29 yanvar 1820-ci ildə Rusiyanın dəniz ekspedisiyası (Fridrix Bellinshauzen, Mixail Lazarev) Antarktidanı kəşf edib. Bu kəşf coğrafiya elmində mühüm yenilik oldu – dünyanın 5 deyil, 6 materikdən ibarət olduğu dəqiqləşdi. Yeni materik Rusiya imperiyasının nəzarətinə keçdi.
1833-cü il 29 yanvar tarixində Rusiyada ilk dəfə olaraq Peterburqda şəhər poçt xidməti təsis edilib.
1886-cı il 29 yanvar tarixində Alman mühəndis Karl Benz ilk motorlu nəqliyyat vasitəsini nümayiş etdirib. Düzəltdiyi ilk motorun patentini 1879-cu ildə alıb. 1885-ci ildə isə satış məqsədilə istehsal olunan və benzin motoru ilə işləyən ilk avtomobilin - Motorvagenin istehsalını başa çatdırıb. O, “Benz” şirkətinin yaradıcısıdır. Sonradan bu şirkətin əsasında “Daimler-Benz”, “Mercedes-Benz” və “Daimler-Chrysler” şirkətləri yaranıb.
1896-cı il 29 yanvar tarixində Amerika fiziki Qrubbe ilk dəfə olaraq xərçəngin müalicəsində radioaktiv şüalanmadan istifadə edib.
29 yanvar 1923-cü ildə Türkiyə torpaqlarında yaşayan rumlar ilə Yunanıstanda yaşayan türklərin yer dəyişmələrinə imkan yaratmaq məqsədilə Türkiyə ilə Yunanıstan arasında Lozanna əhali mübadiləsi müqaviləsi imzalandı. Müqavilə 6 avqust 1924-cü ildə qüvvəyə mindi və təqribən 1 milyon rum Yunanıstana, 500 minə yaxın türk isə Türkiyəyə köç etmək məcburiyyətində qaldı. Türkiyədə İstanbul, Gökçəada və Bozcadada yaşayan rumlar, Yunanıstanda isə Qərbi Trakyada yaşayan türklər mübadiləyə daxil edilmədi.
1925-ci il 29 yanvar tarixində Azərbaycanlı futbol hakimi Tofiq Bəhramov anadan olub (1925-1993). O, 1966-cı ildə dünya çempionatında İngiltərə və Almaniya komandaları arasında keçirilən final oyununda yan xətt hakimi kimi verdiyi qərarla tarixə düşüb. Oyunun əsas vaxtı heç-heçə (2:2) başa çatmışdı. Qalibi müəyyənləşdirmək üçün 30 dəqiqə əlavə olundu. 110-cu dəqiqədə ingilislərin hücumçusu Ceff Herstun zərbəsi ilə top qapı dirəyinə dəyərək yerə düşür. Oyunun baş hakimi, isveçrəli Qottfrid Dinst topun uçuş trayektoriyasını görmədiyindən yan xətt köməkçisinin fikrini soruşur. T.Bəhramov əminliklə meydanın mərkəzini göstərir. 2016-cı ildə Britaniyanın "Sky Sports" telekanalında T.Bəhramovun verdiyi həmin qərar növbəti dəfə müzakirəyə çıxarılır. Müasir texnologiya ilə aparılan araşdırma azərbaycanlı hakimin öz qərarında haqlı olduğunu sübuta yetirir.
1927-ci il 29 yanvar tarixində Azərbaycanın milli balet sənətinin görkəmli nümayəndələrindən olan Leyla Vəkilovanın doğum günü (1927-1999). Leyla Vəkilova klassik dünyəvi balet elementləri ilə milli rəqslərimizin hərəkət zərifliyini ustalıqla birləşdirə bilmişdi. Yüksək səhnə mədəniyyətinə və ifa texnikasına malik olan L.Vəkilova Azərbaycan milli balet sənətinin tərəqqisində və təkamülündə, beynəlxalq aləmdə tanınmasında göstərdiyi xidmətlərə görə Azərbaycan Respublikasının Xalq Artisti və SSRİ Xalq Artisti fəxri adları ilə təltif edilib.
29 yanvar 1942-ci ildə SSRİ, Böyük Britaniya və İran arasında faşist Almaniyasına qarşı alyans barədə saziş imzalanıb. Sazişə əsasən, İran ərazisində – Cənubi Azərbaycanda SSRİ-nin hərbi kontingenti yerləşdirildi və müharibənin sonunadək (1945) sovet qoşunları orada qaldı.
1956-cı il 29 yanvar tarixində Almaniya Demokratik Respublikası Varşava müqaviləsinə qoşulub.
1978-ci il 29 yanvar tarixində İsveçrə ozon təbəqəsinə zərər verdiyi üçün bütün aerozol maddələrin satışını qadağan edən ilk ölkə olub.
29 yanvar 1988-ci ildə Yunanıstan Ali Məhkəməsinin “Qərbi Trakya Türk Müəllimlər Birliyi” və “Gümülcinə Türk Gənclər Birliyi”nin bağladılmasına qərar verməsi qarşısında 20 mindən artıq Qərbi Trakya Türkü etiraz aksiyası keçirdi. Yunan polisi aksiyaçılara zorakılıq tətbiq etdi. Baş verən hadisələrdə onlarla Türk yaralandı. Bu tarix həmin gündən bəridir Qərbi Trakya Türkləri tərəfindən “Milli müqavimət günü” kimi qeyd olunur.
29 yanvar 1991-ci ildə Türkiyə ilə Azərbaycan arasında ilk hökumətlərarası əməkdaşlıq sazişi imzalanıb. Nəqliyyat sahəsində sazişə əsasən, Naxçıvan Muxtar Respublikasının Sədərək rayonunda Araz çayı üzərində (o vaxt Türkiyə-SSRİ sərhədi) körpü tikilməli idi. “Ümid körpüsü”nün təntənəli açılışı 1992-ci il mayın 28-də keçirildi.
2001-ci il 29 yanvar tarixində Fransa parlamenti Erməni soyqırımını tanıyıb.
2007-ci il 29 yanvar tarixində Azərbaycanın birinci xanımı, UNESCO-nun xoşməramlı səfiri, Heydər Əliyev Fondunun prezidenti, Milli Məclisin deputatı Mehriban Əliyeva Ümumdünya Səhiyyə Təşkilatının "Ana, uşaq və ailə sağlamlığının qorunmasında və möhkəmləndirilməsində müstəsna xidmətlərinə görə" mükafatına layiq görülüb. Mehriban xanım Əliyeva yanvarın 29-da təşkilatın 120-ci sessiyasının yekdil qərarına əsasən bu mükafatla təltif olunub.
29 yanvar 2009-cu ildə baş nazir Rəcəb Tayyib Ərdoğan Davos zirvə yığıncağında Türk diplomatiya tarixinə “One minute” olaraq düşən çıxışını etdi. Ərdoğan Fələstin xalqına istiqamətli İsrail dövlətinin zorakılığını tənqid edərkən sözünün kəsilmək istəməsinə və paneldə iştirak edən İsrail prezidenti Şimon Peresə daha çox danışmaq haqqı verilməsinə reaksiya göstərdi. Baş nazir Ərdoğan Peresi “Siz öldürməyi yaxşı bilirsiniz” sözlərilə hədəf aldı və “Davos zirvəsi mənim üçün bitmişdir” deyərək yığıncağı tərk etdi.
2015-ci il 29 yanvar tarixində “Şahdağ” qış-yay turizm kompleksinin 1 nömrəli kanat yolu və xizək enişi açılıb. Açılış mərasimində Azərbaycan Prezidenti İlham Əliyev və xanımı Mehriban Əliyeva iştirak ediblər. Kanat yollarının çəkilişi qış turizm kompleksinin əsas infrastrukturlarından sayılır və bu işi böyük təcrübəsi olan Avstriya şirkəti həyata keçirib.
