Azərbaycanın telekommunikasiya və poçt xidmətləri üzrə tənzimləyici qurumu olan
İnformasiya Kommunikasiya Texnologiyaları Agentliyinin (İKTA) Poçt rabitəsi şöbəsinin
müdiri Vüqar Səmədov fevralın 17-21-də İsveçrənin Bern şəhərində keçirilən
Ümumdünya Poçt İttifaqının (ÜPİ) Poçt Əməliyyatları Şurasının (PƏŞ) iclasında iştirak
edib.

Bu tədbir 2025-ci ildə Dubayda baş tutacaq Konqresdən əvvəl son strateji görüş olaraq
dünyanın 50-dən çox ölkəsindən 300-dən artıq nümayəndəni bir araya gətirib.
Bir həftə davam edən iclasda qlobal poçt xidmətlərinin gələcəyini formalaşdıracaq
Dubay Dünya Poçt Strategiyası və Biznes Planının müzakirəsi aparılıb. Eyni zamanda
PƏŞ-in əsas vəzifələrindən biri olaraq poçt xidmətlərinin modernləşdirilməsi və
beynəlxalq əlaqələrin daha səmərəli qurulması istiqamətində mühüm addımlar atılıb.

Bu iclasın əsas məqamlarından biri ÜPİ-nin “Electronic Advanced Data” (EAD)
sisteminin gücləndirilməsi ilə bağlı yeni təşəbbüsüdür. “Zonos” və “Hurricane
Commerce” kimi qabaqcıl beynəlxalq texnologiya şirkətləri ilə inteqrasiyalar nəticəsində
ÜPİ-nin Gömrük Bəyannaməsi Sistemi (CDS) daha da təkmilləşdiriləcək. Yeni təqdim
olunan “CDS 2024 Service Pack 1” poçt rabitəsi operatorlarına gömrük prosedurlarını
daha effektiv idarə etməyə imkan yaradacaq.

Dubay Konqresinin yaxınlaşması ilə bu iclas ÜPİ-nin növbəti strategiya dövrü üçün
siyasət və prioritetlərin müəyyən olunması baxımından həlledici məqamdır.

Qeyd edək ki, İnformasiya Kommunikasiya Texnologiyaları Agentliyi ölkədə informasiya-
kommunikasiya texnologiyaları və rabitə (telekommunikasiya və poçt) sahələrində
tənzimləmə və nəzarəti, eləcə də radiospektr idarəçiliyini həyata keçirir.