Əmiraslanov Fərid Sərdar oğlu — musiqiçi, xanəndə, jurnalist, pedaqoq, media rəhbəri. 1990-cı ildə Bərdə rayonunun Qazıqurdalı kəndində anadan olmuşdur. Qarabağın tanınmış el sənətkarı, respublikanın fəxri mədəniyyət işçisi, Qarabağ qazisi, mərhum sənətkarımız Sərdar Əmiraslanovun (Əvəzoğlu) ailəsində dünyaya gəlmişdir. Evin sonbeşiyi olan Fərid uşaq yaşlarından mədəniyyətə bağlı bir mühitdə böyümüş, erkən yaşlarından istedadı ilə seçilmişdir.

Təhsil və musiqiyə ilk addımlar

1996-cı ildə Bərdə rayonunun Qaradəmirçi kəndində yerləşən şəhid Fehruz Sadıqov adına orta məktəbin birinci sinfinə daxil olmuşdur. Uşaqlıqdan səsinin məlahəti ilə seçilən Fərid, məktəbin bütün tədbirlərində, konsertlərində fəal iştirak etmiş, elə o yaşlardan atasının rəhbərlik etdiyi “Sarı çiçək” ansamblı ilə birgə cəbhə bölgələrinə — hərbi hissələrə səfər edərək əsgərlər üçün konsertlər vermişdir. O, səngərlərdə böyüyən, mədəniyyətlə vətənə xidmət edən simalardan biridir.

Hələ birinci sinifdə oxuyarkən Qarabağın tanınmış seyidi Seyid Yusif Ağaya həsr olunmuş, şair və tarixçi Əli Əliyevin (“Əyricəli Əli”) sözlərinə yazılmış “Seyid Yusif Ağa, qurbanın olum” adlı şeirinə bəstələdiyi mahnı ilə el içində böyük rəğbət qazanmışdır. Bu ilk bəstə onun yaradıcılıq yolunda mühüm mərhələ olmuşdur.

1997-ci ildən etibarən Azərbaycan Dövlət Televiziyasında yayımlanan bayram tədbirlərində çıxış etmiş, müxtəlif çəkilişlərdə iştirak etmişdir. 1998-ci ildə Bərdə şəhərində yerləşən Xan Şuşinski adına 3 nömrəli 7 illik musiqi məktəbinin fortepiano ixtisası üzrə təhsil almağa başlamış və 2005-ci ildə həmin məktəbi müvəffəqiyyətlə bitirmişdir.

Uğurlar və beynəlxalq tədbirlər

1999-cu il 30 noyabr tarixində Birləşmiş Millətlər Təşkilatının Uşaq Fondu — UNICEF və Ümumdünya Səhiyyə Təşkilatı (WHO) tərəfindən təşkil olunan “Immunization and Health” (Peyvənd və Sağlamlıq) devizi altında beynəlxalq məktəblilər musiqi festivalında fəal iştirakına görə fərqlənmə diplomu ilə təltif olunmuşdur.

2000-ci ildə Gənclər və İdman Nazirliyinin 1 İyun — Uşaqların Beynəlxalq Müdafiəsi Günü münasibətilə təşkil etdiyi istedadlı uşaqlar arasında keçirilən respublika müsabiqəsində birinci yerin qalibi olmuşdur. Həmin il Azərbaycan Respublikası Elm və Təhsil Nazirliyinin təşkil etdiyi Böyük Vətən Müharibəsində qələbənin 55 illiyinə həsr olunmuş “Məktəblilərin I Respublika Xalq Yaradıcılığı Festivalı”nda laureat adına layiq görülmüşdür.

Ali musiqi təhsili və pedaqoji fəaliyyət

2005-ci ildə Azərbaycan Milli Konservatoriyasının nəzdində fəaliyyət göstərən Asəf Zeynallı adına Musiqi Kollecinə daxil olmuş, xalq artisti Nəzakət Teymurovanın sinfində xanəndəlik ixtisası üzrə təhsil almışdır. Bu dövrdə ustadı ilə birgə müxtəlif televiziya layihələrində, ustad dərslərində çıxış etmişdir. Kollecdə təhsil aldığı müddətdə yazı qabiliyyəti ilə də seçilərək “Qəti Söz” qəzetində mədəniyyət yönümlü məqalələrlə çıxış etməyə başlamışdır.

2009-cu ildə hərbi xidmətə yollanmış, Müdafiə Nazirliyinin N saylı hərbi hissəsində hərbi orkestrdə xidmət etmişdir. Xidmət müddətində yüksək intizamı və mədəni tədbirlərdə fəallığı ilə seçilərək komandanlıq tərəfindən dəfələrlə diplomlar və fəxri fərmanlarla təltif olunmuş, ailəsinə təşəkkür məktubları göndərilmişdir. 2010-cu ildə hərbi xidməti başa vuraraq yaradıcı fəaliyyətinə davam etmişdir.

2011-ci ildən Ağdam rayonu Gülablı adına Uşaq Musiqi Məktəbinə “Xanəndə” ixtisası üzrə müəllim kimi təyinat almış, pedaqoji fəaliyyətə başlamışdır. 2012-ci ildə Azərbaycan Milli Konservatoriyasına qəbul olunaraq ali musiqi təhsilini davam etdirmişdir. Hələ birinci kursdan etibarən istedadı və liderlik bacarığı ilə seçilərək Tələbə Gənclər Təşkilatının sədri seçilmiş, konservatoriyanın daxili və beynəlxalq tədbirlərinin təşkilində fəal iştirak etmişdir.

Prezident yanında İdarəçilik Akademiyasında keçirilən Ulu Öndər Heydər Əliyevin anım mərasimində təşkil olunan konsert proqramında iştirakı və təşkilatçılığı ilə diqqət çəkmiş, yüksək mükafatlara layiq görülmüşdür. 2015-ci ildə Mədəniyyət Nazirliyi və Heydər Əliyev Fondunun təşkilatçılığı ilə keçirilən V Muğam Müsabiqəsinə qatılmış, diplomant olaraq mükafatlandırılmışdır.

Media fəaliyyəti və vətənpərvərlik fəaliyyəti

Fərid Əmiraslanov təkcə musiqi sahəsində deyil, həm də media sektorunda uzun illərdir fəaliyyət göstərir. O, mədəni irsin qorunması, muğam sənətinin və milli musiqimizin tanıdılması mövzusunda yüzlərlə məqalə yazmış, tanınmış incəsənət adamlarından imtervyular almışdır.Müxtəlif mətbuat orqanlarında çalışmışdır. O, eyni zamanda, müxtəlif dövlət qurumları ilə — o cümlədən, Daxili İşlər Nazirliyi, Daxili Qoşunlar və Müdafiə Nazirliyi ilə əməkdaşlıq çərçivəsində keçirilən tədbirlərin təşkilində iştirak etmiş, bir çox ssenarilərin müəllifi olmuşdur.

2020-ci ildə baş vermiş 44 günlük Vətən Müharibəsi dövründə və ondan sonrakı mərhələdə şəhid və qazilərimizin xatirəsinə həsr olunmuş tədbirlərin təşkilatçısı kimi çıxış etmiş, bu tədbirlərin ssenarilərini yazmış və icrasını həyata keçirmişdir. Medianın imkanlarından istifadə edərək şəhid və qazi ailələrinin problemlərini işıqlandırmış, vətənpərvər bir ziyalı kimi xalqa və dövlətə xidmət göstərmişdir.

İctimai fəaliyyət və xeyriyyəçilik

Fərid Əmiraslanov sənət, pedaqogika və media sahəsindəki fəaliyyətləri ilə yanaşı, ictimai həyatda da fəal iştirak edir. O, sosial məsuliyyətini yalnız sözlə yox, əməli şəkildə göstərən nadir ziyalılardandır. Onun təşəbbüsü ilə yaradılan “Yardımeli1727” adlı sosial platforma vasitəsilə o, yüzlərlə insana ərzaq, geyim, dərman yardımı göstərmiş, xəstə və sosial durumu ağır olan ailələrə yardım kampaniyaları təşkil etmişdir. Bu platforma həm onun fərdi təşəbbüsü, həm də geniş əhatəli sosial şəbəkəsi vasitəsilə imkanlı şəxslərlə ehtiyac sahibləri arasında körpü rolu oynayır.

“Yardımeli1727” layihəsi çərçivəsində Fərid ətrafındakı xeyirxah insanların dəstəyi ilə tək yaşayan yaşlılara, çoxuşaqlı ailələrə, müalicəyə ehtiyacı olan xəstələrə yardım etmiş, valideyn himayəsindən məhrum uşaqlara dəstək göstərmişdir. Bu fəaliyyətini təbliğ üçün yox, vicdani bir vəzifə kimi həyata keçirən Fərid Əmiraslanov, bu yolla da cəmiyyətin rifahı və sosial həmrəyliyi üçün mühüm töhfələr verməkdədir.

O, daim xalqın içindədir — yalnız səhnədə deyil, həm də insanların həyatında, çətin günündə onların yanında. Bu fəaliyyətlər bir daha onun yalnız sənətkar yox, həm də insanpərvər bir şəxsiyyət olduğunu sübut edir.

Hazırkı fəaliyyət

2022-ci ilin may ayından etibarən Aymediacompany.az saytında Mədəniyyət İşləri üzrə Direktor müavini vəzifəsində çalışır. Hal-hazırda həm musiqiçi, həm pedaqoq, həm də media nümayəndəsi kimi tanınır. Sənətkar bir müğənni olaraq xalq tərəfindən sevilməkdədir. Biz də əməkdaşımıza bu çətin və şərəfli həyat yolunda uğur,müvəffəqiyyət və əzmkarlıq arzu edirik.