1835-ci ilin 28 fevralında finlərin “Kalevala” eposunun ilk çap toplusu işıq üzü görüb. Bu epos sonradan bir çox xalqların dillərinə tərcümə olunub və dünya mədəniyyəti xəzinəsinin incilərindən birinə çevrilib. Fin xalqı hər il fevralın 28-ini Kalevala Günü olaraq qeyd edir.
1894-cü il 28 fevral tarixində Xalq Artisti Mustafa Mərdanovun (1894-1968) doğum günüdür. O, “Bismillah”, “Hacı Qara”, “Sevil”, “Lətif”, “Bakılılar”, “Kəndlilər”, “Səbuhi”, “Qara daşlar”, “Görüş”, “Əhməd haradadır?” kimi filmlərdə yaddaqalan obrazlar yaradıb. “O olmasın, bu olsun” filmindəki Həsən bəy rolu Mustafa Mərdanova böyük şöhrət gətirib.
Azərbaycanda riyaziyyat elminin banilərindən biri, akademik İbrahim İbrahimov 1912-ci ilin 28 fevralında anadan olub. Onun tədqiqatları riyaziyyatın funksional nəzəriyyəsilə bağlıdır. Görkəmli alimin bir çox elmi əsəri dünyanın müxtəlif ölkələrində çap olunub. Ali məktəblər üçün yazdığı “Ədədlər nəzəriyyəsi”, “Sıralar nəzəriyyəsinin əsasları”, “Riyazi analiz kursu” dərslikləri İbrahim İbrahimovun Azərbaycan elmi, pedoqoji kollektivinə qiymətli töfhələrdir. (1912-1994)
28 fevral 1922-ci ildə Misir Birləşmiş Krallıqdan ayrılaraq müstəqilliyini elan etdi. XVI əsrin əvvəllərindən təxminən 400 il Osmanlı dövlətinin tərkibində olan Misir 1882-ci ildən İngiltərənin təsiri altında oldu. 40 il boyu ingilislər tərəfindən idarə edilən Misir Krallığında 1922-ci ilin 28 fevralında müstəqillik elan olunsa da, heç bir şey dəyişmədi. Çünki sonrakı 30 il boyu yenə ingilislər fəal olaraq ölkənin rəhbərliyinə istiqamət verdi. İngiltərənin hakimiyyətinə ancaq 1952-ci il Çevrilişi nəticəsində Misir Krallığının devrilməsindən sonra son qoyuldu. Bir il sonra Misir özünü respublika elan etdi.
1940-cı ilin 28 fevralında dünyada ilk dəfə televiziyadan birbaşa translyasiya (yayım) oldu. Fordham ilə Pittsburq universitetləri komandalarının “Medison Square Garden”də oynadığı matç televiziyadan yayımlanan ilk basketbol qarşılaşması kimi tarixə düşdü.
1945-ci ilin 28 fevralında Türkiyə Birləşmiş Millətlər Təşkilatının bəyannaməsini imzaladı. Türkiyə Müvəqqəti İşlər vəkili Orxan Erol tərəfindən Amerikada imzalanan bəyannamədən 8 ay sonra Birləşmiş Millətlər Təşkilatı rəsmən quruldu. Yəni Türkiyə BMT-nin qurucu üzvlərindən biri oldu. Qeyd edək ki, Birləşmiş Millətlər Təşkilatını yaratmaq fikri ilk dəfə II Dünya Müharibəsinin axırında qalib ölkələr tərəfindən dövlətlərarası münaqişələri aradan qaldırmaq, gələcəkdə meydana gələ və təhlükəsizlikləri təhdid edə biləcək yeni savaşların qarşısını almaq məqsədilə ortaya atılmışdı.
28 fevral 1953-cü il tarixində Türkiyə, Yunanıstan və Yugoslaviya arasında Balkan paktı bağlandı. Pakt ilə hərbi əməkdaşlığı qərara alan üç ölkə SSRİ-nin Balkan coğrafiyası üzərindəki təzyiqini azaltmağı hədəf almışdı.
1986-cı il fevralın 28-də Avropa İttifaqının yaradılması haqqında akt imzalandı. Həmin sənədə əsasən, 1987-ci il iyunun 1-də Avropa ölkələrinin bəzi kommunikasiya sahələri və idarələri birləşdirildi. 1993-cü il yanvarın 1-dən isə vahid daxili bazar yaradıldı, ittifaqa daxil olan dövlətlərin vətəndaşlarının həmin ölkələrdə tam azad hərəkəti təmin edildi.
28 fevral 1986-cı ildə İsveçin baş naziri Ulof Palme (1927-1986) odlu silahla öldürüldü. O, Stokholmun mərkəzində, Sveavegen küçəsində qətlə yetirildi. Həmin gün baş nazir axşamdan keçmiş xanımı Lisbed ilə “Qrand” kinoteatrından evinə qayıdırmış. Onların yanında cangüdənlər olmayıb, çünki U.Palme şəhərdə mühafizəçisiz gəzməyi sevirmiş. Cütlük Tunnelqatan küçəsi ilə dörd yol ağzına çatarkən bir kişi onlara yaxınlaşır və Palmeyə iki dəfə atəş açır. Üstü indiyədək açılmayan bu cinayət müasir İsveçin tarixində ən müəmmalı hadisələrdən biridir.
28 fevral 1991-ci ildə ABŞ-ın Birinci Körfəz hərbində qurudan əməliyyata başlanmasından sonra İraq müttəfiqlərlə atəşkəs müqaviləsi imzaladı. Atəşkəs ilə İraqın 6 ay 25 gün davam edən Küveyti işğalı da sona çatdı.
1993-cü il 28 fevral tarixində erməni terrorçuları Şimali Qafqaz ərazisindəki Qudermes stansiyası yaxınlığında Kislovodsk-Bakı sərnişin qatarında partlayış törədiblər. Nəticədə 11 adam həlak olub, 18 nəfər yaralanıb.
1995-ci il 28 fevral tarixində Koloradoda Steplton Beynəlxalq Hava limanının əvəzinə rəsmi olaraq Denver Beynəlxalq Hava Limanı açıldı.
1997-ci il 28 fevral tarixində Şimal Hollivud Atışması baş verib.
28 fevral 1997-ci ildə Türkiyədə Milli Təhlükəsizlik Şurasının 9 saat davam edən iclasından sonra “28 fevral prosesi” olaraq adlandırılacaq 18 maddədən təşkil tapan qərarlar qəbul edildi.
2013-cü il 28 fevral tarixində Roma Papası XVI Benedikt Müqəddəs Taxt-Tacdan könüllü imtina edib. O bəyan edib ki, yaşına və sağlamlıq durumundakı problemlərə görə vəzifəsini lazımi səviyyədə yerinə yetirə bilmədiyi üçün belə bir qərar qəbul edib. XVI Benedikt Müqəddəs Taxt-Tacdan imtina edəndən sonra ona istirahətə çıxmış ilk Roma Papası titulu verilib.
28 fevral 2015-ci ildə Nobel Ədəbiyyat Mükafatına namizəd göstərilən ilk Türkiyə yazıcısı Yaşar Kamal dünyadan köçdü. Hələ məktəbə başlamazdan əvvəl şeirlər qoşan, sonralar roman, povest və ssenarilər yazan Yaşar Kamal Türkiyə ədəbiyyatının ən böyük nümayəndələrindən biri olaraq tanınır. Onun əsərləri bir çox dilə tərcümə olunub, başqa ölkələrdə nəşr edilib, əsərləri əsasında filmlər çəkilib. Türkiyədə aldıqları ilə yanaşı, Yaşar Kamal “Cino del Duca”, “Legion d’Honneur”, “Premi İnternacional Catalunya”, Almaniya Kitab Evləri İttifaqı Frankfurt Kitab Sərgisi Sülh mükafatı kimi 20-dən artıq beynəlxalq mükafat qazanmışdır.
28 fevral 2020-ci ildə Azərbaycanda ilk dəfə COVID-19 qeydə alınıb. Rusiya vətəndaşı olan xəstə İrandan gələrkən ilk virus onda müəyyən edildi. Daha sonra ölkədə iki hadisə təsdiqləndi və hamısı təcrid edildi. Onlar İrandan qayıdan Azərbaycan vətəndaşları idilər. Həmin gün Azərbaycan İranla sərhədləri 2 həftə müddətinə bağladı.
