“Yaxın Şərqdə proses İsrailin müəyyən etdiyi ssenari üzrə davam edir. HƏMAS-la savaşa başlayan İsrailin əsas məqsədi İranın proksi qüvvələrini bir-bir sıradan çıxarmaq idi: hansı ki, İsraili mühasirəyə alıblar. Təl-Əviv bu təzyiqdən qurtulmaq üçün əməliyyatlara başladı”.

Bu sözləri Globalinfo.az-a politoloq Oqtay Qasımov deyib.

O bildirib ki, bir il öncə HƏMAS-ın İsrailə hücumu ilə başlayan savaşın coğrafiyası genişlənməkdədir:

“HƏMAS Qəzzada nəzarətə alınıb. Təşkilatın hərbi gücü zəifləyib. Lakin bu, planın ilk mərhələsi idi. Sırada “Hizbullah” vardı. “Hizbullah” HƏMAS-dan daha güclü rəqibdir. Buna görə də İsrail “Hizbullah”a qarşı əməliyyatlar keçirir.

İsrailin əsas hədəfi isə İranı müharibəyə cəlb etməkdir. Əslində, Təl-Əviv planlarını gerçəkləşdirir və İran açıq tələyə düşür. Tehranın sonuncu hücumu da faktiki olaraq bunu deməyə əsas verir. İsrail bundan sonra İrana qarşı daha ciddi tədbirlər görəcək. Xüsusilə nüvə obyektləri əsas hədəfdir”.

Politoloq qeyd edib ki, ABŞ məsələyə fərqli yanaşır:

“Vaşinqton Təl-Əvivin cavab verməsinə qarşı deyil, amma bunun ciddi və dağıdıcı olmasını istəmir. Xüsusilə İranın nüvə obyektlərinin vurulması ABŞ-ın maraqlarına uyğun deyil. Buna görə də Bayden açıq şəkildə İsrailə xəbərdarlıq edir.

Məsələ ondadır ki, ABŞ seçkiöncəsi genişmiqyaslı müharibənin başlamasını arzulamır. Çünki belə bir müharibəyə nəzarət etmək, istənilən an sonlandırmaq mümkün deyil. Vaşinqton buna görə nəzarəti itirmək və seçkiöncəsi siyasi sürprizlərlə üzləşmək istəmir.

ABŞ İrana qarşı mübarizənin fərqli formada olmasını istəyir. Yəni bu günə qədər olduğu kimi mübarizə sanksiyalarla məhdudlaşmalıdır. Görünür, İsrail buna əməl etməyəcək”.

Turan Rzayev