Erməni türkoloq Varujan Qeqamyan iddia edib ki, İlham Əliyev Ermənistan hakimiyyətinin qarşısına tələblər qoyur, İrəvan isə icra edir. Onun sözlərinə görə, Ermənistan-Azərbaycan danışıqlarının aparıldığı sənəddə Xocalı soyqırımının rəsmi İrəvan tərəfindən tanınması və günahkarların cəzalandırılması da öz əksini tapır.

Globalinfo.az-a danışan siyasi şərhçi Faiq Ələkbərli deyib ki, Azərbaycan və Ermənistan arasında sülh müqaviləsinin imzalanması üçün rəsmi Bakının ən əsas şərti İrəvanın konstitusiyasında ölkəmizə qarşı ərazi iddiasının yer almamasıdır, yəni konstitusiya dəyişikliyinin baş tutmasıdır:

“Digər tərəfdən Ermənistanın vaxtilə Azərbaycana qarşı törətdiyi cinayətləri etiraf etməsi və ölkəmizə dəymiş zərərlərin ödənməsi istiqamətində müəyyən addımlar atması da mühümdür.

Xocalı soyqırımının əsas təşkilatçısı kimi Ermənistanın adının hallanması təbiidir. Vaxtilə mövcud olmuş qondarma rejimin əsas dəstəkçisi elə rəsmi İrəvan idi. İndiki Paşinyan hökuməti də məsuliyyəti öz üzərinə götürməli, Xocalı cinayətkarları ilə bağlı müəyyən addımlar atmalıdır”.

Faiq Ələkbərlinin sözlərinə görə, Nikol Paşinyan hökumətinin Xocalı soyqırımını tanıması inandırıcı deyil:

“Sözügedən proseslə bağlı Köçəryan, Sərkisyan, Petrosyan və komandalarının üzərinə müəyyən ittihamlar yükləyəcəklər. Nikol Paşinyan prosesdə o vaxtkı Ermənistan hökumətinin əlinin olduğunu etiraf edə bilər. Hətta cinayətkarla bağlı addımların atılması da istisna deyil”.

Safura Bənnayeva
Globalinfo.az