Dünya elminin korifeylərindən olan İngiltərə alimi İsaak Nyuton 1642-ci ilin bu günü anadan olub. Fizika, riyaziyyat, mexanika sahəsində böyük kəşflərin müəllifi olan Nyuton həm də astronomiyanın nəzəri əsaslarının yaradılması üzərində çalışıb. Onun “Cazibə qanunu” adı ilə məşhur olan mexanikanın 3 qanunubəşəriyyətin ən böyük kəşflərindən sayılır. İsaak Nyuton “Başlanğıclar” əsərində ilk dəfə Yer və Goy mexanikasının vahid sistemini yaradıb. İ.Nyuton həm də London Kral Cəmiyyətinin prezidenti idi. (1642-1727)
1825-ci il 26 dekabr tarixində Rusiyada Dekabristlər üsyanı baş verib. Dekabristlər üsyanı rus feodal təhkimçi mühitinin cəmiyyətdə doğurduğu ədalətsizliyin və rus milli şüurunun oyanmasının nəticəsi idi. Bu üsyan təhkimçiliyin ləğvi, mütləqiyyətin devrilməsi, yaxud məhdudlaşdırılması, respublika və konstitusiyalı quruluşun yaradılması məqsədini daşıyırdı. Dekabristlər üsyanı rus inqilabi fikrinin formalaşmasına, həmçinin Avropada gedən respublika hərəkatına müəyyən təsir göstərmişdi.
Böyük rus bəstəkarı, simfonik musiqinin inkişafında böyük xidmətləri olan Aleksandr Skryabin 1872-ci il 26 dekabrda anadan olub. Məhz onun təşəbbüsü ilə simfonik orkestrin heyətinə orqan və zənglər daxil edilib. A.Skryabinin sözsüz xor partiyaları, “Misteriya”, “Prometey”, “İlahi poema” kimi simfonik əsərləri dünya musiqisinin incilərindən sayılır. (1872-1915)
Osmanlı dövründə antik Truva şəhərini gün üzünə çıxaran və tapdığı Truva xəzinələrini xaricə qaçıran alman həvəskar arxeoloq Henrix Şliman (Hinrich Schliemann) 1890-cı ilin bu günü Napolidə ölüb.
1898-ci il 26 dekabr tarixində Fransız alimləri Mariya Küri və Pyer Küri Dmitri Mendeleyevin elementlərin dövri sistemində 88-ci element olan radiumu kəşf ediblər. Mendeleyev bu element üçün dövri sistemdə əvvəlcədən boş xana saxlamışdı. Kürilər təqribən bir ton uran filizini işləyərək 0,1 qrama yaxın radium duzu aldılar. Radium gümüşü-ağ rəngli ağır, çətin əriyən metaldır. Digər qələvi - torpaq metallar kimi o da sərbəst halda yüksək kimyəvi aktivliyə malikdir, su ilə şiddətli reaksiyaya daxil olaraq hidrogeni ayırır.
Misir xalqının istiqlaliyyət qazanmasında əvəzsiz xidmətləri olan, respublikanın görkəmli dövlət və siyasi xadimi Ənvər Sadat 1918-ci ilin 26 dekabrında dünyaya gəlib. İsrail-Ərəb münaqişəsinin ilk dəfə sülh yolu ilə həll olunmasında səmərəli fəaliyyətinə görə Nobel Beynəlxalq Sülh Mükafatına layiq görülən Ə.Sadat 1981-ci ilin oktyabrında hərbi parad zamanı qətlə yetirilib. (1918-1981)
26 dekabr 1905-ci ildə Cənubi Afrikanın Pretoria bölgəsində 3106 karat dəyərində "Cullinan" almazı tapıldı. 9 parçaya bölünən almazdan əldə edilən 530 karatlık dünyanın ən böyük brilyantıBöyük Britanya kral tacına yerləşdirildi.
1975-ci ilin bu günü SSRİ (keçmiş Sovetlər) dünyanın ilk süpersonik təyyarəsi olan “Tu-144”ü xidmətə çıxardı.
“Time” jurnalının hər il yayınladığı “İlin adamları” siyahısına 1982-ci ilin 26 dekabrında ilk dəfə insan olmayan bir obyekt düşdü: bu, fərdi kompüter idi.
26 dekabr 1991-ci ildə SSRİ Ali Sovetinin sonuncu iclası keçirilib. İclasda ittifaqla bağlı bütün qurumların, o cümlədən SSRİ Ali Sovetinin fəaliyyətinə xitam verilib. Sovet İttifaqı quruluşunun 69-cu ildönümünə dörd gün qalmış rəsmən süqut etdi.
1991-ci il 26 dekabr tarixində Azərbaycan Respublikasının Xankəndi şəhəri Ermənistan silahlı qüvvələri tərəfindən işğal edilib və burada separatçı rejim yaradılıb. Həmin tarixdə Xankəndidən sonuncu azərbaycanlı ailələr qovulub və 1989-cu ildən soydaşlarımıza qarşı aparılan etnik təmizləmə başa çatdırılıb.
2003-cü il 26 dekabr tarixində İranın Kirman əyalətində 6,6 bal gücündə zəlzələ baş verdi ki, çoxu Bəm şəhərindən olmaqla təxminən 20 min adam həyatını itirdi.
