1092-ci ilin 14 oktyabrında Orta əsr Şərq dünyasının görkəmli siyasətçilərindən olan Nizamülmülk 73 yaşında qətlə yetirilib. Səlcuq dövlətində geniş cəsusluq şəbəkəsinin yaradılması Alp Aslan və Məlikşahın dövründə baş vəzir olan Nizamülmülkün adı ilə bağlıdır. Onun dövlət idarəçiliyindən bəhs edən məşhur “Siyasətnamə” əsəri ən dəyərli tarixi mənbələrdən biri sayılır. (1019-1092)

14 oktyabr 1743-cü ildə Şirvanda üsyan: Üsyançılar Ağsu şəhərini ələ keçirdilər.

1843-cü il oktyabrın 14-ündə Potsdamda “Yay gecəsi yuxusu” tamaşasında Feliks Mendelson Bartoldinin bu komediyaya yazdığı musiqi nömrələrindən biri – “Toy marşı” ilk dəfə səslənib. 1858-ci ildə Prussiya kralı IV Fridrix Vilhelmlə Böyük Britaniya şahzadəsi Viktoriya Adelgeyin toy mərasimində ifa olunduqdan sonra geniş yayılıb və dünyada şöhrət tapıb.

14 oktyabr 1884-cü ildə Amerikalı biznesmen Jorj İstman fotolenti patentləşdirib. J.İstman “Eastman Kodak” şirkətinin tərtibatçısı və qurucusudur.

14 oktyabr 1905-ci ildə Beynəlxalq Aeronavtika Federasiyasının əsası qoyulub. 1905-ci il oktyabrın 12-də Parisdə aeronavtika üzrə beynəlxalq konfrans keçirilib. Almaniya, Böyük Britaniya, İtaliya, İspaniya, ABŞ kimi bir sıra ölkələrin nümayəndələrinin iştirak etdiyi tədbirdə bu federasiyanın təsis olunması haqda qərar qəbul olunub. Qəbul olunmuş qərara əsasən təşkilat 1905-ci il oktyabrın 14-dən idman federasiyası kimi fəaliyyətə başlayıb.

14 oktyabr 1913-cü ildə İngiltərənın Senqhenid (Senghenydd) rayonunda kömür mədəni qəzası baş verdi və 439 nəfər dünyasını dəyişdi.

1924-cü il 14 oktyabrda Qırğızıstana SSRİ tərkibində muxtar respublika statusu verildi. 1936-cı ildə isə Qrığızıstan Sovet Sosialist Respublikası oldu.

14 oktyab 1924-cü ildə Tacikistan SSR yaradıldı.

14 oktyabr 1926-cı il Londonda Vinni-Pux haqda ilk hekayə çapdan çıxdı.

XX əsr Azərbaycan poeziyasının görkəmli nümayəndələrindən olan xalq şairi Məmməd Araz 1933-cü ilin bu günü anadan olub. Bədii yaradıcılığa 19 yaşından (1952) başlayan şairin həmin vaxtdan onlarla kitabı işıq üzü görüb və məşhurlaşıb. (1933-2004)

14 oktyabr 1933-cü ildə Adolf Hitler Cenova Tərksilah Konfransına qatılmayacağını və Almaniyanın Millətlər Cəmiyyətindən ayrılacağını bildirdi.

14 oktyabr-Dünya Standartlaşdırma Günüdür. Beynəlxalq Standartlaşdırma Təşkilatının (İSO) yaranması haqqında qərar 1946-cı ildə Londonda 25 ölkədən 65 nümayəndə heyətinin iştirak etdiyi konfransda qəbul olunub. Bu günün qeyd olunması isə 1970-ci ildə İSO prezidenti Faruk Sunterin təklifi ilə, standartlaştırmanın dünya iqtisadiyyatındakı rolunun vacibliyini vurğulamaq məqsədilə qərara alınıb. Azərbaycanda texniki tənzimləmə, standartlaşdırma sahəsi ilə bağlı dövlət siyasətini həyata keçirən Standartlaşdırma, Metrologiya və Patent üzrə Dövlət Komitəsi (SMPDK) 2010-cu il yanvarın 1-dən Avropa Standartlaşdırma Komitəsinin (CEN) müşahidəçi qismində üzvüdür. 2011-ci ildən komitə Azərbaycanın adından Beynəlxalq Elektrotexniki Komissiyanın (İEC) tərəfdaş üzv ölkə proqramına qoşulub.

14 oktyabr 1947-ci ildə ABŞ-ın test pilotu (Çak) Çarlz Elvud Yeqer (Chuck-Charles Elwood Yeager) səs divarını aşan ilk adam sayıldı.

14 oktyabr məşhur rusiyalı fizik Abraam İoffenin xatirə günüdür. Alim ilk dəfə ion kristallarının elektrikkeçirmə mexanizmini izah edib, kristalların plastikliyi və möhkəmliyinə dair mühüm nəticələr alıb. Yarımkeçiricilərin xassələrini xarakterizə edən əsas kəmiyyətləri təyin etmək üçün üsul yaradan Abraam İoffenin tədqiqatları yarımkeçiricilər texnikasının yeni sahələrinin inkişafına təkan verib. (1880-1960)

14 oktyabr 1964-cü ildə Leonid Brejnev Sov.İKP MK-nın Birinci Katibi seçilməklə Sovet İttifaqının rəhbəri oldu.

1964-cü ilin 14 oktyabrında ABŞ-ıın qara dərili keşişi Martin Lüter Kinqə (Martin Luther King) Nobel Sülh Mükafatı verildi.

14 oktyabr 1968-ci ildə amerikalı idmançı Cim Hayns (Jim Hines) Meksikada keçirilən olimpiadalarda 100 metri 10 saniyədən az vaxta tamamlayan (9,95 s) ilk adam oldu. Rekord 15 il - 1983-cü ilə qədər qədər yenilənmədi.

1973-cü il 14 oktyabrda Tailand universiteti tələbələrinin demokratik hökumət üçün etiraz mitinqində 77 adam həyatını dəyişdi, 857 nəfər yaralandı.

14 oktyabr 1974-cü ildə Azərbaycanın Xalq Rəssamı, Əməkdar İncəsənət Xadimi, Dövlət mükafatı laureatı Səttar Bəhlulzadə vəfat edib (1909-1974). Azərbaycan rəssamlıq məktəbinin ən görkəmli nümayəndələrindən olan Səttar Bəhlulzadə yaradıcılığına Əzim Əzimzadənin rəhbərliyi ilə “Kommunist” qəzetində dövrə uyğun məzmunlu ilk karikaturalarının çap olunması ilə başlayıb. Rəssamın əsərləri R.Mustafayev adına Azərbaycan Dövlət İncəsənət Muzeyində və Azərbaycan Dövlət Şəkil Qalereyasında, eləcə də Moskva və başqa şəhərlərin muzeylərində saxlanılır. S.Bəhlulzadə "Xəzər üzərində axşam", "Xəzər gözəli", "Əbədi məşəllər", "Kəpəzin göz yaşları", "Vətənimin baharı", "Azərbaycan nağılı” kimi bir çox əsərlərin müəllifidir. Rəssamın fərdi sərgiləri Əlcəzair, Misir, Livan, Suriya Tunis, Norveç, ADR, Çexoslovakiya, Bolqarıstan, İraq, Kuba, Kanada, Belçika, Fransa, Yaponiya və başqa ölkələrdə nümayiş etdirilib. Dünyanın onlarla muzeylərində S.Bəhlulzadənin əsərləri daimi eksponatlar sırasındadır. Rəssam haqqında “Bu, Səttar Bəhlulzadədir” (1969), “Səttar Bəhlulzadə” (1988) və s. filmlər çəkilib.

14 oktyabr 1981-ci ildə Ənvər Sədat sui-qəsd nəticəsində öldürülüncə yerinə Hüsnü Mübarək keçdi. O, 30 il Misirin prezidenti oldu.

14 oktyabr 1994-cü ildə Yasir Ərəfat, Şimon Peres və İshak Rabinə Nobel Sülh Mükafatı verildi.

14 oktyabr 2006-cı ildə “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyi Azərbaycan Respublikasının qanunlarına uyğun olaraq Ədliyyə Nazirliyində qeydiyyatdan keçib. İcma 1992-ci il martın 24-də ATƏM-in Nazirlər Şurasının Helsinkidə keçirilən birinci əlavə görüşündə imzalanmış sənədin 9-cu bəndinə əsasən yaradılıb. “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyi 1992-ci ildən başlayaraq Qarabağ münaqişəsinin nizama salınması istiqamətində müxtəlif vaxtlarda aparılan danışıqlarda iştirak edib.

14 oktyabr 2009-cu ildə Bursada Türkiyə və Ermənistan milli komandaları arasında futbol matçı keçirildi.