23 oktyabr 732-ci ildə Puatye döyüşündə ərəblər məğlub oldular.
23 oktyabr 1714-cü ildə Səfəvi hökmdarı Sultan Hüseynin nümayəndəsi Məhəmməd Rza bəy Marseldə Fransa kralı XIV Lüdovik tərəfindən qəbul edildi.
Azərbaycan klassik ədəbiyyatının görkəmli nümayəndələrindən biri Seyid Əbülqasım Nəbati 1812-ci ilin bu günü Təbrizdə anadan olub. Həm klassik Şərq, həm də aşıq şeiri tərzində əsərlər yaradan Nəbatinin qəzəlləri bu gün də aşıqlar və xanəndələr tərəfindən sevilə-sevilə oxunur. (1812-1873)
Məşhur Amerika fiziki, Nobel mükafatı laureatı, bərk cisim fizikası metodlarının banilərindən olan Feliks Blok (Felix Bloch) 1905-ci ilin bu günü anadan olub. O, kristalların kvant nəzəriyyəsi və aşağı temperaturlu ferromaqnetizmin əsasını qoyub. (1905-1986)
Azərbaycan və Gürcüstanda işgüzar səfərdə olmuş italiyalı kommersant Korsi “Koppegena della sera” qəzetinin 1919-cu il 23 oktyabr saylı nömrəsinə verdiyi müsahibədə Azərbaycanın müstəqillik uğrunda əzmlə mübarizə apardığını qeyd edib. Korsi deyirdi: “Hər iki respublikanın müstəqilliyi ən qısa vaxtda Versal Sülh Konfransı tərəfindən tanınmalıdır”.
23 oktyabr 1940-cı il. Dünya futbol tarixinin ən məşhur futbolçusu Pelenin (Edison Arantes do Nascimento) doğum günü. O, Braziliya milli komandası ilə 3 dəfə Dünya Kubokunu qazanıb. Karyerası ərzində vurduğu 1281 qolla rekord müəyyənləşdirib. "Qara mirvari" ləqəbli futbolçu karyerasını 1977-ci ildə bitirib. Braziliya hökuməti Peleni "Milli sərvət" elan edib.
23 oktyabr 1946-cı ildə Nyu-Yorkda BMT-nin Baş Assambleyasının ilk iclası keçirilib. 1945-ci ildə yaradılmış BMT-nin qərargahı Nyu-York şəhərində yerləşir. Əsas vəzifəsi beynəlxalq sülhü və təhlükəsizliyi qorumaq və möhkəmlətmək, dövlətlər arasında əməkdaşlığı inkişaf etdirməkdir. Hazırda 193 ölkə bu təşkilatın üzvüdür. 1992-ci ildən BMT-nin üzvü olan Azərbaycan Respublikası 2011-ci ildə BMT Təhlükəsizlik Şurasının iki illiyə (2012-2013) qeyri-daimi üzvü seçilib.
23 oktyabr 1954-cü ildə Qərbi Almaniyanın NATO üzvlüyünə girməsi üçün Paris Müqaviləsi imzalandı.
1956-cı ilin 23 oktyabrında Macarıstanda SSRİ-nin işğalı və suverenliyinə qarşı üsyan başladı. Bütün ölkəyə yayılan nümayişlərdə Sovet əsgərlərinin ölkədən çıxması tələb olunurdu. SSRİ Macarıstanı işğal qərarı verdi və Qızıl Ordu paytaxt Budapeşti mühasirəyə aldı. Baş nazir İmre Naqi (İmre Nagy) Sovetlərə qarşı BMT-dən kömək istədi, ancaq gözlədiyi dəstəyi almadı.
23 oktyabr 1958-ci ildə SSRİ "Hidroproyekt" institutu tərəfindən hazırlanmış layihə əsasında Asuan bəndinin tikintisinə maliyyə vəsaiti ayırdı.
1973-cü il 23 oktyabrda ABŞ prezidenti Riçard Nikson (Richard Nixon) "Watergate" qalmaqalı ilə bağlı “Dəyirmi ofis” (Oval Ofis) səs qeydlərini məhkəməyə təhvil verməyi qəbul etdi.
23 oktyabr 1978-ci ildə Ümummilli lider Heydər Əliyevin qərarı ilə Naxçıvan Muxtar Respublikasında Babək rayonu yaradılıb. Şimal-qərbdə Ermənistan, cənubda İranla həmsərhəddir. 35 kəndi var. Rayon mineral sularla zəngindir. Sirab və Vayxır mineral su bulaqları dünyada məşhurdur.
23 oktyabr 1983-cü ildə Livanın paytaxtı Beyrutda Amerika və Fransa Sülh Qüvvələri qərargahlarına partlayıcı olan yük maşını ilə intihar hücumu olundu: 241 Amerika dəniz piyadası, 58 Fransa əsgəri öldü.
23 oktyabr 2000-ci ildə Pensilvaniya Universiteti alimləri yaşı 250 min il olan bakteriya aşkar etdilər.
23 oktyabr 2006-cı ildə Lerik rayonuna ilk dəfə təbii qaz verilib. Rayona qazın verilməsi mərasimində Prezident İlham Əliyev iştirak edib. Lerik və Yardımlı rayonlarının qazlaşdırılması üçün hələ ötən əsrin 80-ci illərində layihə-smeta sənədləri hazırlanmış, 90-cı illərdə müəyyən işlər görülmüşdü. Lakin bu layihə yarımçıq qalmış, o vaxt çəkilmiş borular da yararsız hala düşmüşdü. Prezident İlham Əliyev 2005-ci ilin payızında bu bölgəyə səfəri zamanı həmin rayonların qazlaşdırılması barədə tapşırıq vermişdi.
23 oktyabr 2011-ci ildə Vanda Türkiyə Cümhuriyyəti tarixində ən böyük iki zəlzələ baş verdi. Birinci 6,7 bal gücündəki zəlzələdən 18 gün sonra ikinci 7,2 bal gücündə zəlzələ oldu. Hər iki zəlzələdə birlikdə 644 adam həyatını itirdi, 4 mindən çox adam yaralandı.
