1478-ci ilin 7 fevralı İngiltərənin paytaxtı Londonda məhşur ingilis mütəfəkkiri, utopik-sosializmin banisi Tomas Mor anadan olub. O, krala and içmədiyi üçün edam edilib. Tomas Mor “Utopiya” əsərində sosial və siyasi bərabərsizliyi tənqid edib, xüsusi mülkiyyətin ləğvi ideyasını irəli sürüb. (1478-1535)
1812-ci ilin 7 fevralında ingilis ədəbiyyatında sosial roman janrının görkəmli nümayəndəsi Çarlz Dikkens dünyaya gəlib. Onun “Oliver Tvistin macəraları”, “Devid Kopperfild”, “Balaca Dorrit”, “Böyük ümidlər” və digər romanları dünyanın bir çox ölkəsində dəfələrlə tərcümə olunaraq nəşr edilib. (1812-1870)
1855-ci il 7 fevral tarixində Şimodada rus-yapon müqaviləsi (Şimoda traktatı) imzalanmış və iki ölkə arasında "Əbədi sülh və səmimi dostluq" elan edilmişdir.
1906-cı ildə SOS siqnalı əvvəlcə gəmilərdə istifadə edilən CQD kodunu əvəz etmək üçün beynəlxalq fəlakət siqnalı kimi istifadəsi təklif edilib. Morze əlifbasında SOS hərflərinin birləşməsi radioteleqraf rabitəsində beynəlxalq fəlakət siqnalına çevrilib.
1907-ci il 7 fevral tarixində Böyük Britaniyada qadınlara seçki hüququnun verilməsi uğrunda mübarizə çərçivəsində Milli Qadın Cəmiyyətləri İttifaqı dünya tarixinə Çirkab marşı kimi daxil olan kütləvi yürüş təşkil edib. Həmin gün üç mindən çox qadın soyuqda Hayd-Parkdan tutmuş Ekseter-Holladək bərbad vəziyyətdə olan London küçələri ilə hərəkət etməli olub.
1919-cu il 7 fevral tarixində rejissor, aktyor və ssenarist Tofiq Tağızadənin (1919-1998) anadan olduğu gündür. Tofiq Tağızadənin “Uzaq sahillərdə”, “Əsl dost”, “Mateo Falkone”, “Mən ki gözəl deyildim”, “Dədə Qorqud”, “Babamın babasının babası” və digər ekran əsərləri Azərbaycan kinosunun klassikasına çevrilib.
1940-cı ildə Hetti Makdeniel "Küləklə sovrulanlar" filmindəki ikinci plan roluna görə "Oskar" mükafatına layiq görülən ilk qaradərili aktrisa olub.
1945-ci ilin 7 fevralında müttəfiqlər – İngiltərənin Baş naziri Uinston Çörçill, ABŞ prezidenti Franklin D.Ruzvelt və SSRİ-nin Baş katibi İosif Stalin Qara dəniz sahilində gizli bir yerdə Almaniyaya qarşı müharibənin sonu və Avropanın gələcəyi mövzularını müzakirə ediblər.
7 fevral 1962-ci ildə ABŞ Kuba ilə olan bütün ixracat və idxalatını dayandırdı. Bir gün sonra isə ABŞ vətəndaşlarının Kuba ilə səyahət, maliyyə və ticarət məqsədli hər növ əlaqə qurmaları qadağan edildi.
7 fevral 1964-cü ildə İngiltərənin populyar musiqi qrupu “The Beatles” ilk ABŞ qastrol səfəri üçün Nyu-Yorka getdi. Heyranlarının böyük rəğbəti qarşısında qaldıqları otel polis barikkadasına alınarkən, qrup üzvləri iki gün müddətində otaqlarından çölə çıxa bilmədilər.
1971-ci ilin 7 fevralında İsveçrədə qadınlara səsvermə hüququ verilib.
1973-cü ilin 7 fevralında Türkiyə Böyük Millət Məclisində qəbul edilən qərara əsasən, Maraş rayonuna "Qəhrəman" adı verilib və o, Kahramanmaraş olaraq dəyişdirilib. Qeyd edək ki, Maraş Qurtuluş Savaşı zamanı Fransa işğalçılarına qarşı yerli mübarizəsinə görə TBMM tərəfindən “İstiqlal medalı” verilən ilk rayon olub.
1974-cü ilin 7 fevralında Karib dənizi hövzəsində yerləşən Qrenada müstəqilliyini elan edib. Bu kiçik dövlətin ərazisi cəmi 344 kvadrat kilometr, əhalisi isə 100 min nəfərdir. Qeyd edək ki, Kiçik Amtil arxipelaqındakı bu adanı 1498-ci ildə Xristofor Kolumb kəşf edib. 1783-cü ildə isə Qrenada Britaniya müstəmləkəsində olub. (Bu gün müstəqil Qrenada İngiltərə Birliyinin üzvüdür.)
1981-ci ildə Leninqrad yaxınlığında Tu-104 təyyarəsinin qəzaya uğraması nəticəsində SSRİ Sakit Okean Donanmasının bütün rəhbərliyi həlak olub. Həyatlarını itirən 52 nəfərdən 16-sı admirallar və generallar, demək olar ki, 20 nəfəri də admiral vəzifələrində çalışan birinci dərəcəli kapitanlardan ibarət olub.
1988-ci il. Azərbaycan Milli Ordusunun giziri, Milli Qəhrəman Mübariz İbrahimovun (1988-2010) doğum günüdür. Mübariz erməni silahlı qüvvələrinin hücumlarını dəf edərkən qəhrəmancasına şəhid olub.
1992-ci il 7 fevral tarixində Avropa İttifaqının yaranmasına zəmin olan əsas sazişlərdən biri - Maastrix sazişi imzalanmışdır.
1995-ci ilin 7 fevralında “Discovery” kosmik raketilə Rusiyanın “Mir” kosmos stansiyası arasında tarixi görüş gerçəkləşib.
1996-cı ilin 7 fevralında Türkiyənin “Bir-Gen Air” şirkətinə məxsus “Boeing 757” sərnişin təyyarəsi Dominikan Respublikası yaxınlığında Atlantik okeanına düşüb və 189 nəfər həlak olub.
1998-ci il 7 fevral tarixində Yaponiyanın Naqano şəhərində XVIII Qış Olimpiya Oyunlarının açılışı olmuşdur.
2007-ci ilin 7 fevralında Bakı-Tbilisi-Qars Dəmir Yolu Xətti Layihəsinin həyata keçirilməsinə dair saziş Gürcüstan, Azərbaycan və Türkiyə hökumətləri arasında Tiflisdə imzalanıb.
2009-cu ilin 7 fevralında Avstraliyada ölkə tarixinin ən böyük yanğını baş verib. Viktoriya ştatında "Qara şənbə" günü baş verən yanğında 173 nəfər həyatını itirib, 414 nəfər isə yaralanıb.
