Natiq Behdiyev adına İsmayıllı şəhər 6 nömrəli tam orta məktəbin akt zalında Təhsildə İnkişaf və İnnovasiyalar üzrə VIII qrant müsabiqəsinin qalibi olmuş “Ruhun xəzinəsi – mental sağlamlıq” layihəsinin bağlanış tədbiri keçirilib.
Tədbirdə İsmayıllı Rayon Təhsil Sektorunun əməkdaşları, Azərbaycan Təhsil İşçiləri Azad Həmkarlar İttifaqının (ATİAHİ) İsmayıllı Rayon Komitəsinin sədri Hafiz Kərimov, İsmayıllı Ailə və Uşaqlara Dəstək Mərkəzinin direktoru Lətifə Əliyeva, “İsmayıllı Yazarları” ədəbi-ictimai birliyinin sədri Şahməmməd Soltanov, İsmayıllı Dövlət Humanitar və Texnologiya Kollecinin müəllimi Elşən Həsənov, ümumtəhsil məktəblərinin psixoloqları, məktəbin müəllim və şagird kollektivi, eləcə də valideynlər iştirak ediblər.
Layihənin rəhbəri, İsmayıllı şəhər 6 nömrəli tam orta məktəbin psixoloqu Ruslan Kamilov çıxış edərək layihənin məqsədi, həyata keçirilən fəaliyyətlər və əldə olunan nəticələr barədə ətraflı məlumat verib. O bildirib ki, layihənin əsas məqsədi məktəblərdə mental sağlamlıq mövzusunda maarifləndirməni gücləndirmək, şagirdlər, valideynlər və müəllimlər arasında sağlam psixoloji münasibətlərin formalaşmasına dəstək olmaqdır.
Çıxışlarda vurğulanıb ki, davranışında çətinlik müşahidə olunan hər bir uşaq “pis uşaq” deyil. Belə halların arxasında çox zaman psixoloji, sosial və ya ailə amilləri dayanır. Bu baxımdan uşaqlara anlayışla yanaşmaq, onları dinləmək və vaxtında psixoloji dəstək göstərmək sağlam cəmiyyətin formalaşması üçün mühüm əhəmiyyət daşıyır.
İştirakçılar layihənin aktuallığını və cəmiyyət üçün əhəmiyyətini yüksək qiymətləndirərək bu istiqamətdə görülən işlərin davam etdirilməsinin vacibliyini vurğulayıblar.
Tədbirin sonunda layihə müddətində fəallığı ilə seçilən şagird və valideynlər Təşəkkürnamələrlə təltif olunub, xatirə şəkli çəkdirilib.
