Müsahibim gənc xanəndə, Şuşamızın yetirməsi Günay İmamverdiyevadır.
Xanəndə Günay İmamverdiyeva 1 iyun 1990-cı il Şuşa şəhərində anadan olub.1992-ci ildə 1-ci Qarabağ savaşında ailəsi ilə öz-dədə baba yurdlarını tərk edib Bakı şəhərində məskunlaşırlar. 1996-cı ildə Nərimanov rayonu 37 saylı tam orta məktəbdə təhsilinə başlayır. Kiçik yaşlarından musiqiyə marağı olsa da, ailəsi buna icazə vermir. Musiqi sahəsində hər nə qədər təhsil almağa həvəslənsə də, valideynləri razı olmur. Yalnız bibisi Məleykə xanım ona bu işdə dətək durur və sənətinə qarşı daha da stimul verir. 2002-ci ildə Respublikanın əməkdar artisti Aybəniz Haşımovanın “Bülbüllər” musiqi qrupundan ilhamlanan Günay İmamverdiyeva çətinliklə də olsa, bibisinin dəstəyi ilə ailəsini muğam ifaçılığı ilə məşğul olmağa razı salır. 2004-cü ildə Respublikanın xalq artisti, professor Mənsum İbrahimovun yanına gəlir və onun sinfində fərdi hazırlığa başlayır, 1 ildən sonra 2005-ci ildə Bakı humanitar kollecinə daxil olaraq musiqi təhsilinə başlayır. 2008-ci ildə “Xalq ulduzu” yarışmasına qatılır. 3 turu da müsabiqədə keçir və 4 ay davam edən müsabiqədə 3-cü yeri tutur. Təhsilini davam etdirmək arzusunda olan Günay, kolleci bitirib 2009-cu ildə Azərbaycan Milli Konservatoriyasına daxil olur və bakalavr pilləsində təhsil alır. 2011-ci il gənc xanəndə xanımın sənət həyatının dönüş ili olur. Belə ki, o, həm Şuşa musiqi məktəbində müəllim kimi pedoqoji fəaliyyətə başlayır, həm də Heydər Əliyev fondunun, Azərbaycan Televiziyası və Mədəniyyət nazirliyinin birgə layihəsi olan “muğam televiziya müsabiqəsinə” qatılaraq geniş tamaşaçı kütləsi qarşısında hər həftə ecazkar muğamımızı yüksək şəkildə tamaşaçılarımıza çatdırır. İstər münsiflər heyyətinin, istərsə də xalqımızın böyük rəğbətini qazanır və müsabiqədə son həftəyə qədər gələrək “diplomant” adına layiq görülür. 2012–ci ildən Azərbaycan Dövlət Televiziya və Radiosunun solisti olur. Bu xətlə beynəlxalq tədbirlərə qatılmağa başlayır. 2013-cü ildə ilk səfəri olaraq hər il Macaristanda keçirilən Macaristanın Göngoş şəhəri ilə Şuşanın qardaşlığı adlı musiqi festivalına bir Şuşalı olaraq qatılır və milli musiqilərimizi böyük məharətlə təqdim edir. 2013-2015-ci illərdə AMK-nın “magistr” pilləsi üzrə təhsil alır.
2014-cü ildə Azərbaycanın Fransada mədəniyyət günləri keçirilir və Dövlət Flarmoniyasının ansambılı ilə Günay İmamverdiyeva sənət dostları ilə “Qarabağ şikəstəsi” və “Şuşanın dağları” mahnısını ifa edərək avropada yaşayan soydaşlarımıza və dinləyicilərə gözəl musiqi zövqü yaşadır. Pedoqoji fəaliyyəti ilə seçilən gənc sənətçinin tələbəsi Fatimə Hüseynova da məhz 2015-ci ildə muğam müsabiqəsinə qatılaraq müsabiqənin diplomantı adına layiq görülür. Sənətçinin uğurları ard-arda bir-birini izləyir və Beynəlxalq tədbirlərə silsilə musiqi festivallarına qatılır. İtaliyanın Milan şəhərində, Çin xalq Respublikasında, İsveçdə, Finlandiyada, Vyanada, Çexiyanın Praqa şəhərində tək solo konserti təşkil olunur və geniş tamaşaçı kütləsi qarşısında 1 saat 20 dəqiqəlik möhtəşəm bir konsert ifa edir. 2017-ci ildə AMK-nın “İnstrumental muğam” kafedrasının “konsertmeystr müəllim” vəzifəsinə təyin olunur. 2020-ci ildən isə Beynəlxalq Muğam Mərkəzinin solisti təyin edilir. 2023-cü ildə Çində keçirilən “İpək yolu” festivalında iştirak edərək Azərbaycanı təmsil edir. Zəfər gününə həsr olunan Türkiyənin Ankara şəhərində keçirilən “Şuşa günləri”, Bosniya və Hersoqovinada keçirilən “Zəfər konserti” gənc sənətçinin mədəniyyətimizə xidmətinin yüksək sənət fəaliyyətinin bariz nümunəsidir. Sənətçiylə söhbətimizdə bildirir ki, onun üçün bütün uğurların ən yüksəyində duran, müstəsna rolu olan səhnə, məhz 2021-ci ildə doğulduğu doğma Şuşa şəhərində keçirilən, Cənab Prezidentimizin də iştirak etdiyi “Xarı bülbül” musiqi festivalında sənət dostu Mirələm Mirələmovla birlikdə “Qarabağ” mahnısını ifa etdikləri səhnə olub. Sənətçi bu konsertin onun üçün ən yüksək nəaliyyət, həm də mənəvi bir güc, xoşbəxtlik olduğunu duyğulanaraq bildirir. Çünki o, doğulduğu doğma diyarda ifasıyla mənəvi rahatlıq tapıb.1 yaşında Şuşanı tərk edib, illər sonra vətənə geri dönüb belə möhtəşəm abu-havada olmaq da ayrı bir xoşbəxtlikdir. Sənətçinin uğurlarını dinlədikcə gənc yaşda bu qədər uğura sahib olmağı bizi həqiqətən də fərəhləndirdi. Azərbaycan musiqi və mədəniyyətinə xidmət etməyi özünə şərəf və ləyaqət, vicdan yükü bilən belə gənc sənətçilərimizin daha çox olması diləyi ilə biz gənc xanəndəmizə sənət yolunda uğur və müvəffəqiyyət, daim zirvələrdə olmağı arzu edirik.
Fərid Əmiraslanov
"AYMEDİACOMPANY.AZ"
