınız var. Nə qızınıza güzəşt edirsiniz, nə də yanınızda olan musiqiçilərə”. Sadəcə, mən o sözü çox diqqətli şəkildə türk sözləri ilə ifadə edərək dedim. Alim bəy təəccübləndi, mən də digər qonaqlar da başa düşmədik. Nə demək istədiyimi sual verdi, biz də açıqladıq. Məlum oldu ki, o sözün başqa bir mənası var imiş. Mən güzəştə getmək demək yerinə türk dilində bu ifadəni söyləmişdim. İndi Azərbaycanda deyirlər ki, “efirdə bu sözü necə deyə bilər”. Biz də bir şey başa düşmədik, bilsəydik yayımdan o hissəni kəsərdik”.