Bu günkü müsahibim gənc, istedadlı xanəndə Məftun Səfərlidir.

-Məftun bəy, xoş gördük sizləri. Sosyal platformada və efirlərdə sizləri ara-sıra görürük. Gənclər arasında istedadlı və şirin səsə sahib bir xanəndə kimi tanınırsınız. Biz də istədik ki, sizi oxucularımız daha yaxşı tanısın. Müsahibəmizi elə özünüz haqqında məlumat verməklə başlayaq.

-Əvvəla, Fərid bəy, sizə və o cümlədən, “Aymediacompany.az” saytına bizim kimi gənclərin yaradıcılığını işıqlandırdığınız üçün öz adımdan və bütün gənc xanəndələr adından minnətdarlığımı bildirirəm. Ümidvaram ki, bu gün ki,müsahibəmiz həm maraqlı, həm səmimi, həm də yadda qalan olacaq.
Mən, Məftun Səfərli 1997-ci ildə Şirvan şəhərində anadan olmuşam. İlk təhsilimi Şirvan şəhəri Nəriman Nərimanov adına 2 saylı tam orta məktəbdə 7-ci sinifə kimi almışam. 2009-da Bülbül adına orta ixtisas musiqi məktəbinə daxil olmuşam. Demək olar ki, sənət kariyeram 2009-cu ildən işıqlanmağa başlayıb.

-Ailənizdə sizdən başqa musiqiçi varmı və sizin sənət fəaliyyətinizə ailənizin münasibəti necə olub?

-Ailəmizdə məndən başqa musiqi ilə məşğul olan olmasa da, səs mənə anamdan keçib. Onların razılığı ilə, həm də məndə olan istedadı üzə çıxarmaqla mənim bu sənətə eşqim, münasibətim daha da alovlanıb.

-Sənətdə kimdən ilham alıb oxumağa başlamısınız?

-Mənim Azərbaycan muğamında bir neçə sevdiyim xanəndələr var. Ancaq mənim sənət idealım Alim Qasımov olub. Onun sənətə yanaşmasını, sənət yolunu özümə ideal götürmüşəm. Amma sırf qulaq asıb bəhrələndiyim xanəndələr Azərbaycanda çox azdır. Ustadım, xalq artistimiz Gülyanaq Məmmədova mənim həm həyat, həm də sənət müəllimimdir. Ancaq kişi xanəndələrindən qulaq asdığım Rövşən Əziz, Ehtiram Hüseynov, Zakir Əliyevdir. Bu üç sənətkarən muğamlarından bəhrələnmişəm. Əlbəttə, mərhum sənətkarlarımıza da qulaq asmışam, onların da ifa texnikasını öyrənib mənimsəmişəm. Ancaq hal-hazırda qulaq asdığım sənətkarlar bunlardır. Alim Qasımovun sənəti, Azərbaycan milli musiqisini dünyaya tanıtması mənim üçün bir ideal yol, sənət cığırıdır.




-Adətən, səsi olan uşaqlar ilk başlarda orta məktəb tədbirlərində və ya qohum məclislərində oxuyur, kəşf edilir. İlk ifalarınız yadınızdadırmı?

-Əlbəttə, həm rayonun ictimai-siyasi tədbirlərində, həm də Şirvanda təhsil aldığım məktəbimizin bütün ictimai tədbirlərində canla-başla iştirak etmişəm. İfalarım olub. Şirvanda 2008-ci ildə gənc ifaçıların musiqi festivalı keçirilirdi, orda həm vokalistlər, həm xanəndələr, həm də xalq və bəstəkar mahnılarının ifaçıları iştirak edirdilər. O vaxtlar mən muğamla məşğul olmasam da, xalq və bəstəkar mahnılarını ifa edirdim.Yadıma gəlir, orda “Sevgili canan”, “Sənsiz”, “Ölkəm”, “Qubanın ağ alması” mahnılarını ifa eləmişəm. Aran rayonları üzrə keçirilən bu müsabiqədə 1-ci yerin sahibi, qalib oldum.


-Nə zaman təhsil almaq qərarınıza gəldiniz? İlk orta ixtisas və ali təhsilinizdə ustadınız kim olub?

-Müsabiqədə qalib olmağım mənə o qədər ruh verdi ki, təhsil almağa qərar verdim. Bülbül adına orta ixtisas musiqi məktəbinə imtaha verdim. O vaxt mərhum sənətkarlarımız rəhmətlik Əlibaba Məmmədov, Ağaxan Abdullayev, həmçini Natavan Şeyxova, Fərhad Bədəlbəyli kimi Azərbaycan incəsənətinin dəyərli ustadları məndən imtahan götürdülər və mən 2009-cu ildən burada təhsil almağa başladım. Təhsil aldığım dövrlərdə də bir sıra musiqi festivallarında, dövlət tədbirlərində, konsertlərdə iştirak etdim. O cümlədən, bir çox müsabiqələrə də qatılıb uğur qazandım. Burada ilk müəllimim Əlibaba Məmmədov olub. Daha sonra Ağaxan Abdullayevdən, Sahib İbrahimov, Nuriyyə Hüseynova kimi dəyərli müəllimlərdən təhsil almışam. Daha sonra ali təhsilimi ADMİU-da dəyərli müəlliməm Gülyanaq Məmmədovadan almışam.

-Ustadınızı bildiyimiz qədər çox sevirsiniz. İlk tanışlığınız necə olub?

-Biz Avstriyada keçirilən Azərbaycan mədəniyyəti günləri tədbirlərində iştirak etmişik. Gülyanaq xanımın bizə bir ana münasibəti, sənətinin böyüklüyü Gülyanaq müəllimin tələbəsi olmağıma qərar verməyimə səbəb oldu. Bu həyatımda verdiyim ən doğru qərarlardan biri idi.


-Xanəndə olmağınıza baxmayaraq sizin ud alətində ifa etməyinizi görmüşük. Bu aləti ifa etmək bacarığı haradan gəlir?

-Mən, Bülbül adına Orta İxtisas Musiqi Məktəbində təhsil alanda dərslərimi, əsasən də musiqi fənlərini çox yaxşı oxuyurdum. Orda biz həm fortepiano, həm ud, həm də xarici və Azərbaycan musiqi tarixindən musiqiyə aid olan bütün fənlərdən təhsil alırdıq.


-İlk dəfə rəsmi tədbir olaraq tamaşaçılar qarşısına çıxmağınız yadınızdadır?

-İlk tədbirim Şirvan şəhərində Heydər Əliyev adına muzeydə olub. Məktəbimizin nümayəndəsi olaraq təmsil olunurdum. Həmin tədbirdə muğam parçası və mahnı ifa etmişəm. Ancaq ilk uğur gətirən tədbirim Azərbaycan Dövlət Filarmoniyasında olub. O vaxt Respublikanın Əməkdar Artisti Nuriyyə Hüseynovanın rəhbərliyi ilə Bülbül adına Orta İxtisas Musiqi Məktəbinin gənc xanəndələri “Muğam aləminə səyahət” adlı tədbirdə iştirak etdik və bu mənim ilk peşəkar səhnəyə çıxışım oldu. Ondan sonra mən Nuriyyə xanımın sinfində iki il təhsil aldım.Təhsilimi bitirdikdən sonra ADMİU-ya qəbul olanda Gülyanaq Məmmədovanın tələbəsi olmuşam. Mənim incəsənət həyatımın ən parlaq, ən uğurlu, ən şaxəli illəri universitet illərindən başlanıb. Düzdür, Bülbül adına məktəbdə biz hər həftə BMM-də, Filarmoniyada, H.Əliyev Mərkəzində bir sıra dövlət əhəmiyyətli konsertlərdə iştirak etmişik. Ancaq ən çox incəsənət həyatımın parlaması universitet illərimə təsadüf edir.


-Pedaqoji fəaliyyətiniz varmı və bu haqda gələcəkdə nə düşünürsünüz?

-Pedaqoji fəaliyyətlə məşğul olmağı düşünürəm, ancaq özümü hələ ki, daha çox ifaçı kimi görürəm. Ustadların dərsinə gedirəm, oturub qulaq asıram, öyrənirəm.

-Bildiyimiz qədəri ilə siz muğam televiziya müsabiqəsinə də qatılmısınız...

-Bəli, ustadım Gülyanaq xanımın təşəbbüsü ilə müsabiqəyə qatılıb qalib olmuşam. Onu da deyim ki, Gülyanaq xanımın ilk müsabiqədə qalib olan yer tutan tələbəsi mən olmuşam.

-Müsabiqədən sonrakı dönəmdə həyatınızda nələr dəyişdi?

-Mən həmişə çalışmışam ki, sənətimi inkişaf elətdirim. Müsabiqə mənə stimul və əzmkarlıq verdi, sənətdə heç nəyə baxmayaraq, heçkimə qulaq asmadan öz yolumla davam etməyimə daha da həvəs verdi.



-İncəsənət nümayəndələri ilə qalmaqallarınız olubmu?

-Elə işlər mənim xarakterimə aid olan işlər deyil. Mən çalışıram ki, sənətimlə gündəmdə olum.

-Adətən, mədəniyyət insanları yaradıcı insanlar olduqları üçün xüsusi məşğuliyyətləri və hobbiləri olur. Sizdə necə?

-Mənim hobbim yaxşı xanəndələrə, musiqilərə qulaq asmaqdır. Bu idman da ola bilər. Ancaq düşünürəm ki, bir musiqiçinin hobbisi keyfiyyətli musiqiyə qulaq asmaqdır. Adətən hobbim belə şeylərdir. Məsələn, Məhəmməd Rza Şəcəryana, İrəcə,Mustafa Payana, İqbal Soltan Azərə, Ravi Şankara,Sami Yusifə, öz millilərimizdən Vaqif Mustazadəyə, Salman Qənbərova, Rafiq Babayevə qulaq asıram. Düşünürəm ki, tək muğam yox elə dünya müsiqilərindən xəbərimiz olmalıdır. Belə şeylər mənim hobbimdir.


-Bir çox gənc mədəniyyət insanları bu sahədəki dəyərsizlikdən və bəzən də haqsızlıqlardan, ayrıseçkiliklərdən çox gileylənirlər. Bəs Məftun bəyin gənc bir sənətkar kimi bu məsələlərə mövqeyi necədir?

-Məncə, bu ən çox elə musiqi sənətindədir. Biz Azərbaycan musiqisinin təmsilçiləriyik. Musiqi, muğam mənəviyyat deməkdir. Biz mənəviyyatımızı bölgələrə bölürüksə, pula, rüşvətə, şan-şöhrətə satırıqsa, deməli, hər şeyimizi satmış kimi çıxırıq. İstər muğam, istər digər müsabiqələrdə, istər efirlərdə bu Qarabağlıdır, bu Şirvanlıdır, bu Cənubludur, bu Qərblidir kimi fikirlər absurddur. Muğam birdir, Azərbaycanındır. Ləhcələr, şivələr, yanaşmalar fərqli ola bilər. Əlbəttə, Şirvan xanəndəsi Qarabağ şikəstəsi oxuya bilər, Qarabağlı Şirvan, Kəsmə şikəstə oxuya bilər, hamı öz ürəyini qoyur. Ancaq fərqli yanaşma var. Şirvan musiqi məktəbi daha çox aşıq musiqisinə bərabərdir. Şirvandan Alim Qasımov kimi muğam dühası çıxıb, onda biz deyə bilərik ki, Alim Qasımovdan o tərəfə oxuyan yoxdur? Əlbəttə, yox... Arif Babayev, Yaqub Məmmədov, Şahmalı Kürdoğlu, Xan
Şuşinski kimi dahi xanəndələr var. Təəsüf ki, sənəti bölgələrə bölüb parçalayırlar. Muğama fərqli yanaşan gəncləri qoymurlar ki, yenilik etməyə qarşıdırlar, ancaq klassik uslubda oxumalısınız- deyə irad bildirirlər. Bu cür fikirlər gənc xanəndələri həvəsdən salır. Biz sənəti böyüklərimizdən öyrənib bəhrələnmişik, onlar da gənclərimizin musiqiyə gətirdikləri yeniliklərə dəstək versinlər. Muğam müsabiqəsində mənə tutulan iradlardan biri də klassik muğam yolu oxumamağım idi. Axı niyə olmaz? Bir zamanlar Vaqif Mustafazadəni, Alim Qasımovu topa tuturdular, nə oldu axırı?! Əlbəttə, bəyənildilər, sevildilər. Mən özüm də bu gün belə tənqidlərlə üz-üzə gəlirəm. Ancaq mən məhəl qoymuram.

-Özünüzü gələcəkdə harada görürsünüz?

-İstəyirəm ki, muğamımızda Məftun Səfərlinin xüsusi adı olsun. Düşünürəm ki, gələcəkdə sənətim öz dəsti-xəttim fərqliliyi ilə seçiləcək.



-Bəs muğamımızın gələcəyini necə görmək istəyirsiniz?

-Mən muğamımızın gələcəyini daha sağlam görürəm. İstedadlı xanəndələrin üzə çıxmağını istəyərəm. Bu da bizim ustadlarımızdan, bizə verəcəyi xoş rəylərdən asılıdır. Azərbaycan muğamı klassik çərçivələrdən ibarət olmamalıdır.Yeni fikirlər, yeni yanaşmalar olmalıdır. Yeniliklərlə çiçəklənə bilər sənətimiz. İncəsənət adamları sənətimizə yenilik gətirən gənclərimizin qarşısını almamalıdır. Azərbaycanda o qədər perespektivli xanəndələr, incəsənət adamları olduğu halda, xarici səfərlərdə, dövlət tədbirlərində, konseefirdə eyni müğənnilər çıxış edirlər. İstedadlı gənclərə yer verilməlidir. Bəs bu muğam müsabiqələri niyə keçirilir?! Yeni gənclərin üzə çıxması üçün. Yarış qalibləri üzə çıxmayacaqsa, tanınmayacaqsa bu müsabiqələrin keçirilməsi nəyə lazımdır axı?!

-Biz də ümid edirik ki, dediyiniz problemlər aradan qalxar. Sizə uğurlar arzu edirəm. Fikirləriniz çox kəskin, dəqiq və haqlı idi. Ümid edirəm ki, siz bizim qarşımıza daima uğurlu çıxışlarla, yüksələn sənət və yaradıcılığınızla çıxacaqsınız. Sonda oxucularımıza nə demək istəyirsiniz?

-Sonda mən sizə öz dərin təşəkkürümü bildirirəm. Dəyərli vaxtınızı ayırıb bizim kimi gənc xanəndələrin sənət yoluna işıq açdığınıza görə sizə minnətdaram. Muğam televiziya müsabiqəsinin gənc qalibi olaraq, seçilmiş xanəndələrimizə bir şeyi məsləhət görürəm ki, ruhdan düşməsinlər, öz musiqi biliklərini, öz yanaşmalarını olduğu kimi görsətsinlər. Kiməsə oxşamağa, kimisə yamsılamağa çalışmasınlar. Muğam böyük elmdir. Öyrənib bir yerə çata bilərsən, ancaq bu biliklərə yiyələndikdən sonra onu özününküləşdirməlisən. Yalnız belə uğur qazanmaq olar. Qarda izlə gedənin izi qalmır. Heçkimə qulaq asmadan öz dəsti-xəttində addımlamaq və hər şey yaxşı olacaq prinsipinə əsaslanıb daha da gözəl işlər görməyə çalışmaq lazımdır. Sizə təşəkkür edirəm, aymedicompany.az saytına dərin minnətdarlığmı bildirirəm.

-Sağ olun.