İsrailin Baş naziri Benyamin Netanyahu deyib ki, onların uzunmüddətli hədəfi İranı yox etməkdir. O həmçinin Tehrandakı hərbi bölgələri hədəf aldıqlarını və hücumun uğurla başa çatdığını bildirib.

İranın yox olma ehtimalı varmı? Netanyahunun bu açıqlamaları nəyə hesablanıb?

Globalinfo.az-a danışan siyasi şərhçi Aydın Quliyev deyib ki, bu gün İran və İsrailin bir-birilərinə qarşı apardıqları siyasət nə bölgədə, nə də dünyada təhlükəsizlik maraqlarına cavab verir:

“Hər iki ölkə davakar siyasət aparır. Bu siyasətlər bölgəni, bütün dünyanı daha gərgin, alovlu müharibə vəziyyətinə aparır. İndiki şəraitdə istənilən ölkənin başqa bir dövləti məhv etmək iddiası absurd və axmaqlıqdır. Kim bu iddia ilə çıxış edirsə, o axmaq dövlət siyasətinin üstündədir. Çünki XXI əsrdə heç bir dövlətin başqa bir ölkəni fiziki olaraq məhv etmək, dünya xəritəsindən silmək kimi hüququ, siyasi gücü ola bilməz”.

Siyasi şərhçinin sözlərinə görə, İsrail bölgəni Üçüncü Dünya müharibəsinə sürükləyəcək siyasət yürüdür:

“İsrail indiyə kimi Fələstin xalqına özünün dövlətini qurmaq imkanı verməyib, bu, bölgəni dünya müharibəsinə aparan baza mövqeyin göstəricisidir. İsrail BMT-nin Baş katibini “persona non qrata” elan edib. Livanda BMT-nin sülhməramlı qüvvələrinə atəş açır, BMT-nin Fələstinə yardım göstərən qüvvələrini oktyabrın 7-də İsrailə qarşı törədilmiş terror əməliyyatında birbaşa iştirak etməkdə ittiham edir. Bütün bunlar İsrailin bölgədə heç kimə məhəl qoymadığının göstəricisidir. Ona görə də bölgə sülhdən daha da uzaqlaşmaqdadır”.

Safura Bənnayeva
Globalinfo.az