Bu günkü müsahibim hər birimizin mavi ekranlardan tanıdığımız gənc xanəndə, muğam müəllimi Sədəf Budaqovadır.
Sədəf Budaqova 1995-ci il 1 fevralda Bakı şəhərində anadan olub. İlk təhsilini (2001-2012) Laçın şəhəri 11 saylı orta məktəbdə alıb. Hələ yeniyetmə dövrlərində incəsənətə, musiqiyə, muğamlarımıza böyük həvəs göstərib. Baxmayaraq ki, ailədə Sədəfdən başqa musiqiylə məşğul olan olmayıb, ancaq onun musiqiyə sevgisi bu peşənin arxasınca getməyə sövq edib. Atası Mehdi müəllim ilk başlarda onun bu peşənin arxasınca getməsinə razı olmasa da, sonralar Sədəfin həvəsi, kiçik yaşlarda el şənliklərində auditoriya qarşısında çıxışları, insanlardan gördüyü məhəbbət, aldığı alqışlar atası Mehdi müəllimin Sədəfin musiqi ilə məşğul olmasına səbəb olub. Bundan sonra Sədəf, ailəsinin də dəstəyi ilə ilk musiqi təhsilini (2007-2012) Xırdalan şəhər 5 illik uşaq musiqi məktəbinə qəbul olaraq alır. İlk müsabiqəsini burada 2011-ci ildə Beynəlxalq muğam mərkəzində Gənclər və İdman, Mədəniyyət nazirliyinin yardımı, Paşa bankın baş sponsorluğu, İctimai televiziyanın informasiya dəstəyi ilə "Kainat" Gənclik Mərkəzinin təşkil etdiyi III Beynəlxalq uşaq muğam festivalında baş mükafat - "Qran–Pri" qazanır. Eyni ildə Heydər Əliyevin anadan olmasının 89 illiyinə həsr olunmuş müsabiqədə I yerin qalibi, Türkiyədə keçirilən IX Beynəlxalq ifaçıların festivalında iştirakçı olur. 2012-ci ildə AMK nəzdində Asəf Zeynallı adına musiqi kollecinə daxil olur və Xalq artisti Gülyaz Məmmədovanın sinfində muğam biliklərinə yiyələnir.
Həmin il Xan Şuşinski adına Respublika Muğam Festivalında uğurlu çıxışına görə Fəxri fərmanla təltif olunur, həmçinin Vokal sənətinin banisi, Bülbülün 115 illik yubileyinə həsr olunmuş “Milli musiqi alətləri ifaçıları və Xanəndələri"n müsabiqəsində III yerin sahibi olur. 2015-ci il A.Zeynallı adına musiqi kollecini bitirdikdən sonra həmin il sənətinin ən parlaq ilini yaşayır və Heydər Əliyev fondunun dəstəyi, Azərbaycan televiziyasının, Mədəniyyət nazirliyinin dəstəyi ilə keçirilən 2015-ci il 5-ci muğam televiziya musabiqəsinin seçim turlarını keçərək müsabiqədə iştirak edir və göstərdiyi uğurlu çıxışlarla tamaşaçıların, münsiflər heyyətinin böyük rəğbətini qazanır. Müsabiqədə sona qədər iştirak edərək 3-cü yerin sahibi- diplomant adına layiq görülür, sənətinin ən çiçəklənən dövrünə qədəm qoyur. Eyni ildə Azərbaycan Milli Konservatoriyasına daxil olur, burda da Mənsum müəllimin sinfində bakalavr səviyyəsində ali təhsilini almağa davam edir. Həm televiziyalara, həm dövlət tədbirlərinə, həm də el şənliklərinə dəvət alır.
2016–cı ildə Qazaxıstan və Qırğızıstan respublikalarında keçirilən 14-cü "Dil və Mədəniyyət" festivalının iştirakçısı olur. 2017–ci ildə Rusiya Federasiyasının Yekaterinburq şəhərində keçirilən Beynəlxalq Delphin oyunlarında Bürünc medal qazanır. Həmin il böyük uğurlu yolun davamı olaraq Azərbaycan Dövlət Akademik Opera və Balet teatrının dəvəti ilə “Əsli və Kərəm” operasında Əsli rolunu ifa edir. Operada çıxışı ilə də tamaşaçı rəğbəti qazanır. Ölkəmizin hüdudlarından kənarda Azərbaycan mədəniyyəti günlərində iştirak edir. Beynəlxalq müsabiqələrdə və dövlət tədbirlərində milli musiqilərimizi ecazkarlıqla təbliğ edir. 2018-ci ildə Sumqayıt musiqi kollecində müəllim kimi fəaliyyətə başlayır və Pedoqoji fəaliyyəti ilə milli musiqimiz olan muğamımızı öz tələbələrinə böyük istəklə öyrətməyə başlayır. 2018-ci ildə Kuveyt dövlətinin Əbdülhəsən Əbdülrıda Teatrında Azərbaycan Xalq Cümhuriyyətinin 100 illik yubileyi ilə əlaqədar Üzeyir Hacıbəyli adına Bakı Musiqi Akademiyasının "Baku Chamber Orchesta" kamera orkestri ilə müvəffəqiyyətli bir çıxışı olur. 2019-cu ilin sentyabrın 27-də Fransanın Strasburq şəhərində İmadəddin Nəsiminin 650 illiyi və UNESCO üzrə Azərbaycan Milli Komissiyasının 25 illiyi münasibətilə “Qarabağ” muğam qrupunun ifasında konsert keçirilir. Azərbaycanın Avropa Şurası yanında Daimi Nümayəndəliyi və UNESCO üzrə Azərbaycan Milli Komissiyasının Strasburqun mərkəzində yerləşən qədim Sən-Pyer-lö-Jön (Saint-Pierre-le-Jeune) kilsəsində birgə təşkil etdiyi konsertdə Avropa Şurası rəsmiləri, diplomatik korpusun təmsilçiləri, yerli akademik və ictimai dairələrin nümayəndələri, habelə Azərbaycan icmasının üzvləri iştirak edirlər. Bu tədbirdə Sədəf Budaqova Nəsiminin qəzəlləri üzərində köklənən füsunkar muğam nümunələri ifa edir və beynəlxalq aləmdə muğamlarımızı bir daha tanıtdırmağa köklənir. AMK-nı 2020-ci ildə bitirdikdən sonra 2021-ci ildə AMK-nın magistr pilləsi üzrə daxil olur və təhsilini alaraq 2023-cü ildə bitirir. Gənc yaşa bu qədər uğurları sığışdırmağı bacarmaq özü böyük məharət və qoçaqlıq tələb edir. Çünki əziyyətin hər zaman bəhrəsi olur. Biz də gənc sənətçiyə bu işıqlı yolda uğurunun davamını arzulayırıq.
Fərid Əmiraslanov
"AYMEDİACOMPANY.AZ"
