Bu günkü müsahibim gənc, istedadlı ifaçı,özümün də şəxsən sevdiyim bir sənətçi Arzu Məmmədovadır.

— Arzu xanım, xoş gördük sizi. Sosial platformalarda və efirlərdə sizi ara-sıra görürük. Gənclər arasında istedadlı və şirin səsə sahib müğənni kimi tanınırsınız. Biz də istədik ki, sizi oxucularımız daha yaxından tanısın. Müsahibəmizi elə özünüz haqqında məlumat verməklə başlayaq.

— Mən, Arzu Məmmədova Cahid qızı, 1996-cı ildə Bakı şəhərində anadan olmuşam. Əslən Şuşalıyam. Çox kiçik yaşlarımdan ailəm musiqiyə olan həvəsimi hiss edib. 6 yaşımda dəf çalıb mahnılar oxuyurdum. İstedadımı görən ailəm məni musiqi məktəbinə yazdırdı. Artıq 24 ildir ki, muğam sənəti ilə məşğulam. İfa etdiyim nəğmələrdən Şuşanın nəfəsinin gəldiyini deyən dinləyicilərim var.

— Ailənizdə sizdən başqa musiqiçi varmı və sizin sənət fəaliyyətinizə ailənizin münasibəti necə olub?

— Ailəmdə məndən başqa musiqiçi yoxdur. Atam və anam sənət fəaliyyətimə hər zaman böyük dəstək göstəriblər. Uşaqlıqdan musiqiyə olan marağımı görüb məni bu istiqamətdə həvəsləndiriblər. Mənim sənətdə formalaşmağımda ailəmin dəstəyinin böyük rolu olub.

— Sənətdə kimdən ilham alıb oxumağa başlamısınız?

— Uşaqlıqdan bir çox böyük və korifey sənətkarlarımızı dinləmişəm. Şövkət Ələkbərova, Rübabə Muradova, Nəzakət Teymurova və digər sənətkarlarımızın ifalarını sevə-sevə dinləmişəm. Onların sənətindən, ifa tərzindən və musiqiyə münasibətindən ilham almışam.

— Adətən, səsi olan uşaqlar ilk başlarda orta məktəb tədbirlərində və ya qohum məclislərində oxuyur, kəşf edilir. İlk ifalarınız yadınızdadırmı?

— Əlbəttə, çox yaxşı xatırlayıram. Kiçik yaşlarımdan evdə və ailə şənliklərində özümü sınayırdım. Hətta dəfi əlimə götürüb stulun üstünə çıxaraq ailə üzvləri qarşısında çıxış edirdim. Bu maraq sonradan böyük sevgiyə çevrildi və artıq 7 yaşımda musiqi məktəbində təhsil almağa başladım.

— Nə zaman təhsil almaq qərarınıza gəldiniz? İlk orta ixtisas və ali təhsilinizdə ustadınız kim olub?

— Musiqiyə olan marağım uşaqlıqdan güclü olduğu üçün çox erkən yaşda bu sahədə təhsil almağa qərar verdim. Bakı Humanitar Kollecində təhsil almışam. Sənət yolumda müxtəlif ustadlardan dərs almışam. İlk ustadım Qasım müəllim olub. Daha sonra Qəzənfər Abbasov və Gül Yaz Məmmədova kimi dəyərli sənətkarların da sənətindən bəhrələnmişəm.

— Ustadınızı bildiyimiz qədər çox sevirsiniz. Təəsuratlarınızı bilmək istərdik

— Ustadlarımın hər birinin mənim sənət həyatımda xüsusi yeri var. İlk tanışlığımızdan etibarən onların sənətə münasibəti, tələbkarlığı və verdikləri məsləhətlər mənim üçün çox dəyərli olub. Bu gün də onların öyrətdiklərini öz yaradıcılığımda yaşatmağa çalışıram.

— İlk dəfə rəsmi tədbir olaraq tamaşaçılar qarşısına çıxmağınız yadınızdadır?

— İlk səhnə çıxışımı çox yaxşı xatırlayıram. 8 yaşımda Azərbaycan Televiziyasında — AzTV-də çıxış etmişəm. Bu, mənim üçün çox böyük və unudulmaz hadisə idi. Həmin gündən sonra səhnəyə olan sevgim daha da artdı.

— İncəsənət nümayəndələri ilə qalmaqallarınız olubmu?

— Açığı, sənət yolumda hər zaman çalışmışam ki, qalmaqallardan uzaq olum. Mənim üçün əsas olan sənətim, yaradıcılığım və tamaşaçı sevgisidir. Əlbəttə, hər bir sənət sahəsində olduğu kimi, bu sahənin də öz çətinlikləri var. Amma mən hər zaman işimlə, sənətimlə tanınmağa və sevilməyə çalışmışam.

— Adətən, mədəniyyət insanları yaradıcı insanlar olduqları üçün xüsusi məşğuliyyətləri və hobbiləri olur. Sizdə necə?

— Mənim üçün musiqi sadəcə peşə deyil, həyatımın bir hissəsidir. Boş vaxtlarımda da musiqiyə vaxt ayırmağı, müxtəlif sənətkarların ifalarını dinləməyi sevirəm. Xüsusilə muğam sənəti ilə bağlı yeni ifaları izləmək mənə yaradıcılıq baxımından stimul verir.

— Bir çox gənc mədəniyyət insanları bu sahədəki dəyərsizlikdən və bəzən də haqsızlıqlardan, ayrı-seçkiliklərdən çox gileylənirlər. Bəs Arzu xanımın gənc bir sənətkar kimi bu məsələlərə mövqeyi necədir?

— İncəsənət adından göründüyü kimi çox gözəl, amma bir o qədər də ağır və zəhmət tələb edən bir sahədir. Bu sənətdə öz sözünü demək və hörmət qazanmaq üçün illərlə çalışmaq, öz üzərində işləmək lazımdır. Bəzən sənət adamlarının qarşısına müxtəlif çətinliklər çıxır. Əsas məsələ həmin çətinliklər qarşısında ruhdan düşməmək və sənətindən uzaqlaşmamaqdır.

Mən hesab edirəm ki, sənətkarı ən sonda onun istedadı, zəhməti, peşəkarlığı və tamaşaçı sevgisi tanıdır. Mən də öz sənətimlə, zəhmətimlə öz yerimi qazanmağa çalışıram.

— Özünüzü gələcəkdə harada görürsünüz?

— Mən özümü səhnəsiz, səhnəni isə mənsiz heç vaxt təsəvvür etməmişəm. İnanıram ki, bu illərin mənə verdiyi təcrübə və çəkdiyim zəhmət gələcəkdə öz bəhrəsini verəcək. Özümü daha böyük səhnələrdə, daha geniş auditoriya qarşısında görürəm. Əsas məqsədim sənətimdə daim inkişaf etmək və layiq olduğum zirvəyə çatmaqdır.

— Bəs musiqimizin gələcəyini necə görmək istəyirsiniz?

— İstəyirəm ki, Azərbaycan musiqisi və xüsusilə muğam sənəti gələcək nəsillərə də layiqincə çatdırılsın. Gənc ifaçılara daha çox imkan yaradılsın, istedadlı sənətkarlar dəstəklənsin. Ən əsası isə milli musiqimizin özünəməxsusluğu qorunsun və müasir dövrdə də layiqli şəkildə təbliğ edilsin.

Mən də bir gənc ifaçı kimi Azərbaycan musiqisinin dünyada daha geniş tanınmasına öz töhfəmi vermək istəyirəm. İndiyədək Azərbaycanı İtaliya, Türkiyə, Yunanıstan, Rusiya, Gürcüstan və bir sıra digər xarici ölkələrdə təmsil etmişəm və müxtəlif mükafatlara layiq görülmüşəm. “Kainat” muğam müsabiqəsində dəfələrlə laureat olmuşam. Bu, mənim üçün həm böyük qürur, həm də məsuliyyətdir.

— Biz də ümid edirik ki, dediyiniz problemlər aradan qalxar. Sizə uğurlar arzu edirəm. Fikirləriniz çox kəskin, dəqiq və haqlı idi. Ümid edirəm ki, siz bizim qarşımıza daima uğurlu çıxışlarla, yüksələn sənət və yaradıcılığınızla çıxacaqsınız. Sonda oxucularımıza nə demək istəyirsiniz?

— Sonda oxucularımıza və bütün gənc sənətçilərə demək istəyirəm ki, seçdikləri peşəni sevsinlər və ona ürəkdən yanaşsınlar. İnsan öz sənətini sevəndə və işinə məsuliyyətlə yanaşanda qarşısına çıxan çətinliklərdən qorxmur. Əzmlə, səbrlə və vicdanla çalışmaq lazımdır. İnanıram ki, insan ürəkdən çalışarsa, bir gün layiq olduğu zirvəni qazana bilər.

— Sağ olun.

Fərid Əmiraslanov
“AYMEDİACOMPANY.AZ” saytının Mədəniyyət İşləri üzrə direktor müavini