Yanvarın 22-də Yasamal rayon Heydər Əliyev Mərkəzində 44 Günlük Vətən Müharibəsinin Şəhidi Murov Qartalı Fəxri Qəribzadə yad edildi. "Dəmir Yumruq Alfa-A" cəmiyyətinin təşkilatı dəstəyi ilə keçirilən tədbirdə cəmiyyətin kollektivi, Fəxrimizin anası Mehparə xanım, Şəhid valideynləri, hər iki Vətən Müharibəsinin veteranı, ictimai xadim Mehriban Abdullayeva, Qazilər, KİV nümayəndələri iştirak etdilər. Tədbirin aparıcısı Şəhidlərin əziz xatirəsinə bir dəqiqəlik sükut elan etdikdən sonra Azərbaycanın Dövlət Himni səsləndi. Sonra söz "Dəmir Yumruq Alfa-A" cəmiyyətinin sədri Ülviyyə Əsədovaya verildi. O, Murov Qartalı Fəxri Qəribzadədən danışarkən onun timsalında hər iki Vətən Müharibəsinin qazi və şəhidlərinin misilsiz xidmətlərini qeyd etdi və "Dəmir Yumruq Alfa-A" cəmiyyəti olaraq hər zaman onların xatirəsini əziz tutacağını vurquladı. Daha sonra Fəxrinin döyüş yoldaşları, 1-ci Qarabağ müharibəsinin veteranları onun igidliyindən danışdılar. Müğənni İnci Şirvanlı və nəvəsinin ifasında şəhidlərə həsr olunmuş ədəbi-bədii kompozisiya səsləndi. Tədbirin sonunda 44 Günlük Vətən Müharibəsinin qaziləri Mehparə ananı Fəxri Diplomla mükafatlandıraraq onunla xatirə şəkili çəkdirdilər.

Rüstəm Rüstəmov
"AYMEDİACOMPANY.AZ"