Dəniz səyyahı, rus donanmasının zabiti Vitus Berinq 1741-ci ilin bu günü vəfat edib. Danimarka əsilli Berinq 1725-1740-cı illərdə 1-ci və 2-ci Kamçatma eskpedisiyalarının rəhbəri olub. Asiya və Şimali Amerika arasındakı boğaz Berinq dənizi və ada onun şərəfinə adlandırılıb. (1681-1741)

8 dekabr 1863-cü ildə Çillinin paytaxtı Santyaqoda tarixi bir kilsədə çıxan yanğında 2 mindən çox adam həyatını itirdi.

İlk işıqlı yol lampaları 1868-ci ilin 8 dekabrından Londonda istifadə edilməyə başlandı.

İlk azərbaycanlı epidemioloq, professor İsmayıl Axundov 1897-ci il dekabrın 8-də Şamaxı şəhərində dünyaya göz açıb. 1919-cu ildə həmin il təsis olunan Bakı Dövlət Universitetinin tibb fakültəsinə daxil olan İsmayıl təhsilini Almaniyada Lüdviq Maksimilian adına Münhen Universitetində davam etdirib, Hamburq Universitetində isə məşhur alim Martinin asisstenti olub. Doktorluq dissertasiyasını müdafiə etdikdən sonra ixtisası ilə bağlı Konqo, Əlcəzair, Tunis və Nigeriyada malyariya və sarı qızdırma epidemiyaları ilə mübarizə aparıb. İsmayıl Axundov Azərbaycan Tibb Universitetində epidemiologiya kafedrasını yaradıb. (1897-1952)

Azərbaycanın tanınmış səhnə ustası, xalq artisti Mərziyyə Davudova 1901-ci ilin bu günü Həştərxanda anadan olub. 1918-ci ildə Hüseyn Ərəblinski Həştərxanda qastrolda olarkən onun rolunu bəyənib və Bakıya dəvət edib. Mərziyyə Davudova Cəfər Cabbarlının əsərlərindəki qadın rollarının ilk ifaçısı olub. Onun səhnə ustalığı Hüseyn Cavid, Səməd Vurğun, həmçinin rus və Qərbi Avropa dramaturqlarının əsərlərindəki mürəkkəb xarakterli obrazların təqdimatında öz əksini tapıb. M.Davudova həm də kino aktrisası kimi tanınır. (1901-1962)

SSRİ xalq artisti, “Karandaş” təxəllüsü ilə tanınan Mixail Rumyantsev 1901-ci ilin 8 dekabrında Sankt-Peterburqda dünyaya gəlib. Akrobatika, gimnastika, jonqlyorluq və heyvan təlimi nömrələri ilə çıxış edən M.Rumyantsev daha çox sirk artisti və kloun kimi məşhurlaşıb. O, öz təxəllüsünü fransız karikaturaçı-rəssam Karan Daşın adından götürüb. Xarici ölkələrdə də Mixail Rumyantsevin mahir oyunları sevilərək izlənilib. (1901-1983)

1953-cü ilin 8 dekabrında Türkiyə Milli Futbol Komandası İspaniya millisini yenərək Dünya Çempionatında iştirak etməyə vəsiqə qazandı.

1966-cı il 8 dekabr tarixində ABŞ və SSRİ atom silahlarının fəzaya buraxılmasının qadağan edilməsi haqqında razılaşmaya imza atdılar.

1974-cü il 8 dekabr tarixində Yunanlar referendumda böyük səs çoxluğu ilə monarxiyanın ləğv olunması və respublikanın yaradılması lehinə səs verdilər.

1980-ci ilin bu günü Nyu-York küçələrinin birində əfsanəvi “Beatles” qrupunun rəhbəri, 40 yaşlı Con Lennon (John Lennon) qətlə yetirildi. Hadisəyə bir neçə saat qalmış onun qatili Mark Devid Çempen (Mark David Chapman) məşhur musiqiçidən avtoqraf almışdı. Üstündən illər keçsə də, bu cinayətin səbəbi hələ aydınlaşdırılmayıb. Qeyd edək ki, məhkəmə Çempeni ruhi xəstə hesab edib.

1987-ci il 8 dekabr tarixində Vaşinqtonda Ronald Reyqan və Mixail Qorbaçov "Nüvə başlıqlı orta mənzilli raketlərin məhdudlaşdırılması" barədə müqaviləni imzaladılar.

8 dekabr 1987-ci ildə Fələstində Birinci İntifada Hərəkatı başladı. Bir yəhudinin sürdüyü yük maşınının İsraildə çalışan 4 fələstinli fəhləni aparan avtomobillə toqquşması və hadisə zamanı fələstinlilərin ölümünə etiraz olaraq başlayan nümayişlər qısa müddətdə bütün Fələstini bürüyən üsyan hərəkatına çevrildi. Fələstin xalqı bütün siyasi fərqliliklərini bir kənara buraxaraq İsrailin zorakılığına qarşı ortaq etiraz nümayişləri təşkil etdilər.

1989-cu il 8 dekabr tarixində Ermənistanın Azərbaycana qarşı ərazi iddiaları silahlı hücumlarla müşayiət olunmağa başlayıb. Erməni silahlı dəstələrinin Azərbaycanın sərhəd bölgələrinə intensiv basqınları baş verib. Bu zaman azərbaycanlıların Ermənistandan deportasiyası tamamilə başa çatdırılıb, Dağlıq Qarabağdakı azərbaycanlı əhaliyə qarşı etnik təmizləmə həyata keçirilməyə başlanılıb. Dekabrın ikinci yarısında erməni silahlı dəstələrinin təxribatçı hücumları keçmiş Dağlıq Qarabağ Muxtar Vilayətinin hüdudlarından kənara çıxıb.

1991-ci il 8 dekabr tarixində Belarusun Brest şəhəri yaxınlığındakı “Belovejskaya Puşşa” qoruğundakı “Viskuli” hökumət iqamətgahında Rusiya, Ukrayna və Belarusun rəhbərləri Boris Yeltsin, Leonid Kravçuk və Stanislav Şuşkeviç “Müstəqil Dövlətlər Birliyinin yaradılması haqqında” bəyanat imzalayıblar. Həmin sənədlə SSRİ-nin təşkilinə dair 1922-ci il 30 dekabr tarixli ittifaq müqaviləsinə xitam verilib. Bununla da Sovet İttifaqı yaranmasının 69-cu ildönümünə üç həftə qalmış süqut edib.

1991-ci il 8 dekabr tarixində Azərbaycan İslam Konfransı Təşkilatına üzv oldu.