1833-cü il Çikaqo şəhərinin əsası qoyulub.
1851-ci il. Amerikalı dərzi İsaak Merrit Zinger məkiklə işləyən ilk tikiş maşınını patentləşdirib. “Singer” adlı tikiş maşınının yaradılmasına dərzi cəmi 11 gün vaxt sərf edib. Həmin il o, tərəfdaşı Edvard Klarkla birgə bu tikiş maşınlarını istehsal edən “Singer Company” şirkətini yaradıb. 1855-ci ildə Parisdə keçirilən dünya sərgisində “Singer” birinci yeri tutub.
1865-ci il. Cərrahi əməliyyat zamanı ilk dəfə karbol turşusundan (fenol) istifadə edilib. Əməliyyatlardan sonra ölüm hallarının artmasının səbəblərini araşdıran ingilis cərrah Cozef Lister buna infeksiyaların səbəb olduğunu anlayıb. O, 1865-ci ildə ilk dəfə alətlərin və cərrahın əllərinin dezinfeksiya olunması üçün karbol turşusundan (fenol) istifadə edib. Bununla da əməliyyatlardan sonrakı ölüm halları 45 faizə düşüb.
Azərbaycanın tanınmış pedaqoq alimi Fərhad Ağazadə 1880-ci ilin bu günü Qarabağın mərkəzi Şuşada dünyaya gəlib. Qori Seminariyasını bitirdikdən sonra Bakı, Şuşa, Gəncə və Xaçmazda müəllimlik edən F.Ağazadə Azərbaycan Müəllimlərinin I və II qurultaylarının iştirakçısı da olub. İnqilabdan əvvəl yazdığı məqalələrdə icbari təhsil, ana dilində məktəblər və müəllim seminariyaları açılması tələblərini irəli sürüb, dərslik və proqramlar tərtib edib. Sovet hakimiyyəti illərində bir sıra qəzet və jurnallarda işləyib. Ümumittifaq Mərkəzi Yeni Türk Əlifbası Komitəsinin üzvü olub. Fərhad Ağazadə “Türk dilinin dirilmək və zənginləşmək yolları”, “Türk dilində vurğu məsələsi”, “Qramer” kitablarının müəllifidir. (1880-1931)
Azərbaycan aktyoru və rejissoru Mir Seyfəddin Kirmanşahlı 12 avqust 1892-ci ildə anadan olub. 1908-ci ildə İrandan Tiflisə gəlib, teatr təhsilini əvvəl burada, sonra Moskvada alıb. Yaradıcılığının əsas dövrü Tiflis-Azərbaycan teatrı ilə bağlıdır. Əsasən baş rollar oynayıb. XX əsrin 20-ci illərindən Azərbaycan Dram Teatrında aktyor və rejissor kimi fəaliyyət göstərən, Bakı Teatr Texnikumunda dərs deyən, bir sıra filmlərdə çəkilən Mir Seyfəddin Kirmanşah 1930-ci ildə İrana qayıdıb, Təbriz və Tehran şəhərlərində işləyib. (1892-1933)
1912-ci il Kanadaya bir il ərzində qaradərili insanların gəlməsi qadağan edilib.
1926-cı ilin bu günü Azərbaycanın Xalq Şairi Qabil (Qabil İmamverdiyev) anadan olub (1926-2007). O, 1976-cı ildə Azərbaycan SSR Dövlət mükafatına,1996-cı ildə “Şöhrət”, 2006-cı ildə “İstiqlal 2” ordenlərinə, 1980-ci ildə “Əmək igidliyinə görə” medalına və digər mükafatlara layiq görülüb. Şair “Mənim mavi Xəzərim”, “Ömrüm boyu”, “Nəsimi”, “Ömrün həbləri” kimi bir sıra kitabların müəllifidir.
Məşhur agent Ceyms Bond obrazını yaradaraq əsərlərilə onu bütün dünyaya tanıdan ingilis yazıçısı Yan Fleminq (İan Lancaster Fleming) 1964-cü ilin 12 avqustunda 56 yaşında həyatdan köçüb. (1908-1964)
1976-cı il. Azərbaycan Elmi-Tədqiqat Üzümçülük və Şərabçılıq İnstitutu yaradılıb. Bu institut respublikamızda üzümçülük və şərabçılıq sahəsinin inkişafını təmin etmək və tənzimləmək üçün təsis olunub. İnstitutda yaradılan üzüm sortları 1998-ci ildə Madriddə Beynəlxalq Üzüm və Şərab Təşkilatının “Ticarət Liderləri Klubu” tərəfindən keçirilən müsabiqədə mükafata, 2002-ci ildə isə Meksikanın Milli Marketinq İnstitutunun “Almaz Ulduz” mükafatına layiq görülüb.
Kıbrısda (Kipr) rumların türklərə silahlı hücumlarını artırması və Yunanıstanla birləşmə istəklərinə qarşı Türkiyə döyüş təyyarələrinin ada üzərində uçuşları Birləşmiş Millətlər Təşkilatı Təhlükəsizlik Şurasının çağırışı ilə 1964-cü ilin 12 avqustunda sona çatdı. BMT Kıbrıs adasında iki cəmiyyətli tampon bölgə yaratmaq üçün qərar verdi.
Avqustun 12-si Beynəlxalq Gənclər Günüdür. 1998-ci il avqustun 8-dən 12-dək Lissabonda gənclərlə iş üzrə nazirlərin iştirakı ilə keçirilən beynəlxalq konfransda hər il avqustun 12-nin dünyada Gənclər Günü kimi qeyd olunması qərara alınıb. Bu gün gənclərə lazımi diqqət göstərmək, onların nailiyyətlərini təbliğ etmək, cəmiyyətin bütün sahələrində gənclərin iştirakına təkan vermək məqsədilə qeyd olunur.
12 avqust 2000-ci ildə Rusiyanın Şimal Donanmasının Barents dənizində apardığı genişmiqyaslı manevrlərin gedişində “Kursk” K-141 atom sualtı qayığı qəzaya uğrayaraq 107 metr dərinliyə çökdü. Əcnəbi mütəxəssislərin də qoşulduğu xilasetmə işləri heç bir nəticə vermədi, sualtı qayıqdakı 118 matrosun hamısı həlak oldu. Sonrakı tədqiqatlar göstərib ki, faciəyə səbəb qayığın torpedo hissəsində nasazlıq və bunun nəticəsində özbaşına açılan atəş olub.
