17 yanvar 1605-ci ildə ilk müasir roman olaraq adlandırılan “Don Kixot”un birinci hissəsi İspaniyada dərc olundu. Yazıçı Migel de Servantes romanın ikinci hissəsini isə ancaq 10 il sonra dərc etdirə bildi.
1706-cı il 17 yanvar tarixində Amerika alimi, jurnalist, siyasi xadim Bencamin Franklin (1706-1790) anadan olub. O, müstəqil dövlət kimi Amerikanın əsasını qoyanlar arasında yeganə şəxsiyyətdir ki, bu ölkənin təməlində duran üç mühüm sənədi - Müstəqillik Bəyannaməsini, ABŞ Konstitusiyasını və Şimali Amerikada 13 müstəmləkənin Britaniyadan müstəqilliyi uğrunda müharibəni formal surətdə başa çatdıran 1783-cü il tarixli Versal sülh müqaviləsini imzalayıb.
1773-cü il 17 yanvar tarixində Ceyms Kuk və onun komandası Antarktik dairəyə yaxınlaşmışlar.
1852-ci il 17 yanvar tarixində Sand-River müqaviləsi ilə İngiltərə, Transvaaldakı (Cənubi Afrika) Boer müstəmləkələrinin istiqlalını qəbul etmişdir.
1860-cı il 17 yanvar tarixində rus yazıçısı Anton Çexov anadan olmuşdur.
17 yanvar 1915-ci ildə Birinci Dünya müharibəsi gedişində Qafqaz cəbhəsində Türkiyə (Osmanlı) qoşunlarını məğlub edən Rusiya qoşunları İrana (Cənubi Azərbaycana) keçərək Təbrizə yaxınlaşıblar. Üç gündən sonra, yanvarın 20-də Təbriz şəhəri rus qoşunları tərəfindən işğal olundu.
17 yanvar 1922-ci ildə Bakıdakı Tağıyev teatrının (indiki Akademik Musiqili Teatr) təmir-bərpadan sonra (bina 1918-ci il hadisələrində ermənilər tərəfindən yandırılmışdı) açılışı olub və Azərbaycan Dövlət Dram Teatrının truppası tərəfindən M.F.Axundzadənin “Hacı Qara” komediyası nümayiş olunub. Təntənəli gecədə dövlət rəsmiləri ilə bərabər, teatrın binasının keçmiş sahibi Hacı Zeynalabdin Tağıyev də iştirak edib.
1926-cı il 17 yanvar tarixində tanınmış Azərbaycan şairəsi, Əməkdar İncəsənət Xadimi Mədinə Gülgünün (1926-1992) doğum günüdür. M.Gülgün 1938-ci ildə ailəsi ilə birlikdə Ərdəbil şəhərinə köçüb. Cənubi Azərbaycanın milli azadlığı və demokratiya uğrunda hərəkatın (1941-1946) fəal iştirakçısı olub. 1947-ci ildə Azərbaycana qayıdıb. Vətən sevgisi mövzusunda şeir və poemaların müəllifidir.
1942-ci il 17 yanvar tarixində Amerika boksçusu, dünya boksu tarixində ən tanınmış idmançılardan biri, yarımağır çəkidə Olimpiya çempionu, üçqat dünya çempionu Məhəmməd Əlinin (1942-2016) doğum günüdür. M.Əli idman karyerası başa çatandan sonra ictimai və xeyriyyəçilik fəaliyyəti ilə məşğul olub, UNESCO-nun xoşməramlı səfiri missiyasını yerinə yetirib.
17 yanvar 1944-cü ildə İkinci Dünya müharibəsinin ən uzun və qanlı toqquşmalarından biri olan “Monte Kassino” müharibəsi start götürdü. İtaliyanın mərkəzi bölgəsindəki Monte Kassino monasdırı və ətrafında artan toqquşmalarda alman hərbi dəstələri 5 ay müddətində müttəfiq qüvvələrin irəliləyişinin qarşısını aldı. Müharibədə iki tərəfdən də təqribən 75 min əsgər həyatını itirdi.
1946-cı il 17 yanvar tarixində BMT Təhlükəsizlik Şurasının ilk yığıncağı olmuşdur.
1991-ci il 17 yanvar tarixində Fars körfəzində dislokasiya olunmuş çoxmillətli qüvvələr Küveytin azad edilməsi üzrə “Səhrada tufan” əməliyyatına başlayıblar. Uzunmüddətli aviasiya zərbələrindən və çoxmillətli qüvvələrin qoşunlarının bir neçə gün davam edən yerüstü əməliyyatından sonra tam və qəti qələbə qazanılıb. İraq Küveyti azad etmək və BMT Təhlükəsizlik Şurasının münaqişə ilə bağlı bütün qətnamələrini tanımaq məcburiyyətində qalıb.
1994-cü il 17 yanvar tarixində Azərbaycan Silahlı Qüvvələri Füzuli rayonunun Horadiz qəsəbəsini və Araz çayı boyunca bir neçə kəndi ermənilərin işğalından azad ediblər.
2001-ci il 17 yanvar tarixində Avropa Şurasının Nazirlər Komitəsi Azərbaycannın təşkilata tamhüquqlu üzv qəbul edilməsi barədə qərar qəbul etmişdir.
