Azərbaycan Respublikası ərazisində yerləşən qədim Qafqaz Albaniyası dövlətinin paytaxtı 463-cü ilin bu günü Qəbələdən Bərdə şəhərinə köçürülüb.
Venesiyada bir tacir ailəsində anadan olan məşhur səyyah Marko Polo (Marco Polo) 1324-cü ilin bu günü 70 yaşında dünyadan köçüb. Papa IX Greqorisin atası və əmisinin Kubilay Xana məktub aparması ilə səyahətə başlayan, 17 il boyu müxtəlif ölkələri gəzən, Venesiyaya döndükdən sonra isə Genuya (Ceneviz) ilə döyüşə qatılıb əsir düşən Marko Polo həbsdə olduğu zaman gördüyü yerləri qələmə alaraq məşhur səyahətnaməsini yazıb. Səyyah o dövrdə avropalılara tanış olmayan Asiya materiki, buradakı dövlətlər və xalqlar haqqında ilk dəfə daha dəqiq və ətraflı məlumat verib. (1254-1324)
8 yanvar 1607-ci ildə Səfəvi dövləti ilə Osmanlı imperatorluğu arasında növbəti müharibə (1603-1612) gedişində türk qoşunlarının əlində olan Bakıda xalq üsyanı başlayıb. Bundan istifadə edən Səfəvi qoşunları şəhərə daxil olaraq Osmanlı qüvvələrini oradan çıxarıblar. Tərəflər arasında bundan öncəki (1578-1590) müharibədə Bakı Osmanlının nəzarətinə keçmişdi.
Müasir fizika və astronomiya elmlərinin baniləri arasında yer alan İtaliya alimi Qalileo Qaliley (Galileo Galilei) 1642-ci ilin bu günü 79 yaşında dünyadan köçüb. Yer kürəsinin Günəş ətrafında fırlandığını elan edincə İnkvizisiya (engizisyon) Məhkəməsi tərəfindən ölümə məhkum edilən Qaliley ancaq fikrini geri götürdükdən sonra bağışlanıb. (1564 - 1642)
Azərbaycan sərkərdəsi, general Əmənulla xan Qacar 1862-ci ildə Qarabağın mərkəzi Şuşada anadan olub. Sankt-Peterburqda hərbi kadet korpusunu bitirdikdən sonra 9-cu piyada kazak diviziyasının komandiri olan Əmənulla xan Birinci Dünya Müharibəsi illərində Avstriya cəbhəsində döyüşüb, üçüncü dərəcəli “Müqəddəs Vladimir”, ikinci dərəcəli “Müqəddəs Anna” və “Müqəddəs Stanislav” ordenlərinə layiq görülüb. General-mayor Əmənulla xan Qacar 1918-1920-ci illərdə dörd general qardaşı ilə birlikdə Azərbaycan Milli Ordusunun yaranmasında yaxından iştirak edib. Boşleviklər Azərbaycanda hakimiyyətə gəldikdən sonra o, İrana gedib, Tehranda yaşayıb və 1937-ci ildə 75 yaşında dünyadan köçüb. (1862-1937)
1912-ci il 8 yanvar tarixində Afrika Beynəlxalq Konqresinin təməli qoyuldu.
1914-cü il 8 yanvar tarixində xərçəng xəstəliyinin müalicəsi üçün radium elementindən istifadə edildi.
Birinci Dünya Müharibəsində Çanaqqala Cəbhəsində Türkiyənin müqavimətini qıra bilməyən və geriçəkilmə qərarı verən müttəfiq qüvvələrin son hərbi birlikləri 1916-cı ilin 8 yanvarında Çanaqqaladan çıxmağa başladı. Bir gün sonra 5-ci Ordu komandiri Otto Liman von Sanders Gelibolu yarımadasında müttəfiq əsgəri qalmadığını Baş Komandanlığa teleqrafla bildirdi.
1920-ci il 8 yanvar tarixində görkəmli teatr xadimi, Azərbaycan SSR Xalq Artisti Leyla Bədirbəylinin doğum günü (1920-1999). Üzeyir Hacıbəylinin dəvəti ilə 1945-ci ildə "Arşın mal alan" filmində çəkilib. “Otello”da Dezdemona, “Göz həkimi”ndə Nərminə, “Od gəlini”ndə Solmaz, “Mahnı dağlarda qaldı” tamaşasında Fəxrəndə rollarını ifa edib, bir çox filmlərdə yaddaqalan obrazlar yaradıb. Azərbaycan SSR-in dövlət mükafatı laureatı, həmçinin müstəqil Azərbaycanın “İstiqlal” ordeni ilə təltif olunub.
1923-cü il 8 yanvar tarixində Zaqafqaziya SFSR vahid Zaqafqaziya pul nişanı haqqında dekret qəbul etdi.
1935-ci il 8 yanvar tarixində amerikalı müğənni və aktyor Elvis Presli anadan olub (1935-1977). ABŞ-da Preslinin qızıl, platin və ya multiplatin statusu qazanan 150 albomu var. Mahnıları "Billbord" hit-paradının ən çox "qızıl yüzlüyünə" düşən müğənnidir (149 mahnı). Müxtəlif illərdə üç "Qremmi" mükafatı alıb. "Forbes" jurnalının yazdığına görə, Elvis dünyanın vəfat etmiş məşhur insanları arasında ən varlılarındandır. Onun ölümü də qəribə olub. Diş həkimindən gələn Elvis yuxuya getmək üçün sakitləşdirici dərman içir. Bunun təsirsiz olduğunu görən müğənni əlavə yuxu dərmanı da qəbul edir. Səhər açıldıqda isə o artıq gözlərini əbədi yummuşdu. Aparılan müayinələrin nəticələrinə görə, Elvisin ölümünə səbəb müxtəlif dərmanların qarışdırılaraq qəbul edilməsi olub.
1945-ci ildə Türkiyənin İskəndərun limanı istifadəyə verildi. İskəndərun Hatay vilayətinin əhali sayı baxımından 2-ci böyük qəsəbəsidir. İskəndərun limanı isə Türkiyənin dördüncü böyük limanıdır.
1959-cu il 8 yanvar tarixində Fidel Kastro Havanaya daxil oldu.
1959-cu il 8 yanvar tarixində Şarl de Qoll (şəkildə) Fransada Beşinci Respublikanın ilk prezidenti seçilmişdir.
8 yanvar 1960-cı ildə Hirfanlı su anbarı istismara verildi. Kızılırmak çayı üzərində tikilən su anbarı Türkiyənin böyük su anbarlarından biridir.
1977-ci il 8 yanvar tarixində SSRİ-də silsilə terror aktları baş verib. İlk partlayış “İzmayılovskaya” və “Pervomayskaya” stansiyaları arasında olan qatarda, sonra isə ticarət və ərzaq mağazalarında törədilib. Partlayışlar nəticəsində 7 nəfər həlak olub, 37 nəfər yaralanıb. İstintaq partlayışların erməni millətçiləri tərəfindən törədildiyini müəyyənləşdirib.
1992-ci ilin bu günü ermənilər “Krasnovodsk-Bakı” dəniz sərnişin bərəsində terror aktı törətdilər. Hadisə nəticəsində 25 adam həlak oldu, 88 nəfər yaralandı.
1996-cı il 8 yanvar tarixində Konqo Demokratik Respublikasının paytaxtı Kinşasadan Kaxembaya hərəkət edən “Moscow Airways”ə məxsus “Аn-32B” yük təyyarəsinin uçuş zolağından havaya qalxa bilməməsi və yaxınlıqdakı bazara girməsi nəticəsində 298 nəfər həlak olub, 253 nəfər yaralanıb. Qəza təyyarənin həddən artıq yüklənməsi səbəbindən baş verib.
