1299-cu il 27 yanvar tarixində Osmanlı İmperiyasının əsası qoyulub.
1571-ci il 27 yanvar tarixində görkəmli dövlət xadimi, böyük sərkərdə Şah Abbas ( I Abbas Səfəvi və ya Böyük Şah Abbas) anadan olub (1571-1629). 42 il Səfəvi dövlətini idarə etmiş şah I Abbas Azərbaycan tarixinin görkəmli şəxsiyyətlərindən biri, şah I İsmayıldan sonra Səfəvilər sülaləsinin ən tanınmış nümayəndəsi olub. Avropada onu “Böyük Abbas” adlandırırdılar. Şah Abbas Azərbaycan dilinə böyük önəm verib. Sarayda Azərbaycan dilində danışmaq məcburi və zəruri idi.
1593-cü il 27 yanvar tarixində Vatikan Cordano Bruno barədə yeddiillik məhkəmə prosesini başlatdı.
1695-ci il 27 yanvar tarixində II Əhmədin ölümündən sonra II Mustafa Osmanlı İmperiyasının sultanı oldu.
1756-cı il 27 yanvar tarixində dahi Avstriya bəstəkarı, Avropa klassik musiqisinin ən nüfuzlu nümayəndələrindən biri Volfqanq Amadey Motsart anadan olub (1756-1791). Motsart bəstəkarlıqla yanaşı, həm də mahir skripkaçı, orqan ifaçısı və dirijor idi. Dahi bəstəkar qeyri-adi musiqi duyumu, eşitdiyi musiqiləri yadda saxlamaq və improvizə etmək kimi fenomenal qabiliyyətlərə malik olub. Yaratdığı 600-dən çox əsəri simfonik, konsert, kamera, piano, xor kimi klassik musiqi janrlarının ən yüksək zirvələrində qərarlaşıb. Onun əsərləri dünyanın ən nüfuzlu orkestrlərinin konsert repertuarlarının ayrılmaz hissəsini təşkil edir. Motsart tarixdə 100 ən çox öyrənilmiş şəxsiyyətlər siyahısına daxil edilib.
1832-ci il 27 yanvar tarixində İngilis yazıçısı Luis Kerrol anadan olub(1832-1898). Onun ən məşhur əsəri “Alisa möcüzələr adasında” adlanır.
1888-ci il 27 yanvar tarixində Vaşinqtonda Beynəlxalq Coğrafiya Cəmiyyəti təsis edilib.
1901-ci il 27 yanvar tarixində İtaliya bəstəkarı, dirijoru Cüzeppe Verdi vəfat edib (1813-1901). Əsasən opera əsərlərinin müəllifi olub. Onun bir çox əsərləri hazırda dünyanın məşhur teatr səhnələrində tamaşaya qoyulur. C.Verdi gənc yaşlarında Milan konservatoriyasına Lombardo-Venesiya krallığının vətəndaşı və musiqi istedadı "olmadığına" görə qəbul edilməsə də, indi Milan Dövlət Konservatoriyası bəstəkarın adını daşıyır.
27 yanvar 1904-cü ildə Rusiya-Yaponiya müharibəsi başlanıb. İki il sürən müharibədə Rusiya məğlub olub və Uzaq Şərqdəki strateji Port-Artur limanını itirib.
1906-cı il 27 yanvar tarixində Azərbaycan alimi, tarixçisi və şərqşünası, Dövlət Mükafatı laureatı, Əməkdar Elm Xadimi, “Şöhrət” ordenli Sara Aşurbəyli anadan olub (1906-2001). O, Yaxın və Orta Şərq xalqları tarixinin bilicisi olmaqla yanaşı, həm də rəssam və musiqiçi idi. Sərgilərdən birində onun “Göygöl” əsərini Meksika nümayəndələri alıblar. Bu əsər indi Meksika muzeylərindən birində saxlanır. S.Aşurbəyli “Bakının tarixinə dair oçerklər”, “Orta əsrlərdə Azərbaycan və Hindistanın iqtisadi və mədəni əlaqələri” və “Şirvanşahlar dövlətinin tarixi” kitablarının müəllifidir.
SSRİ-də qazma turbinin yaradıcılarından biri, neft-mədən sahəsində görkəmli Azərbaycan alimi Əyyub Tağıyev 1911-ci il 27 yanvarda anadan olub. Amerika, Fransa, İtaliya və başqa ölkələrin firmalarına onun qazma turbininin tətbqi üçün lisenziya verilib. Əyyub Tağıyevin Hindistan, Braziliya və Argentinanın neft sənayesinin inkişafında da rolu olub. (1911-1966)
27 yanvar 1923-cü ildə Azərbaycan SSR Mərkəzi İcraiyyə Komitəsi Bakı Teatr Texnikumunun – Şərqdə ilk teatr məktəbinin təşkili barədə qərar qəbul edib.
1924-cü il 27 yanvar görkəmli siyasi xadim, Şimali Kipr Türk Respublikasının qurucusu və birinci prezidenti Rauf Denktaş anadan olub (1924-2012) .
Nağaranı solo alət səviyyəsinə qaldırmış populyar ifaçı Çingiz Mehdiyev 1932-ci ilin bu günü doğulub. Zərb alətlərində çalmağa uşaq yaşlarından başlayan, Asəf Zeynallı adına musiqi texnikumu (1951), sonra Azərbaycan Dövlət Konservatoriyasını bitirən Çingiz 1956-cı ildə Moskvada Gənclər və Tələbələrin Ümumdünya Festivalında laureat adına layiq görülüb. O, 27 yaşından (1959) ömrünün sonunadək Azərbaycan Dövlət Filarmoniyasının solisti olub. Çingiz Mehdiyev Azərbaycanda ilk nağaraçalanlar ansabmlının yaradıcısıdır. (1932-1992)
Birinci Dünya Müharibəsindən sonra itirilən və Suriyanın içində muxtar status əldə edən Hataya 1937-ci ilin 27 yanvarında Millətlər Cəmiyyəti tərəfindən müstəqillik verildi. 1936-cı ildə Suriyanın müstəqilliyini tanıyan Fransaya qarşı diplomatik təzyiqini artıran Türkiyə Hataya da müstəqillik verilməsini istədi. Türkiyənin hərbi qüvvə tətbiqetmə ehtimalının artmasından sonra toplanan Millətlər Cəmiyyəti Hatayın müstəqilliyini tanıdı. Fransanın istəyilə seçkiləri Hatayın Türkiyə ilə birləşmə tərəfdarı olan partiyalar qazandı. 12 sentyabr 1938-ci ildə qurulan müstəqil Hatay Respublikası 1939-cu ilin 2 iyununda Türkiyəyə birləşmə qərarı verdi. Bu qərarla Türkiyənin cənub sərhədi də dəqiqləşmiş oldu.
900 günlük mühasirədən sonra - 1944-cü il yanvarın 27-də Leninqradın (Sankt-Peterburq) blokadası aradan qaldırıldı. Mühasirədə olduğu günlərdə Leninqradda 640 mindən çox adam acından, 10 minlərlə insan köç zamanı, şəhərin artilleriya atəşinə tutulması və bormardman zamanı isə 17 min sakin həlak oldu, 34 min adam yaralandı.
27 yanvar 1958-ci ildə Kiprdə minlərlə türk adanın türklər və rumlar arasında ikiyə bölünməsi üçün nümayişə çıxdı. İngiltərə hərbçiləri nümayişçilərə qarşı güc tətbiq etdi. Hadisələr zamanı onlarla adam yaralandı, səkkiz türk həyatını itirdi.
NASA Ay Proqramının birinci kosmik gəmisi olan “Apollo-1” 1967-ci il 27 yanvarında Kennedi Kosmos Mərkəzində test zamanı yandı. Astronavtlar Qas Qrissom (Gus Grissom), Edvard Hiqqins Uayt (Edward Higgins White) və Rocer Çaffi (Roger Chaffee) həlak oldular.
Türkiyənin Los Angelesdəki baş konsulu Məmməd Baydar və konsul Bahadır Demir 1973-cü il 27 yanvarda uğradıqları sui-qəsd nəticəsində şəhid oldular. ASALA terror təşkilatı tərəfindən törədilən sui-qəsdin qatili, erməni əslli ABŞ vətəndaşı Qurgen Yanıkyan qısa zamanda tutuldu və ömürlük həbsə məhkum edildi.
1995-ci il 27 yanvar tarixində görkəmli dövlət xadimi Heydər Əliyev ilk dəfə Dünya İqtisadi Forumunda (DİF) iştirak etmək üçün İsveçrəyə gedib. Ulu Öndər yanvarın 27-dən 31-dək Davos şəhərində işgüzar səfərdə olub. Azərbaycan Respublikasının DİF-də ilk dəfə iştirakı münasibətilə forum çərçivəsində Azərbaycana həsr olunan görüş keçirilib və dahi rəhbər Heydər Əliyev ölkə haqqında, onun siyasi, iqtisadi və sosial-mədəni inkişaf göstəriciləri barədə tədbir iştirakçılarına geniş məlumat verib. Ulu Öndər Azərbaycanın karbohidrogen ehtiyatlarla zəngin olduğunu və bu resurslardan dünyanın gələcək inkişafı naminə istənilən ölkə ilə qarşılıqlı maraqlar əsasında istifadə etmək prinsiplərini özündə əks etdirən xarici iqtisadi siyasət xətti tutduğunu bəyan edib.
